SAN MATEO 2:16 - Dios Rimashcata Quillcashcami

¹⁶ Herodesca yachaccuna umashcamantami, munai piñarishpa, tucui muyundi Belén llactapi causac, manarac ishcai huatata charic cari huahuacunata huañuchichun mandarca. Chashnami yachaccuna lucerota ricushca punzhamanta ñaupaman huacharishca huahuacunata huañuchichirca.

Nuevo Testamento en Quichua Cañar 1996

¹⁶ Yachac runacuna paipacman mana cutimushpa umashcamantami, Herodesca munai p'iñarishpa, tucui muyundic Belén llactapi causac, manarac ishcai huatata charic c'ari huahuacunata huañuchichun mandarca. Chaitaca, yachac runacuna lucerota ricushca punzhamanta pachami yuyarishpa, chashnaca ruhuachirca.

SAN MATEO 2:16 Referans Kwoze

ISAÍAS 59:7

Paicunapac chaquicunaca mana allita ruhuangapacllami callpan. Mana faltayuc runata huañuchishpa yahuarta jichangapacllami utca rin. Paicunaca millaita ruhuanallatami yuyacun. Maita rishpapish llaquichishpa tucuchishpallami purin.

PROVERBIOS 28:15

Huaccha gentecunata Diosta mana manchac mandacca león huacacuc shina, yarcaihuan cac oso shinami can.

APOCALIPSIS 17:6

Chai huarmitaca Diospaclla caccunapac, shinallatac Jesusmanta huillaccunapac huañuchishca yahuarhuan machashca cashcatami ricurcani. Chaita ricushpaca, yallitami mancharishpa saquirircani.

OSEAS 10:14

Chaimantami cancunapac llactacunapica yallita caparinacui tiyanga. Tucui jatun torrecunami urmanga. Bet-arbel llactapi causaccunahuan macanacui punzhapi, jatun mandac Salmán mamacunatapish, paipac huahuacunatapish ñutuchishpa tucuchishca shinami tucuchinga.

DANIEL 3:13

Chashna nicpimi, Nabucodonosorca yallita piñarishpa, Sadracta, Misacta, Abed-negota pushamuchun cacharca. Chashna mandacpimi, chai runacunata jatun mandacpac ñaupaman pushamurca.

ISAÍAS 26:21

Riquichic, Mandac Diosca cai pachapi causaccuna paita piñashpa, mana allita ruhuashcamantami llaquichingapac jatarigrin. Allpapish paipac jahuapi huañuchishpa, yahuarta jichashcata ricuchingami. Paipac jahuapi huañuchishcataca mana ashtahuan pacangachu» nirca.

2 REYES 8:12

Chaimantami Hazaelca: —Ñuca mandaclla, ¿ima nishpatac huacangui?— nishpa tapurca. Shina nicpimi paica: —Israelcunata can llaquichigricushcatami yachani. Canca paicunapac torrecunatapish rupachigringuimi. Mosocunatapish espadahuan huañuchigringuimi. Huahuacunata japishpa pambata shitagringuimi. Huicsayuc huarmicunatapish huicsata pascashpa huañuchigringuimi— nirca.

JUECES 16:10

Chaimantami Dalilaca: —Canca, llullashpami ñucata burlashcangui. Cunanca canta ima shina huatanata huillaiyari— nirca.

GÉNESIS 49:7

Cancuna piñarishcamantaca mana alli nishcami canguichic. Cancunaca Jacobopac familiamanta chicanyachishcami canguichic. Israelpuramantapish caita chaita rishpami causanguichic.

PROVERBIOS 28:17

Pitapish huañuchishpa yahuarta jichac runaca pai huañungacamanmi miticushpa puringa. Paitaca huañunamanta mana pi jarcanchu.

JOB 12:4

Ñucaca ñuca ricsishcacunapac burlashpa asinami tucushcani. Diosta mañacpica paica uyarcami. Imatapish cashcata ruhuac runatapish, mana allita ruhuac runatapish, burlashpami asincuna.

NÚMEROS 24:10

Chashna nicta uyashpa, Balac piñarishpa maquita huactarishpa Balaamtaca: —¡Cantaca, ñucata piñaccunata maldiciachunmi cayachun cacharcani! ¡Ashtahuanpish canca quimsa cutinmi paicunataca bendiciashcangui!

NÚMEROS 22:29

Shina nicpimi Balaamca: —¡Ñucataca yallitami burlata ruhuashcangui! ¡Espadata ñuca maquipi charicuimanlla! ¡Cunanllatami huañuchiman!— nirca.

GÉNESIS 39:17

Cusa shamucpica, huasipi serviccunaman nishca shinallatacmi: —Ñucanchicta servichun can pushamushca hebreo runami ñucata japirishpa burlasha nirca.

GÉNESIS 39:14

chai huarmica chai huasipi serviccunata cayashpaca: —Riqui, ñucanchicta burlachunmi, cai hebreo runataca pushamushca. Cai runaca ñucahuan sueñusha nishpami cuchuyarca. Chaimantami ñucaca sinchita caparircani.

SAN MATEO 2:1

Judea llacta Belén pueblopimi Jesusca huacharirca. Chai punzhacunaca Herodesmi chai llactataca mandacurca. Chaipimi inti llucshina ladomanta, yachaccuna Jerusalén puebloman shamurca. Paicunaca lucerota ricushpa yachacuccunami carca.

SAN MATEO 2:7

Chashna nicpimi, Herodesca yachaccunata pacalla cayashpa tapushpa, punzha lucero ricurishcata allita yachac chayarca.

SAN MATEO 2:17

Chashnami, Diosmanta ñaupa huillac Jeremías quillcashcaca pactarca.

APOCALIPSIS 12:4

Chupahuanca quimsapi chaupishcamanta shuc parte lucerocunatami jahua cielomanta cai pachaman aisashpa shitarca. Chai dragonca huarmi ña sajuarinca huahuata micungapacmi, chai huarmipac ñaupapi shayarirca.