TITO 2:12 - Dios Rimashcata Quillcashcami

¹² Chai cuyaimi mana allita ruhuanatapish, mana alli munaicunatapish saquishpa, cai pachapi alli yuyaihuan, cashcata ruhuashpa, Diosta cazushpa,

Nuevo Testamento en Quichua Cañar 1996

¹² Chai c'uyaimi mana allita ruhuanatapish, mana alli munaicunatapish saquinata yachachishpa, cai pachapica alli yuyaihuan allillata ruhuashpa, Diosta cazushpa causanata yachachicun.

TITO 2:12 Referans Kwoze

EZEQUIEL 36:27

Cancunaman ñuca Espirituta cucpimi, ñuca mandashcacunatapish, pactachinacunatapish pactachishpa causanguichic.

SAN MATEO 16:24

Chaimanta Jesús paipac yachacuccunataca: —Maijanpish ñucata catisha nishpaca, quiquin causaita mana llaquishpa, cruzta apac shina llaquita apana cashpapish, ñucata catichun.

ROMANOS 6:19

Cancuna mana entendinalla cacpimi, entendinallata rimani. Ima shinami utcaman cancunapac cuerpota imapish millana mana allita ruhuachun saquircanguichic, chai shinallatac cunanca cuerpotaca Diospaclla tucushpa, servichun saquichic.

SALMOS 4:3

Mandac Dios paita yuyaricta paipaclla cachun acllashcataca yachaichicyari. Ñuca paita caparishpa mañacpica uyangallami.

2 PEDRO 2:9

Mandac Diosca paipaclla causaccunataca imapish llaquicunamanta quishpichinmi. Millai gentecunataca pai taripashpa, llaquichina punzhacamanmi huacaichishpa charicun.

1 JUAN 2:6

Maijanpish Dios-huan shucllami cani nishpaca, Jesucristo causashca shinallatacmi causana can.

2 TIMOTEO 3:12

Maijanpish Apunchic Jesus-huan shuclla tucushpa, paipaclla causanata munaccunaca llaquita apangami.

APOCALIPSIS 14:12

Chaimantami Diospaclla caccunaca Dios mandashcacunata cazushpa, mana shaicushpa Jesusta alli caticcuna cashcata ricuchingacuna.

SAN LUCAS 1:75

Tucui ñucanchic causaipi paipac ñaupapi allillata ruhuashpa, causachunmi, chashna cacharichinga.

1 TESALONICENSES 4:7

Diosca mana millaita ruhuashpa causachunchu acllarca, ashtahuanpish jucha illac causachunmi acllarca.

TITO 3:3

Ñaupaca ñucanchicpish Diosta mana cazuc, yuyai illac, juchapi chingarishca, ñucanchic munaillata ruhuashpa cushicuna yuyaillapi huatashca shinami causacurcanchic. Chashna cashpami shuccuna ama charichun munashpa, caishuc chaishuc-huan piñanacushpa causacurcanchic.

1 TESALONICENSES 4:9

Diosllatacmi caishuc-huan chaishuc-huan cuyanacunataca ña yachachishca, chaimantami ña mana ashtahuan cuyanacunamantaca quillcana canchic.

EFESIOS 2:2

Cai pacha mana alli causaita catishpami, huairapi puric mandac millai espíritu munashcata ruhuashpa causacurcanguichic. Chai espiritumi Diosta mana cazuccunataca mana allita ruhuachishpa mandacun.

ROMANOS 12:2

Ama cai pacha gentecuna munashca shina causaichicchu. Chaipac randica, mushuc yuyaihuan shuctaclaya causaichic. Chashna causashpami, Diospac munaica sumac cashcata, yachac chayanguichic.

ROMANOS 6:12

Chaimanta cancunapac huañunalla cuerpopi juchata ruhuana munai tiyachunpish, jucha mandashpa millaita ruhuachichunpish ama saquinguichicchu.

SAN MATEO 28:20

Ñuca cancunaman mandashpa yachachishcacunata paicunapish cazuchun yachachinguichic. Ñucaca cai pacha tucuringacamanmi, cancunahuanca casha» nirca.

1 JUAN 2:27

Jesucristo cushca Diospac Espirituca cancunapimi causacun. Diospac Espiritullatacmi tucui imatapish yachachicun. Pai yachachishpaca, mana llullashpa chashnatac cashcatami huillan. Chaimanta pi yachachictaca mana mashcanachu canguichic. Diospac Espíritu yachachishca shina, Jesucristohuan shuclla causaichic.

2 PEDRO 3:11

Chai shina Dios tucuita tucuchina cashcamantaca, cancunaca tucui mana allimanta anchurishpami, Diospaclla causana canguichic.

HEBREOS 8:11

Chashna cacpica pipish paipac ricsishcacunata paipac aillucunataca “Mandac Diostaca ricsiyari” mana ningachu, ashtahuanpish uchillamanta callarishpa, jatuncunacamanmi tucui mashna ñucataca ricsic chayangacuna.

1 TIMOTEO 6:17

Cai pachapi achcata chariccunataca: “Ama jatun tucushpa, chingarinalla charishcapi ama shunguta churangui” nishpa rimangui. Chaipac randica, ñucanchicman imallatapish atic aticta cushpa cushichic Diospi shunguta churachun ningui.

1 TIMOTEO 4:12

Criccuna canta ricushpa allita causachunca, allita ruhuashpa, sumac shimicunata rimashpa, alli cuyac, alli cric, shinallatac ima mapa yuyaicuna illacmi cana cangui. Pacta cantaca “huambraracmi” nishpa rimanmancuna.

COLOSENSES 1:22

Shina cacpipish cunanca Cristo runa tucushpa, llaquita apashpa huañushcamantami, Diosca cancunata paihuan alli tucuchun chasquirca. Chashnami cancunataca paipac ñaupapi paipaclla cachun, jucha illac cachun, shinallatac chuyayachishca cachunpish chashnaca ruhuarca.

GÁLATAS 5:24

Maijanpish Cristohuan caccunaca cai pacha jucha munaicunandi, imapish mana alli yuyaicunandimi chacatashca shina causacun.

GÁLATAS 1:4

Jesucristoca ñucanchic juchacunamanta huañushpami, cai millai pachamanta quishpichishpa, ñucanchic Dios munashcata pactachirca.

2 CORINTIOS 7:1

Cuyashca criccuna, Dios ñucanchicman allicunata cushami nishcamantaca, Diosta manchashpa cuerpotapish, almatapish tucui imapish mapayachinamanta huacaichirishpa, chuyanlla causashunchic.

2 CORINTIOS 1:12

Ñucanchic causaipica imatapish cashcata ruhuashpa, chuya shunguhuan causacushcatami yachanchic. Ashtahuancarin cancunahuanmi chashna causarcanchic. Chashnaca mana gentecunapac yachaillamanta ashtahuanpish Diospac cuyaillamantami chashna causacunchic.

ROMANOS 8:13

Chashna causacushpaca huañunguichicmi. Ashtahuanpish Diospac Espíritu munashca shina causashpaca, jucha munaita chingachishpa causanguichicmi.

HECHOS 24:25

Pabloca Dios munashca shina causanamanta, mana alli munaita jarcarinamanta, Dios taripanamanta huillacpimi, Felixca mancharishpa Pablotaca: —Cunanca rilla. Cutin uyasha nishpaca, cayachishallami— nirca.

HECHOS 24:16

Chaimantami ñucaca Diospac ñaupapipish, gentecunapac ñaupapipish mana juchanchishca alli causanata munani.

1 JUAN 5:19

Ñucanchicca Diospac huahuacuna cashcatami yachanchic, shinallatac cai pachapaclla causaccunataca diablo mandacushcatami yachanchic.

EFESIOS 1:4

Diosca paipac cuyaimantami manarac cai pachata ruhuashpa, ñucanchictaca jucha illac paipac ñaupapi paipaclla cachun acllashca.

SAN JUAN 14:30

Mana ashtahuan cancunahuan parlacushallachu. Chaica, ñami cai pachata mandac shamucun. Paica ñucata mana ati pudinchu.

SAN JUAN 6:25

Gentecuna yacu cuchata pasashpa Jesus-huan tupashpaca: —Yachachic, ¿ima horastac caimanca shamurcangui?— nirca.

SAN LUCAS 1:6

Zacariaspish, Elisabetpish Diospac ñaupapi cashcata ruhuashpami, allita causarca. Paicunaca Dios mandashcacunatapish, yachachishcacunatapish tucuita pactachicmi carca.

SALMOS 105:45

Chaica quillcashpa mandashcacunatapish, pai rimashcacunatapish pactachichunmi chashnaca curca. ¡Mandac Diosta alabaichicyari!

SAN JUDAS 1:18

Paicunaca: «Tucuri punzhacunapica, paicuna munashca shina mana alli munaillahuan causashpa, burlaric gentecunami tiyanga» nircacunami.

2 TIMOTEO 4:10

Demas runaca cai pachapi imalla tiyaccunapi shunguta churashpami, ñucata shitashpa Tesalónica puebloman rirca. Shinallatac Crescenteca Galacia llactaman, cutin Titoca Dalmacia llactamanmi rirca.

SAN MATEO 12:32

Runa Tucungapac shamushca ñucata rimactaca Diosca perdonangami. Ashtahuanpish Diospac Espirituta rimactaca, cai pachapipish, quipa punzhapipish Diosca manatac perdonangachu.

1 TIMOTEO 6:9

Ashtahuanpish charina yuyaihuan cacpimi, millai munaicunaca muspachishpa, tucllapi urmachic shina gentecunataca llaquiman apashpa chingachin.

SANTIAGO 1:27

Diospac ñaupapi mapa illac, Diosta alli cricmi cani ninaca, llaquipi cac viuda huarmicunatapish, taita mama illaclla cac huahuacunatapish ayudanami can. Shinallatac cai pachapi tiyac imapish mana allicunamanta huacaichirinami can.