JOSUÉ 11:12 - Dios Rimashcata Quillcashcami

¹² Shinallatac Josueca chai jatun mandaccunapac tucui pueblocunapi causaccunata chaipi cac tucui jatun mandaccunandimi huañuchirca. Mandac Diosta servic Moisés mandashca shinallatacmi espadahuan huañuchishpa tucuchirca.

JOSUÉ 11:12 Referans Kwoze

DEUTERONOMIO 7:2

Mandac Dios chai llactapi causaccunata cancunapac maquipi churacpimi, tucuita tucuchinguichic. Paicunahuan ama ari ninacunguichicchu, paicunata ama llaquinguichicchu.

JOSUÉ 11:15

Ima shinami Mandac Dios paita servic Moisesta mandashca shinallatacmi Moisesca Josueta mandarca. Mandac Dios Moisesta mandashcataca Josueca imata mana saquishpami tucuita ruhuarca.

JOSUÉ 10:37

Hebrón pueblota japishpaca, chai pueblota jatun mandactapish, chai pueblo cuchulla llactacunapi causaccunatapish tucuimi huañuchirca. Paicunataca espadahuan chugrichishpami shucllatapish mana saquishpa, tucui huañuchirca. Chaipi causaccunapish, Eglón pueblopi causaccunapish, shucllapish mana causac saquirircachu.

JOSUÉ 10:35

Chai punzhallatami chai pueblota japishpa, chaipi causaccunataca espadahuan chugrichishpa huañuchirca. Chai punzhapica Laquis pueblopi causaccunata shinallatacmi chai pueblopi causaccunatapish shucllatapish mana saquishpa, tucui huañuchirca.

JOSUÉ 10:32

Mandac Dios Laquis pueblotapish israelcunapac maquipi churacpimi, cayandi punzha chai pueblota japirca. Shina japishpaca, chaipi causaccunataca Libna pueblopi causaccunata shinallatacmi espadahuan chugrichishpa, shucllatapish mana saquishpa tucui huañuchirca.

JOSUÉ 10:30

Mandac Dios chai pueblopi causaccunatapish, chai pueblota jatun mandactapish israelcunapac maquipi churacpimi, paicunaca chai pueblopi causaccunataca shucllatapish mana saquishpa, tucuita espadahuan chugrichishpa huañuchirca. Chai Libna pueblota jatun mandactaca Jericó pueblota mandacta shinallatacmi huañuchirca.

JOSUÉ 10:28

Josueca chai punzhallatami Maceda pueblota japishpa, chaipi causaccunatapish, chai pueblota jatun mandactapish espadahuan chugrichishpa huañuchirca. Chai pueblopi causaccunata shucllatapish mana saquishpami tucui huañuchirca. Chashna huañuchishpami Maceda pueblota jatun mandactaca Jericó pueblota jatun mandacta shinallatacmi huañuchirca.

JOSUÉ 9:24

Shina nicpimi, paicunaca Josuetaca: —Canta servic ñucanchicca canta Mandac Dios paita servic Moisesman huillashpa, tucui llactacunapi causaccunata tucuchishpa, chai llactacunata cancunaman cusha nishcatami allita yacharcanchic. Chaimantami cancuna ñucanchicta huañuchinata yallita manchashpa chashna ruhuarcanchic.

JOSUÉ 8:31

Mandac Diosta servic Moisés israelcunata mandashca shinallatacmi ruhuarca. Moisés quillcashpa mandashcapica: Mana labrashca, mana fierro tupashca rumihuan shuc altarta ruhuangui. Chai altarpimi Mandac Diosman animalcunata cushpa tucui rupachingui. Shinallatac Dios-huan alli tucungapacpish, animalcunata cushpa rupachingui ninmi.

JOSUÉ 8:8

Ña chai pueblota japishpaca, Mandac Dios mandashca shinallatac rupachinguichic. Riquichic, caicunataca ñucami mandani» nirca.

JOSUÉ 11:13

Ashtahuanpish israelcunaca lomacunapi tiyac pueblocunataca mana rupachircachu. Hazor pueblollatami Josueca rupachirca.

DEUTERONOMIO 9:3

Cunanmi Mandac Dios cancunapac ñaupata tucuita rupachic nina shina ringa. Chai llactapi causaccunata cumurichingami. Paicunataca Mandac Dios nishca shinami, utca tucuchinguichic.

JOSUÉ 10:20

Josuehuan, israelcunahuan amorreocunata chugrichishpa achcata huañuchishpa tucui tucuchicpica, maijancunallami muyundita pircashca pueblopi miticushpa atirca.

JOSUÉ 13:6

Tucui urcu ladopi cac llactacunapish, Libanomanta Misrefot-maim pueblocaman, shinallatac tucui Sidón llactacunami japina tiyanrac. Tucui chai gentecunataca ñucami israelcunapac ñaupamanta llucchishpa cachasha. Canca chai llactacunataca ima shina ñuca mandashca shinallatac suerteta ruhuashpa, israelcunaman chaupishpa cungui.

JOSUÉ 21:44

Mandac Diosca ñaupa taitacunaman ari nishca shinallatacmi tucui chai llacta muyundipi cushilla causaita curca. Shinami tucui israelcunata piñaccunaca maijanpish macanacungapac mana shayarirca. Chai piñaccunataca Mandac Diosmi tucui israelcunapac maquipi churarca.