Isaías 40:10 - Tayta Diosninchi Isquirbichishan

¹⁰ Tayta Diosga fiyupa munayninwanmi chayamoj-aywan. Munayniyoj carmi llapanta maquincho chararanga. Juccunapa munaynincho caycajta shuntarcurmi acrashan runacunataga pushaycämun.

Isaías 40:10 Referans Kwoze

Apocalipsis 22:12

Jesucristupis nin: «Nogaga shamunäpänami caycä. Llapantami imatapis rurashanman-tupu premyunta goshaj.

Isaías 62:11

Cay pachacho juc cuchupita juc cuchucamami Tayta Diosga Sión siudäta willachisha: «Salbashojniquega chayamushanami. Juccunapa munaynincho caycajta guechurcurmi Tayta Diosga acrashancunata shuntaycämun» nir.

Apocalipsis 17:14

Nircur waräcuywan chay mandajcuna Cashni uyshapa contran jatarenga. Chaypis raycunapa Raynin carmi Cashni uysha binsenga. Payga binsenga Tayta Dios acrashan runacunawanmi. Chay runacunaga caycan Tayta Dios gayashanmi, payta wiyacojcunami.»

Mateo 28:18

Disïpuluncuna caycashanman witiycurna Jesús niran: «Tayta Diosga maquëman llapantami churasha cay pachacho cajtapis syëlucho cajtapis.

Isaías 49:4

Ichanga noga yarparä: «Yangallapämi arushcäpis. Manacajllachömi callpätapis ushashcä. Chayno carpis Tayta Diospa maquinchömi caycä. Arushäpita imano cutichimänanpäpis Tayta Diospa munayninchömi caycan» nir.

Isaías 59:15

Rasun cajtaga mananami pipis parlannachu. Mana allita rurayta cachaycoj cajtaga ima charashallantapis suwapaycärinmi. Pipis allita mana ruraptin Tayta Diosga fiyupami rabyacurcusha.

1 Juan 3:8

Juchata ruraj cajcunami ichanga dyablupa munaynincho caycan. Dyabluga gallarinanpita-pachapis juchatami ruran. Chaymi Tayta Diospa wamran Jesusga shamusha dyablu camacächishanta illgächinanpaj.

Juan 12:15

«¡Sión lömacho caycaj siudä ama manchacuychu! Rayniqui aywaycämunnami. Manta bürrullan muntashami aywaycämun.»

Salmos 110:6

Runacunata paymi jusganga imano rurashanpitapis. Gotuyninpami wañuycachenga. Cay pachacho cajtaga achcajpatami umantapis paquirgärenga.

Hebreos 2:14

Noganchïpis runalla carmi ñacanchi, wañunchïpis. Chaymi Jesuspis noganchïno runa yurir ñacaytapis, wañuytapis tarisha. Noganchïno yurircur wañurmi Jesusga wañuypaj munayniyoj caycaj dyabluta binsisha.

Juan 12:13

Chaymi Pascua fistaman aywaj runacunaga palmërapa rämancunata apacarcärir aywar Jesusta chasquicur niran: «¡Tayta Dios alabasha caycullächun! ¡Tayta Diospita shamoj runaga alabasha caycullächun! ¡Gammi Israelcunapa raynin canqui!»

Isaías 53:12

Chaypitami paytaga Tayta Dios mas alliman churanga. Chaychöga munayniyojcunawan iwalmi alli cajta chasquengapaj. Chaynöga chasquengapaj wañushanpitami, juchayojcunano ñacashanpitami. Rasunpa payga aypalla runacunapa juchantami aparan. Juchayojcunapäpis ruwacur mañacusha.

Salmos 66:3

Tayta Diospaj cantar cayno niy: «Rurashayquega llapanpis fiyupa allimi. Fiyupa munayniyoj captiquimi chiquishojcunapis mancharisha ñaupayquiman gongurpacamun.

Apocalipsis 20:11

Chaypita ricarä jatuncaray yuraj achicyaycachaycaj sillunta. Chaychömi Tayta Dios jamaraycaran. Chay örami syëlupis cay pachapis illgacäcuran. Mananami mas ricacarannachu.

Malaquías 3:1

Chaymi munayniyoj Tayta Diosga nin: «Willacojnëtami cachamoj-aywä nänita allchapämänanpaj. Gamcuna shuyaycashayqui Cachaga illajpitami Templuman yaycoj-aywan. ¡Chayamojnami-aywan gamcuna ricayta munarcaycashayqui cacha conträtuta apamöga!»

Isaías 28:2

Chay siudäpaj Tayta Diosga maynami acrasha caycächin callpayoj, munayniyoj runata. Chay runaga runtu tamyanöpis munayniyoj caycan; imatapis illgächej löcu wayranömi; löcu tamyaptin ima aycatapis lloglla apar illgächejnömi; aypalla yacu chayar ima-aycatapis ñiticurcojnömi. Chay runaga charircurmi pampaman sajtarenga.

Isaías 33:2

Tayta Dios, nogacunataga cuyapaycamay ari. Nogacunaga gammanmi yäracaycämö. Cada tuta yanapaycamay ari. Ñacaycunacho caycashä örapis salbaycamay ari.

Isaías 51:5

Wallcanami pishin salbanäpaj. Manapis aycällatanami munaynëwan llapan nasyun runacunata mandashaj. Lamar cantun nasyuncho tiyaj runacuna nogallamanmi yäracamonga. Munayniyoj cashallämanmi yäracamonga.

Isaías 59:16

Chayno caycajta pipis mana michajta ricarmi Tayta Diosga fiyupa almiraran. Chaura munayniyoj cashanta llapanta musyachinanpaj quiquinmi camaricuran.

Isaías 59:18

Chayno camaricurcurmi Tayta Diosga cada-ünunta imanöpis rurashanmanno cutichenga. Contrancunataga castigangami. Chiquej cajtaga imanöpis rurashanmannömi cutichenga. Chaynömi ruranga lamar cantun nasyuncunacho tiyaycajtapis.

Isaías 63:5

Ricachacurishpä manami pitapis ricarächu yanapämänanpaj shamojta. Yanapämänanpaj pipis mana captin almirasha ricacurä. Ichanga quiquëmi munayniyoj cashpä llapanchöpis alli llojshishcä. Rabyallawanmi llapanta usharishcä.

Génesis 15:1

Chaypita unayllataga Abramta Tayta Dios ribilar cayno niran: «Abram, ama manchacamaychu. Nogami gamtaga ima mana allicunapitapis chapaycä. Gamtaga ima-aycayquipis mas aypalla cananpämi yanapäshayqui.»

Jeremías 31:16

Tayta Diosmi nin: «Raquel, ama wagaynachu. Amana weguiquita ushaynachu. Llaquicushayquimannömi päguyquita chasquinquipaj. Wamrayquicunami cutimongapaj apashan nasyunpita. Noga Tayta Diosmi chayno në.