Génesis 47:27 - Tayta Diosninchi Isquirbichishan

²⁷ Jacobpita mirajcunaga Egiptuchöna tiyacuran. Gosén partichöna tiyacaycäriran. Chaycho tiyaycällar aypallaman miraran.

Génesis 47:27 Referans Kwoze

Génesis 46:3

Chaura Dios niran: «Nogaga papäniquipa Diosninmi caycä. Egiptuman aywaytaga ama manchacuychu. Chaychömi yanapäshaj wamrayquicuna juc nasyunpaj aypajpaj mirananpaj.

Éxodo 1:7

Ichanga Israelcuna fiyupa aypallamanna miraran. Paycunaga chay partipa intëruchöna aypacasha caycaran. Chaymi manchariypäna caran.

Hechos 7:17

«Abrahampita mirajcunata jorgunanpaj Tayta Dios aunishan wallcana pishiptin Israelcunaga Egiptucho aypallamanna mirasha caran.

Salmos 107:38

Tayta Dios bindisyunta gon runacuna aypallaman mirananpaj. Uywancunapis mana ushacaypa miran.

Zacarías 10:8

«Israelcunataga wichyacur gayashpämi juc pachallaman shuntashaj. Chaynöga shuntashaj noga salbasha cashpämi. Chauraga unay wichan aypalla cashanno yupaytapis mana atipaypämi cangapaj.

Salmos 105:24

Chaychöga acrashan runacunata aypallaman Tayta Dios mirachiran. Paycunaga Egipto runacunapita mas callpayojmi caran.

Deuteronomio 26:5

Churaycuptinnami Tayta Diospa ñaupancho ninqui: « ‹Unay caj awilöcunaga caran wallcalla puricachaj Aram runacunami. Paycuna Egipto nasyunman tiyaj aywacuran. Chaychöna aypallaman miraran. Fiyupa munayniyojna ricacuran.

Génesis 26:4

Nogami gampita mirajcunata yanapäshäpaj goyllarcunanöpis yupayta mana atipaypaj mirananpaj. Paycunatami cay particunataga goycushäpaj. Paycuna-raycumi mundu intërucho tiyaj runacunatapis bindisyunta goshaj.

Nehemías 9:23

Gammi camacächirayqui goyllarcunano aypallaman mirananpaj. Mas unay caj awilöcunata aunishayqui chacramanpis pusharayqui goycunayquipaj.

Deuteronomio 10:22

Unay famillyanchïcuna ganchis chuncallami (70) Egiptuman chayaran. Chaypis Tayta Diosmi camacächisha goyllarcunano yupayta mana atipaypaj aypallaman miranayquipaj.

Éxodo 1:12

Chayno ñacachiptinpis Israelcunaga chaynöllami miraycaran. Chaura Egiptucunaga Israelcunata fiyupana manchacoj.

Génesis 28:14

Gampita mirajcunaga ñuchu allpano yupaytapis mana atipaypämi cangapaj. Wamrayquicuna mirashpanmi may-chaypapis mashtacangapaj. Gam-cashami, gampita mirajcuna-cashami mundu intërucho tiyaj runacunatapis bindisyunta goshaj.

Génesis 17:6

Gampita mirajcunaga aypalla cananpämi camacächishaj. Chayno mirashpanmi cangapaj achca nasyunpaj aypaj. Gampita mirajcuna waquenga cangapaj raycunami.

Génesis 13:16

Gampita mirajcunaga ñuchu allpano yupaytapis mana atipaypaj mirananpämi camacächishaj.

Génesis 8:9

Ichanga paluma cutimuran büquiman maychöpis chaqui allpata ratananpaj mana tarir. Yacuga jinallaraj allpata ñitiraycaran. Noëga maquinta bentänapa macyarcur palumata büquiman cutichimuran.

Génesis 8:7

Chay quichashan bentänapa cachaycuran «cuervo» jutiyoj äbita yacu chaquishanta u manaraj chaquishantapis musyananpaj. Chay äbiga maymanpis ratananpaj mana captin päriyllapa puriycaran wac-läman cay-lämanpis aywashpan. Ratananpaj chaqui allpata mana tarir chayno buylar puriycaran.

Génesis 34:10

Chaynöpami gamcunaga caycho tiyacunqui. Cay nasyunchöga maychöpis munashayquicho tiyacuy. Munashayquitaga ranticuy. Chacratapis munashayquicho rantiy.»

Génesis 35:11

Mastapis Tayta Dios cayno niran: «Nogaga munayniyoj Diosmi cä. Gampitaga aypallaman mirachun. Gampita mirajcunaga cangapaj jatun nasyun cananpämi. Chaynöpis achca nasyunpaj aypajmi cangapaj. Gampita mirajcuna waquenga cangapaj raycunami.

Génesis 47:11

Chaypitana Josëga faraón nishannölla wauguincunatawan papäninta tiyachiran intëru Egipto nasyuncho caycaj partipita mas allinnin partiman. Chayga caran Ramsés partimi.