OSEAS 6:1 - Dios Rimashcata Quillcashcami

¹ Israelcunaca: «¡Mandac Diospacman cutiringapac shamuichic! Paica ñucanchictaca ñutuchic shina ruhuashpapish jambingami. Pai chugrichishpapish chai chugrita huatashpa allichingami.

OSEAS 6:1 Referans Kwoze

DEUTERONOMIO 32:39

Ñucaca shuclla Diosmi cani. Shuctac Diosca mana tiyanchu. Ñucaca huiñaita causac Diosmi cani. Chugrichicpish, allichicpishmi cani. Ñuca maquimantaca pi mana quichungachu.

JOB 5:18

Pai chugrichishpapish paillatacmi jambin. Pai nanachishpapish paillatacmi allichin.

1 SAMUEL 2:6

Mandac Diosmi huañuitapish causaitapish cun. Paimi Seolmanpish cachan, paillatacmi chaimantapish llucchin.

OSEAS 14:4

Mandac Diosca: «Paicuna mana cazushpa, mana allita ruhuashcataca allichishpami yallitami cuyasha. Ñucaca ña mana ashtahuan paicunahuan piñarishachu.

ISAÍAS 55:7

Diosta mana manchac runapish mana alli causaita saquichun. Millaita ruhuac runapish mana alli yuyaita saquishpa, Mandac Diospacman cuti richun. Diosca llaquingami. Paipacman cutiricpica, paica perdonangami.

JEREMÍAS 30:17

Canta: “Sionca shitashcami siricun. Pipish mana yuyarinchu” nicucpipish, ñucallatac jambita cachashpami, cambac chugritaca alliyachisha. Chaitaca Mandac Dios ñucami nini» ninmi.

ISAÍAS 2:3

Achca gentecuna shamushpaca: «Mandac Dios munashca shina causanata yachachicpi, allita yachacushpa, paipac alli ñanta catingapac paipac urcuman rishunchic. Jacobopac Diospac huasiman jacuchic» ningami. Chaica Sión llactamantami mandashcacunaca llucshinga. Jerusalenmantami Mandac Dios rimashcaca llucshinga.

JOB 34:29

Dios upalla saquicpica, ¿pitac llaquichi pudingayari? Pai ñahuita pacacpica, ¿pitac catishpa ricui pudingayari? Paica jatun llactatapish, shuc runatapish chai shinallatacmi ricucun.

OSEAS 14:1

¡Israelcunalla, cancunata Mandac Diospacman cutirichicyari! ¡Cancunaca juchallishcamantami urmashcanguichic!

JEREMÍAS 50:4

Mandac Diosca: «Chai punzhacunaca israelcunapish, Judá runacunapish tandanacushpami cutinga. Ñucata mashcashpami, quiquin chaquihuan purishpa, huacashpa ñucapacman shamunga.

JEREMÍAS 3:22

¡Mana cazuc huahuacunalla, ñucapacman cutimuichicyari! ¡Cancuna cutimucpica, mana cazushpa mana allita ruhuashcataca alliyachishami!” ninmi ningui» nirca. Shina nicpica israelcunaca: «Ñucanchicta Mandac Diosmi cangui. Chaimantami cutimushpa cambac ñaupapi canchic.

ISAÍAS 30:26

Mandac Dios pai acllashcacunata huatachishpa jambicui punzhapica, quillaca inti shinami achicyachinga. Cutin intica canchis cutin yallitami achicyachinga.

JEREMÍAS 33:5

“Caldeocunami cai llactapi causaccunata tucui huañuchishpa tucuchingapac shamurca. Paicunallatac mana alli ruhuashpa causacushcamantami yallita piñarishpa, cai llactapi causaccunataca ñuca ñahuita pacashpa mana ricurcani.

SALMOS 30:7

Mandac Dioslla, canca cuyashpallami pipish mana cuyuchipac jatun urcuta shina ruhuarcangui. Cambac ñahuita pacacpica musparircanimi.

JEREMÍAS 30:12

Mandac Diosca: «Cambac llaquica mana allichipacchu. Cambac chugrica mana jambipacmi.

ISAÍAS 30:22

Cullquimanta ruhuashca cancuna ruhuashcalla dioscunata, jahuata curihuan llutashpa ruhuashca dioscunatapish millaichic. Chaicunataca millana mapa llachapata shina: «¡Caimanta llucshi!» nishpa, caruta shitaichic.

SOFONÍAS 2:1

Mana pingac gentecunalla, tandanacushpa llaquirichicyari.

1 SAMUEL 7:3

Chaimantami Samuelca israelcunataca: —Mandac Diosman tucui shunguhuan cutirishpaca ruhuashcalla shuctac dioscunata, Astarot huarmi diostapish cancunamanta anchuchinguichic. Chai quipaca shungumanta allichirishpa Mandac Diosllatac servishpa causanguichic. Chashna causacpimi, filisteocunapac maquimantaca cacharichinga— nirca.

JOB 16:9

Pai yallita piñarishpami ñucataca pitinacuc shina ruhuashca. Quirucunapish canirishpami ñucataca piñarca. Ñucata piñac runaca nanachic shinami ricucurca.

SALMOS 6:2

Mandac Dioslla, fuerza illacmi cani. Chaimanta ñucata llaquiyari. Mandac Dioslla, ñuca tullucunapish nanaihuanmi chucchucun, chaimanta ñucata allichiyari.

SALMOS 71:20

Achca llaquicunata, nanaicunatami ricuchircangui. Shina cashpapish canllatacmi cutin causaita cushpa enterrashcamantapish llucchingui.

ECLESIASTÉS 3:3

Huañuchingapacpish, jambingapacpish punzha tiyanmi. Tuñingapacpish, pircangapacpish punzha tiyanmi.

ISAÍAS 17:7

Chai punzhami runacunaca paicunata ruhuac Diosta ricunga. Chashnami quiquin ñahuihuan israelcunapac jucha illac Diostaca allita ricunga.

JEREMÍAS 33:6

Shina cashpapish ñucami cai llactapi causaccunaman jambita apamushpa alliyachisha. Chashna jambishpa sinchiyashpami, tucui llaquimanta cuidashpa, cushi causaita cusha.

JEREMÍAS 50:5

Sionman rina ñanta tapushpami, chai ñanta catishpa, Mandac Dios ñucahuan ari ninacushpa, huiñaita mana cungarishpa causangapac shamunga.

LAMENTACIONES 3:11

Shuctac ñanta pushashpami, ñutuchishpa saquirca.

OSEAS 11:10

Paicunaca Mandac Dios ñucata catishpami puringa. Ñuca león huacac shina, rimashcata uyashpami, paicunapac huahuacunaca inti tigrana ladomanta chucchushpa shamunga.

OSEAS 12:6

Cancunaca Mandac Diospacman cutirishpa llaquiccunapish, cashcata ruhuaccunapish caichic. Tucui causaipi Mandac Diosllata yuyarishpa causaichic.

LEVÍTICO 14:48

Lepra ungüilla cac huasita turuhuan llutashca quipa cura ricugricpi, chai ungüi ña mana ashtahuan mirarishca cacpica curaca: “Cai huasica ña mana mapachu” ninga.

2 CRÓNICAS 30:6

Huillangapac riccunaca jatun mandacpac cartatapish, pai churashca mandaccunapac cartatapish apashpami, jatun mandac mandashca shinallatac tucui Israel llactaman, tucui Judá llactaman rircacuna. Chai quillcapica: «Asiria llactata jatun mandaccunapac maquimanta atishca israelcunalla, Abrahampac, Isaacpac, Jacobopac Mandac Diospacman cutirichic. Shina cutiricpica, paipish cancunapacman shamungami.

JOB 22:23

Tucuita ruhuac Diosman cutirishpaca cutinllatacmi sinchiyangui. Cambac huasimantapish millaitaca tucuimi anchuchingui.

OSEAS 3:5

Chai quipami, israelcunaca cutishpa, paicunata Mandac Diostapish, jatun mandac Davidtapish yuyaringa. Tucuri punzhacunami allita japingapac Mandac Diospacman chucchushpa cuchuyanga.