8 Ñuca shimica canta alabana rimaicunallahuan cachun. Punzhanta can sumaimana cashcata huillachun.
Ñuca shimihuanca cashcata can ruhuashcatami huillasha. Punzhantami canta alli nicushalla.
Ñuca causaipica Mandac Diostami alabasha. Ñuca causashcacamanca salmocunahuanmi Diostaca cantasha.
¡Ñuca almalla, Mandac Diosta alli niyari! ¡Ñucata Mandac Dioslla, canca yallita jatun Diosmi cangui! Canca achic nicuc-huan, sumaimanahuan churarishca shinami cangui.
Ñucata mana allita ruhuasha niccunata pingaichishpa muspachishcamantami, ñuca calluca can cashcata ruhuac cashcataca punzhanta huillacungalla.
Can cashcata ruhuac cashcata, can quishpichic cashcataca tucui punzhami ñuca shimica huillacungalla. Maita mana yupaipac cacpipish huillacushallami.
Ñuca almaca huira aichata micushca shinami cushicunga. Jatun cushicuihuanmi ñuca shimihuan alabasha.
Sumaimana achic nicucmi cambac ñaupapica tiyan. Cambac huasipica sumac podermi tiyan.