Isaías 4:1 - Tayta Diosninchi Isquirbichishan

¹ Chay wichanga ollgu runacuna wallcajllanami quëdanga. Chaymi ganchis warmicuna juc runallata guechunaconga. Runatana nengapaj: «Nogacunaga quiquëpa micuynëcunawanmi cawacushaj. Röpäcunatapis quiquëcunami ruracushaj. Gam ichanga auniycamay ari ‹paypami cä› ninäcunapaj. Chaynöpami nogacunataga mana jamurpämangachu.»

Isaías 4:1 Referans Kwoze

Génesis 30:23

Rimir wamran captin Raquelga niran: «Tayta Diosga manami munashachu pengaypaj wamraynajlla canäta.

Isaías 2:17

Alli-tucojcunawan ollgojcunaga pasaypa manacajman churashami cangapaj. Chay junäga Tayta Diosllami fiyupa munayniyoj cashpan rispitasha canga.

Isaías 13:12

Nogami camacächishaj runacunaga Ofircho alli caj gorinöpis juc ishcayllana quëdananpaj.

Lucas 21:22

Chay wichanga fiyupami castïgu canga. Chayno ruraptinmi Tayta Dios isquirbichishan llapan cumlenga.

Lucas 1:25

Cushicushpan niran: «Ima allishi Tayta Dios yanapämasha wawata tarinäpaj. Cananga manami pipis manacajman churamanganachu.»

2 Tesalonicenses 3:12

Chayno caj ermänucunataga Taytanchi Jesucristupa jutinchömi në: Wasin-wasin purinayquipa ruquenga micunayquipaj arucuy-llapa.

Isaías 17:7

Chay junaj Israelcunaga yarpärengapaj ima-aycatapis ruraj Tayta Diosta. Israelpa Santo Tayta Diosninmannami yäraconga.

Isaías 10:20

Chay wichanga wallcallapis quëdaj Israel runacuna mananami Asiria runacunaman yäracongapänachu. Chaypa ruquenga yäraconga Israelpa Santo Diosnillanmannami.

1 Samuel 1:6

Chaypitami Peninaga Anata chiquej. Asipaj, manacajman churaj wawata mana tarinanpaj Tayta Dios camacächishanpita.

Isaías 2:11

Alli-tucojcunaga uysurpangami. Ollgojcunapis manacajman churashami ricacongapaj. Chay junäga Tayta Diosllami fiyupa munayniyoj cashpan rispitasha canga.

Isaías 3:6

Chayno captinnami juc runaga papäninpa wasincho wauguinta nenga: «Gampaga caycanrämi röpallayquipis jaticunayquipaj. Nogacunapa mandajnë cay ari. Mana alli goyarcaycajta jorgamay.»

Isaías 54:4

Ama manchacuychu. Manami pengaychöga canquipächu. Manami ashllishunquipäpischu. Ni manami imapitapis pengacunquipächu. Wawaynaj jipash car pengacushayquitapis gongaycunquipämi. Manami yarpanquipänachu biyüda captiqui manacajman churashushayquitapis.

Jeremías 15:8

Biyüdacunapis aypallami canga lamar cantuncho caycaj agushpitapis masraj. Las-dösi intimi mamantinman llapan mösucunamanga wañuyta cachamushaj. Paycunamanga illajpitami manchariytawan llaquicuytapis chayachishaj.

2 Samuel 6:23

Micalnami wañunancama wawata mana tariranchu.