SAN LUCAS 15:28 - Dios Rimashcata Quillcashcami

²⁸ Shina nicpimi, chai huauquica yallita piñarishpa, mana yaicusha nirca. Chaimantami taita llucshishpa yaicuchun rogarca.

Nuevo Testamento en Quichua Cañar 1996

²⁸ Shina nicpi chai huauquica munai p'iñarishpami, mana yaicusha nirca. Chaimantami taita llucshishpaca: ‘Yaicuiyari’ nishpa mañarca.

SAN LUCAS 15:28 Referans Kwoze

JONÁS 4:9

Shina nicpimi, Mandac Diosca: —¿Chai higuera yura chaquishcamantachu yallita piñaringui?— nirca. Shina nicpimi Jonasca: —¡Ari, huañungacamanmi piñarini!— nirca.

1 SAMUEL 18:8

Chashna nishpa cantashcaca Saulmanca mana allichu carca. Chaimantami yallita piñarishpa: «Davidca chunga huaranga runatami huañuchirca, Saulca shuc huaranga runatami huañuchirca nincunami. ¡Ashtahuanpish Davidca jatun mandacmi ninallami faltan!» nishpa yuyarca.

SAN LUCAS 15:2

Chaita ricushpami fariseocunapish, mandashcacunata yachachiccunapish rimarishpaca: —Cai runaca juchayuccunahuan tandarishpa micunllami— ninacurca.

SAN LUCAS 7:39

Chaita, chai micungapac cayac fariseo ricushpaca: «Cai runa, Dios ima nishcata huillac cashpaca, paipac chaquipi tuparicuc huarmi pi cashcata, imalaya huarmi cashcata yachanmanmi. Cai huarmica yalli juchayuc huarmimi» nishpa yuyacurca.

ISAÍAS 66:5

Mandac Diosta manchaccuna pai rimashcata uyaichicyari. Paica: «Ñuca shutita mañashcamanta millanayachishpa, llucchishpa cachashca cancunapac huauquicunaca: “¡Cancunapac cushicuita ricungapac, Mandac Diosca sumaimanami nishca cachun!” nincunami. Ashtahuanpish paicunaca pingaichishcami canga.

ISAÍAS 65:5

Chashna cashpapish: “Carupi caichic, ama cuchuyaichicchu. Ñucanchicca canta yalli Diospaclla chicanyachishcami canchic” nincunami. Chai gentecunaca rupacuc cushni shinami ñucataca punzhanta umata nanachin.

HECHOS 14:2

Ashtahuanpish Jesusta mana cric israelcunaca, mana israelcunatami criccunata piñachun cunarca.

HECHOS 13:45

Chashna taucacuna tandanacushcata israelcuna ricushpami envidiashpa rimarcacuna. Chashnami Pablo yachachishcata yangapi churashpa, camishpa rimarircacuna.

SAN LUCAS 24:47

Chai shinami, Jerusalén pueblomanta callarishpa, tucui llactacunapi juchayuc cashcamanta llaquirishpa, paipac shutipi Diosman cuti richun huillashca cana can.

SAN LUCAS 13:34

¡Aij, Jerusalenpi causaccunalla! Dios ima nishcata huillaccunataca huañuchiccunami canguichic. Dios huillachun cachashcacunatapish rumihuan shitaccunami canguichic. Cancunataca tauca cutinmi mama huallpa huahuacunata ucllac shina, tandachisha nircani. Chashna tandachisha nicucpipish, mana uyarcanguichicchu.

SAN LUCAS 5:30

Fariseocunapish, mandashcacunata yachachiccunapish chaita ricushpa, Jesuspac yachacuccunataca: —¿Ima nishpatac impuestota japiccunahuanpish, caishuc juchayuccunahuanpish micucunguichic, ubiacunguichic?— nircacuna.

SAN MATEO 20:11

Chashna shuc punzhallamanta japishpami chagrayuc amotaca:

1 SAMUEL 17:28

Chashna parlanacucta uyashpami paipac punta huauqui Eliabca Davidhuan yallita piñarishpaca: —¿Imapactac caiman shamurcangui? ¿Shitashca pambapica, ashalla ovejacunataca pimantac saquimurcangui? Can cari tucushca cashcata, millai shungu cashcatapish yachanimi. Canca cai macanacuita ricungapacllami shamushcangui— nirca.

1 TESALONICENSES 2:16

Mana israelcuna quishpirichun, ñucanchic huillashun nicpipish mana saquinchu. Chashnami ashtahuan juchayuc tucuncuna. Chaimantami Diosca yallita piñarishpa llaquichinga.

2 CORINTIOS 5:20

Chashnaca Cristopac randi huillachun cachashca huillaccunami canchic. Shina cashpami Diosllatac “ñucahuan alli tucuichic” nicuc shina, ñucanchicta huillachicun. Chashna cashcamantami “Cristopac shutipi Dios-huan alli tucuichic” nishpa mañacunchic.

ROMANOS 10:19

Cutinllatacmi ñucaca: «Israelcunaca caicunataca, ¿manachu entendirca?» nishpa tapuni. ¡Ari, entendircami! Ñaupaman Moisés huillashpaca: «Mana ñucapac gentecunata acllashpami piñachisha. Mana entendic gentecunata acllashpami, piñachisha» ninmi.

HECHOS 14:19

Antioquía pueblomantapish, Iconio pueblomantapish maijan israelcuna shamushpami, gentecunata jatarichirca. Pablota rumicunahuan shitashpa, huañunallata ruhuashpami, “ñami huañun” nishpa, aisashpa, chai pueblomanta llucchirca.

HECHOS 13:50

Ashtahuanpish israelcunaca chai runacunata catishpa cachashunmi, gentecunapac alli nishca, Diosta yuyaric huarmicunatapish, chai pueblota mandaccunatapish cunarca. Chaimantami Pablotapish, Bernabetapish llaquichishpa, chai llactamanta llucchishpa cacharcacuna.

MARCOS 1:40

Lepra ungüihuan ungushca runa Jesuspacman cuchuyashpa, cungurishpaca: —Can ñucata alliyachisha nishpaca, alliyachinguimanllami— nishpa mañarca.

SAN LUCAS 15:27

Chashna nicpimi paica: “Cambac huauquimi cutimushca. Pai allilla shamushcamantami, cambac taitaca huira huagrata huañuchichishpa cushicucun” nirca.

SAN LUCAS 15:29

Paica taitataca: “Taita, ñucaca cai tucui huatacunatami can ima nishcata ruhuashpa servishcani. Chashna cacpipish ñuca ricsishcacunahuan cushicuchunca, shuc chivollatapish mana cushcanguichu.

JEREMÍAS 35:16

Recabpac churi Jonadab huahua huahuacunaca ñaupa taita mandashcataca tucuita cazushcacunami. Ashtahuanpish cai gentecunaca manatac cazuncunachu” ninmi ningui.