Jeremías 16:19 - Tayta Diosninchi Isquirbichishan

¹⁹ Tayta Dios gammi callpata gomanqui. Mana allicuna chayamänantapis gammi chapämanqui. Allpapa jucaj cuchunpita jucaj cuchuncamapis gammanmi llapan nasyun runacuna shamonga. Paycuna nishunquipaj: «Unay awilöcunaga cachapaycamasha imapäpis mana bälej munayniynaj dioscunallatami.

Jeremías 16:19 Referans Kwoze

Isaías 25:4

Pobricunataga gammi imaypis washashcanqui. Llaquicuycajcunatapis yanapar chapashcanquimi. Löcu tamya mana chayananpaj pacacunanmi cashcanqui. Fiyupa shanay mana chayananpäpis llantunmi cashcanqui. Fiyu runacunapa jämayninmi ichanga caycan löcu tamyano,

Nahúm 1:7

Tayta Diosga fiyupa allimi. Payga ñacaycashanchi öra pacamajninchïmi. Payman yäracoj cajcunataga imapitapis chapanmi.

Jeremías 17:17

Chaymi Tayta Dios ama camacächiychu noga manchacunätaga. Gamga canqui llaquicur ñacashä wichan imapitapis pacamajmi.

1 Pedro 1:18

Gamcunaga mamayqui taytayquipita-pachami jucha rurayllacho cawarayqui. Chayno cawaycaptiquimi Tayta Diosninchëga rantiypa-japuy jorgusha-cashunqui. Rantisha-cashunqui manami goripa chaninwanchu, ni guellaypa chaninwanpischu.

Jeremías 10:5

Chay ïdulucunaga caycan nunayllucunata ichichishannöllami. Chaycunaga manami rimanchu. Chaycunataga apariyparaj apan. Quiquillanga manami aywanchu. Chaytaga ama manchacuychu. Pitapis manami imatapis ruranchu allita ni mana allitapis.»

Jeremías 2:11

¿Maygan nasyunllaga diosnincunata rucachishachuraj juc dioscunata adurananpaj? ‹Diosnë› nishancunaga manami rasunpa diospischu. Acrashä runacunami ichanga mana sirbej ïdulucunata aduranan casha Noga munayniyoj Diosnin caycaptëpis cachaycamasha.

Isaías 44:10

«Diosnë» nir adurananpaj jundiypa ruraj runaga yanga manacajllapämi ruran.

Salmos 86:9

Tayta Dios, gammi camacächishcanqui nasyuncuna cananpaj. Chay nasyuncho tiyaj runacunami adurashunquipaj, alabashunquipaj.

Malaquías 1:11

Mundu intërucho may-chaychöpis nogataga rispitamanmi. May-chaychöpis nogapa jutëcho insinsuta rupaycächinmi. Nogapäga alli ofrendallatami churanpis.

Zacarías 2:11

Chayno captenga achca nasyun runacunami sirbimangapaj. Chaura nogaga paycuna cajchömi caycäshaj. Paycunaga acrashä runacunanami canga,» nir. Chayno captinrämi gamcunaga musyanquipaj munayniyoj Tayta Dios nogata cachamashanta.

Habacuc 3:19

Nogataga Tayta Diosmi imapitapis chapäman. Paymi camacächin chaquë lluychupa chaquinno cörrinanpaj. Nircurpis altu jircacunaman pushaman. Cay mañacushan caycan cuerdayoj instrumentucunata tucar cantananpämi.

Ezequiel 11:16

«Chaymi Babiloniacho caycajcunata niy: ‹Tayta Dios caynömi nin: «Gamcunataga nogami gargushcä. Mashtacächishcäpis juc-lä nasyuncunaman, mana rejsisha nasyuncunaman. Ichanga chay-quinrancho wallca watallami goyanquipaj. Gamcuna goyaycashayqui nasyuncunachöga quiquëmi caycäshaj aduramänayquipaj» nir.›

Isaías 49:6

Paymi nimasha: «Manami sirbimajnë cashallayquiwanchu usharanga. Manami Jacobpita miraj cawaycar quëdaj Israelcunata cutichishallayquiwanchu usharanga. Chaypa ruquenga nogami camacächishaj nasyuncunapaj juc achquino canayquipaj. Chaynöpami camacächishaj mundu intërucho caycaj runacunaga gam-raycu salbasha cananpaj.»

Salmos 62:2

Payllami salbaman y chapäman. Pay pacacunä captinmi ima mana allimanpis mana chayashächu.

Apocalipsis 11:15

Ganchis caj anjil trompëtata tucamuran. Chaura syëlucho sinchipa cayno nimushan wiyacämuran: «Llapan nasyuncunapis Tayta Diospa y cachamushan Cristupa maquinchönami caycan. Tayta Diosnami llapanpäpis munayniyoj car imaycamapis mandanga.»

Jeremías 3:23

Yangami puytush lömacunamanpis aywä. Yangami puntacunachöpis gaparpä. Tayta Dios gamllami Israelcunataga salbamanqui.

Isaías 62:2

Intëru nasyun runacunami ricanga allilla goyaycashayquita. Llapan raycunami ricashunquipaj munayniyoj caycajta. Chauraga quiquin Tayta Diosmi juc jutitana churapäshunquipaj.

Isaías 32:2

Raypis mandäshejcunapis cada-ünun cangapaj wayra chayananta chapajno, löcu wayrapita pacacunano, chaqui jircacunata pargunapaj sicyano, chaqui jircacho jatuncaray gagapa llantuyninno.

Proverbios 18:10

Tayta Diosga caycan mana tunej alli arusha törrinömi. Alli runacuna payman yäracojtaga imapitapis chapanmi.

Salmos 68:31

Egiptupitami shamonga faraonpa cachancuna. Etiopiacunami Tayta Diosta alabanga.

Salmos 62:7

Tayta Diosllami salbamajnëga. Paymi munayniyoj cayman churaman. Paymi chapacunä. Tayta Diosllami pacacunä.

Salmos 46:11

Munayniyoj Tayta Diosmi noganchïwanga caycan. Jacob rispitashan Tayta Diosmi noganchïpa pacacunanchëga. Selah

Salmos 46:7

Munayniyoj Tayta Diosmi noganchïwan caycan. Jacob rispitashan Tayta Diosmi noganchïpa pacacunanchëga. Selah

Salmos 46:1

Diosmi imapitapis pacamajninchëga. Ñacaycashanchi örapis juclla yanapämanchi.

Salmos 27:5

Mana allicuna chayamuptin Tayta Diosmi Wasincho pacamanga. Chaychömi washämanga. Gaga jananman churamarmi gueshpichimanga.

Salmos 19:14

Tayta Dios gammi chapämanqui, imapitapis salbamanqui. Cay parlashätaga yarpashäcunataga chasquiycamay ari.

Romanos 1:25

Tayta Diosninchïta adurananpa ruquenga quiquincuna rurashallantami aduran. Llapanta camaj Tayta Diosninchïta adurananpa ruquenga pay camashallantami aduraycan. Quiquin Tayta Diosnillanchi adurashaga cachun.

1 Reyes 20:23

Siriapa raynintana mandäshejcuna niran: «Israelcunapa diosnincunaga altu puntacunapa diosninmi. Chaynöpami binsimashcanchi. Paycunawan guechwa pampacho pillyashpanchëga binsishunpämi.

Isaías 44:20

Chayga uchpata micojnömi. Chayno ruräga quiquillanmi llutanta yarpar ruraycan. Chay runacunaga manami yarpachacongapischu: «Aptaraycashä ïduluga ¿manachuraj manacajlla?» nir.

Isaías 45:14

Israelcunata Tayta Diosga caynömi nin: «Egipto runacunapis, Etiopía runacunapis, jatusaj Sabá runacunapis maquiquichömi canga. Chay runacunapis, murushan micuynincunapis, nigusyuncunapis gamcunapanami canga. Paycunaga cadinawan watashami guepayquita shamongapaj. Gamcunapa ñaupayquiman gongurpacuycurmi ruwacushunquipaj. Chaynöga ruranga ‹Rasunpa gamcunachömi Diosga caycan. Paypita mas jucga manami dios canchu› nirmi.»

Jeremías 2:8

Cüracunapis noga munashänöga manami rurashachu. Layta yachachejcunapis manami rejsimashachu. Mandajcunapis nogapa conträ ricacuran. Profëtacunapis Baalpaj willacusha. Chayno rurarmi imapäpis mana bälej ïdulucunallaman yäracusha.

Jeremías 4:2

rasunpa juraptiqui llapan nasyuncunapis bindisyunta chasquengami. Chauraga runacuna cushicushpan nogatami alabamanga.»

Jeremías 12:16

Chay runacuna acrashä runacunata Baal diosta adurayta manana yachacherga acrashä runacunanönami cangapaj. Ichanga yachachicuynëcunata yachacunan, aduramaytapis yachacunan.

Jeremías 33:9

Jerusalenta yanapashäta musyashpanmi llapan nasyun runacuna rispitamanga, alabamanga. Noganami cay siudäpaj fiyupa cushicushaj. Jauca goyänanpaj Jerusalenta alli yanapashäta mayaycorga intëru munducho tiyajcunami almiranga, mancharenga.»

Joel 3:16

Sión lömapita-pacha Tayta Dios gayacamonga. Jerusalenpita-pachami räyuno busninta wiyacächimonga. Syëluwan cay pachapis sicsicyangami. Acrashan Israel runacunatami ichanga Tayta Dios ima-aycapitapis washashpan chapanga.»

Amós 2:4

Tayta Diosga caynömi nin: «Judá nasyun runacunaga aypallatanami mana allita rurasha. Paycunaga manami wiyacushachu yachachicuynëcunata. Laynëcunacho niycashancunatapis manami cäsushachu. Chaypa ruquenga papänincuna adurashan ïdulucunallatami adurasha. Chaypitami castigänillataga mana cachaycushächu.

Salmos 18:3

Tayta Dios, alabasha canayquimi camacan. Mañacamuptë chiquimajcunapitaga salbamanquimi.

Salmos 65:3

Mana allita rurashäcunaga binsiycämannami. Chaypis gamllami llapan juchäta perdunamanqui.

Jeremías 10:3

Chay runacuna riguishanga manacajllami. Paycunaga munti guerutami mutun. Nircur llagllayta yachaj runawan ima-nirajtapis llagllachin.

Jeremías 14:8

Gamllamanmi Israelcunaga yäracamö. Fiyupa llaquicurcaycaptëpis gamllami imapitapis salbamanqui. Cananga ¿imanirtaj cay nasyunchöga jäpano caycanqui? ¿Imanirtaj gorpa pachacojnölla caycanqui?