LEVÍTICO 23:28 - Dios Rimashcata Quillcashcami

²⁸ Chai punzhaca juchata pichana punzhami. Chaimanta chai punzhapica ama trabajanguichicchu. Chai punzhapica cancunata Mandac Dios ñucapac ñaupapi cancunapac juchata pichachun ñucaman ofrendata cuna punzhami.

LEVÍTICO 23:28 Referans Kwoze

ZACARÍAS 3:9

Riquichic, Josuepac ñaupapimi canchis ñahuiyuc shuclla rumita churasha. Chai rumipica ñucami sellota churasha. Shuc punzhallami cai llactapi causaccunapac juchataca anchuchisha.

LEVÍTICO 16:34

Caicunaca huatanta shuc cutin israelcunapac juchata pichachun animalta cuchun mandashcami. Caitaca huiñaitami ruhuana can» nirca. Moisesca Mandac Dios mandashca shinallatacmi ruhuarca.

1 JUAN 5:6

Apunchic Jesucristo shamushcataca yacupish, yahuarpish ricuchinmi. Mana pai bautizarishca yacullachu ricuchin, ashtahuanpish pai huañushca yahuarpish ricuchinmi. Cashcata nic Diospac Espiritullatacmi caicunataca ricuchin.

1 JUAN 4:10

Mana ñucanchicchu Diosta cuyashcanchic, ashtahuanpish Diosmari ñucanchicta cuyashpa, paipac Churita ñucanchic juchacunamanta huañushpa juchacunata pichachun cacharca. Chai cuyaimi tucuimanta yallica.

1 JUAN 2:2

Jesucristoca Dios ñucanchic juchacunata perdonachunmi, ñucanchicpac randi huañurca. Shina huañushpaca mana ñucanchicpac juchacunallamanta ashtahuanpish tucui cai pachapi causaccunapac juchata perdonachunmi huañurca.

HEBREOS 10:14

Paica shuc cutinlla huañushpami, huiñaipac paipaclla caccunata jucha illacta ruhuarca.

HEBREOS 10:10

Ñucanchicta jucha illacta ruhuangapacmi Jesucristoca Dios munashca shina, shuc cutinlla huiñaipac huañurca.

HEBREOS 9:26

Chashna ruhuana cacpica, Apunchic Jesusca cai pachata ruhuashca punzhamanta pacha, tauca cutinmi huañuna canman carca. Ashtahuanpish Apunchic Jesusca cunan punzhacunapica, shuc cutinllami tucui gentecunapac juchacunata anchuchingapac, pai quiquinllatac Diosman curishpa huañurca.

HEBREOS 9:12

Jesucristoca mana chivocunapac, becicunapac yahuarta Diosman cungapacchu Diospaclla chicanyachishca ucuman yaicurca, ashtahuanpish paipac quiquin yahuarta ñucanchicta huiñaita juchapi huatashcamanta cacharichingapacmi shuc cutinlla yaicurca.

DANIEL 9:24

Israelcunapacpish, Diospac acllashcacunapacpishmi canchis chunga semanacunata chicanyachishca tiyacun. Chai semanacunapimi mana cazunatapish, juchata ruhuanatapish saquinga. Shinallatac chai semanacunallapitacmi mana allita ruhuashcatapish pichanga, huiñaita cashcata ruhuanga. Muscuipi shina ricushcatapish, Dios huillachishcatapish sellanga. Shinallatac Diospac caccunata aceitehuan cahuishpa ashtahuan Diospacllata ruhuanga.

ISAÍAS 53:10

Chaica, Mandac Diosmi paita llaquichinata munarca. Ñucanchic juchacunamanta animalta tucui rupachic shina, pai tucushcataca quipa miraicuna ricungami. Shinallatac unaitami causanga. Mandac Dios munashca shinami causanga.

LEVÍTICO 23:27

«Canchis quilla, chunga punzhaca juchata pichana punzhami canga. Chai punzhaca ñucapaclla chicanyachishca tandanacuita ruhuanguichic. Chai punzhapica cumurishpami, Mandac Dios ñucaman ofrendata cushpa, rupachina canguichic.

LEVÍTICO 16:30

Cai punzhaca juchata pichachun Mandac Dios ñucaman animalta cushpa huañuchina punzhami canga. Chai punzhapimari ñucapac ñaupapi cancunaca jucha illac saquiringuichic.

LEVÍTICO 16:33

Chashna churarishpami ñucapaclla chicanyachishca ucutapish, ñucahuan tupana huasitapish, altartapish mapa illacta ruhuanga. Curacunapac juchatapish, tucui israelcunapac juchatapish pichachun animalta ñucaman cushpa huañuchinga.