OSEAS 12:6 - Dios Rimashcata Quillcashcami

⁶ Cancunaca Mandac Diospacman cutirishpa llaquiccunapish, cashcata ruhuaccunapish caichic. Tucui causaipi Mandac Diosllata yuyarishpa causaichic.

OSEAS 12:6 Referans Kwoze

MIQUEAS 6:8

Huañunalla runa, ñami Mandac Diosca ima alli canataca huillarca. Mandac Diosca cashcata ruhuachun, llaquic cachun, paipac ñaupapi cumurichunmi munan.

MIQUEAS 7:7

Ashtahuanpish ñucaca Mandac Diospac maquipimi casha. Ñucata quishpichic Diostami shuyasha. ¡Ñucata Mandac Diosca ñuca mañashcataca uyangami!

OSEAS 14:1

¡Israelcunalla, cancunata Mandac Diospacman cutirichicyari! ¡Cancunaca juchallishcamantami urmashcanguichic!

ZACARÍAS 7:9

«Tucuita Mandac Dios ñucaca: “Cashcata ruhuashpa taripanguichic. Tucui mashna cuyanacuichic, llaquinacuichic.

SANTIAGO 2:13

Shuccunata mana llaquiccunataca, paicunatapish mana llaquishpami, Diosca taripashpa llaquichinga. Ashtahuanpish shuccunata llaquiccunataca, taripana punzhapica alli ningami.

SANTIAGO 1:27

Diospac ñaupapi mapa illac, Diosta alli cricmi cani ninaca, llaquipi cac viuda huarmicunatapish, taita mama illaclla cac huahuacunatapish ayudanami can. Shinallatac cai pachapi tiyac imapish mana allicunamanta huacaichirinami can.

HECHOS 26:20

Chaimantami puntaca Damasco pueblopi, Jerusalén pueblopi, tucui Judea llactacunapi huillarcani. Mana israelcuna llaquirishpa, Diosman cutirishpa, allita causachunmi huillarcani.

HECHOS 2:38

Chashna tapucpimi, Pedroca paicunataca: —Juchayuc cashcamanta llaquirishpa, Diosman cutirishpa, Jesucristopac shutipi bautizarichic. Chashna ruhuacpimi, Diosca juchacunata perdonashpa, paipac Espirituta cunga.

ZACARÍAS 8:16

Cancunaca caicunatami ruhuana canguichic: Caishuc-huan chaishuc-huan cashcallata parlaichic. Cashcallata ruhuashpa taripaichic. Chashna ruhuashpami cushilla causanguichic.

ZACARÍAS 1:3

Chaimantami: Tucuita Mandac Diosca: Ñucapacman cutimuichic. Ñucapish cancunapacman cutishami.

SOFONÍAS 3:8

Chaimanta llaquichina punzha chayangacaman shuyaichic. Ñucaca tucui llactacunata tandachingapac, jatun mandaccuna mandana llactacunata nina japiric shina llaquichinatami yuyarircani. Chaimantami nina japiric shina piñarishpa, tucui cai pachata tucuchisha. Chaitaca Mandac Dios ñucami nini.

HABACUC 2:3

Muscuipi shina ricushcaca tauca huatacunata mana pactashpapish, mana llullangachu, pactangatacmi. Mana utca pactacpipish chaparacuilla, pactangatacmi, mana unayangachu.

AMÓS 5:24

Ashtahuanpish allita mandanaca yacu shina callpacuchun. Cashcata ruhuanaca mana tucuric callpacuc yacu shina cachun.

JOEL 2:13

Llaquirishpa churanata lliquirinapac randica, tucui shunguhuan llaquirichic. Cancunata Mandac Diospacman cutirichic. Paica cuyac shungumi, llaquicmi. Mana utca piñaric, yallita llaquicmi. Paica mana llaquichinata munanchu.

OSEAS 10:12

Chaimanta cunanca, alli muyuta tarpuc shina cashcata ruhuaichic. Mandac Diospac cuyaitaca cosechac shina japichic. Cunan punzhacunaca Mandac Dios ñucata mashcana punzhacunami. Chaimanta allpata tarpungapac allichichic. Ñuca shamushpa cashcata ruhuanata yachachingacamanmi chashna allichirina canguichic.

OSEAS 4:1

Israelcunalla, Mandac Dios rimashcata uyaichic. Paica cai llactapi causaccunahuan piñarishcami. Cai llactapica cashcata nicpish, Diosta manchacpish, paimanta yachanata munacpish mana tiyanchu.

JEREMÍAS 22:15

¿Cedro caspicunamanta huasita ruhuashpallachu, jatun mandacmi cani nishpa yuyangui? Cambac taitaca, ¿manachu allita, cashcata ruhuashpa mandashpaca alli micushpa, ubiashpa causarca? ¿Manachu paica alli causarca?

ISAÍAS 58:6

Cancuna ayunashpaca llaquihuan causaccunata, huatashca shina, llaquilla causaccunata cacharichinami canguichic. Yugo aparishca shina causaccunamanta yugota anchuchinami canguichic.

ISAÍAS 40:31

Ashtahuanpish Mandac Diosta shuyashpa causaccunaca mushuc fuerzatami japinga. Volac animalcuna shinami, mana shaicunga. Yallita purishpapish, yallita callpashpapish mana fuerza illac saquiringachu.

ISAÍAS 31:6

¡Israelcunalla, cancuna yallita mana cazushpa, llaquichishca Mandac Diospacman cutichicyari!

ISAÍAS 30:18

Mandac Diosca cancunata llaquingapacpish shuyacunmi. Paica cancunata llaquic cashcamantami shuyacun. Mandac Diosca cashcata ruhuac Diosmi. ¡Tucui paita yuyarishpa causaccunaca yallita cushicuchun!

ISAÍAS 8:17

Mandac Diosca Jacobopac huahua huahuapuramanta ñahuita pacashcami. Ñucaca paitami shuyashpa, yuyarishpa causasha.

ISAÍAS 1:16

Jahuarichic, picharichic. Cancuna mana allita ruhuashcataca ñuca ñaupamanta anchuchichic. Mana allita ruhuanata saquishpa,

PROVERBIOS 21:3

Mandac Diosmanca cashcata ruhuana, alli ruhuanami animalcunata cushpa huañuchishcatapish yalli alli ricurin.

PROVERBIOS 1:23

¡Ñuca rimashcata uyashpa cutimuichicyari! ¡Riqui, ñuca rimashcacunata yachacuchunmi munani! ¡Cancunapac jahuapica ñuca Espiritutami tallic shina cachasha!

SALMOS 123:2

Riqui, serviccuna paicunapac amopac maquita chapacuc shina, servic huarmicuna paicunapac amapac maquita chapacuc shinami, ñucanchicca Mandac Dios llaquingacaman, paillata chaparacunchic.

SALMOS 37:7

Mandac Diospac ñaupapi upalla cailla. Pai imatapish nichun shuyailla. Millaicuna sumacta causacta ricushpapish, ama chai causaita munanguichu.

SALMOS 27:14

Mandac Diosta shuyailla. Sinchiyashpa cambac shungupi cushicui. ¡Ari, Mandac Diosta shuyailla!

GÉNESIS 49:18

¡Mandac Dioslla, can quishpichichunmi shuyacuni!

EZEQUIEL 18:30

Israelcunalla, tucui cancuna ruhuashcatami taripasha. Tucui millaita ruhuashcamanta llaquirishpa, ñucapacman cutimuichic. Chashna cutimucpica, cancunapac juchamantaca mana llaquichishachu.

JOEL 2:12

Mandac Diosca: «Cunanca ayunashpa, huacashpa, yallita llaquirishpa, tucui shunguhuan ñucapacman cutirichic» ninmi.

ÉXODO 3:15

Cutinllatac Diosca Moisestaca: —Israelcunataca: “Cancunapac ñaupa taita Abrahampac, Isaacpac, Jacobopac Mandac Diosmi cancunapacmanca cacharca” ningui. Cai shutica huiñaipacmi can. Cai shutitami huiñaita ricsinga.

AMÓS 4:13

Paica urcucunatapish, huairatapish ruhuac, runacunamanpish, pai imata yuyaricushcata huillacmi. Paimi, tutatapish punzhayachin. Paica cai pachapi tucui urcucunatami purin. ¡Paica, tucuita Mandac Dios shutimi!