JEREMÍAS 51:25 - Dios Rimashcata Quillcashcami

²⁵ Mandac Diosca: «Tucui llactacunata tucuchic urculla, cantaca yallitami piñani. Canmi tucui llactacunata tucuchircangui. Ñuca llaquichishpami rumi quingraita singuchisha. Shinami rupashca urcuta saquisha.

JEREMÍAS 51:25 Referans Kwoze

APOCALIPSIS 8:8

Ishcainiqui ángel tocacpica, mama cucha yacumanmi shuc jatun urcu rupacuc shina urmarca. Shina urmacpica, mama cucha yacuca quimsapi chaupishcamanta shuc partemi yahuar tucurca.

ZACARÍAS 4:7

Jatun urculla, Zorobabelpac ñaupapica, ¿imatac cangui? ¡Canca Zorobabelpac ñaupapica pugru pambami tucungui! Paimi ucupi cac rumita llucchinga. Shina llucchicpica: ‘¡Sumacmari, sumacmari!’ nishpami caparinga” ninmi.

JEREMÍAS 50:31

Jatun tucushca llactalla, ñucami canhuanca piñarircani. Ñuca canta ñacachishpa, llaquichina punzhami chayamun. Tucuita Mandac Dios ñucami nini.

JEREMÍAS 51:58

Babilonia llacta muyundi ancho pircapish tucuimi tuñiringa. Jatun pungucunapish uchupami saquiringa. Gentecunaca yangami trabajashca. Ninapi rupachunllami shuctac llacta gentecunapish yallita shaicushca» ninmi.

JEREMÍAS 51:53

Babilonia llacta muyundi pirca jahua pachaman cacpipish, chaimanmi ñuca cachashca piñaccunaca chayanga.

ISAÍAS 13:2

Shitashca urcupi banderata shayachi. Mandaccuna yaicuna punguta soldadocuna yaicuchun sinchita caparishpa maquita alzaichic.

DANIEL 4:30

«¿Manachu cai jatun Babilonia llactataca ñuca alli nishca cangapac, ñuca fuerzahuan shayachircani?» nirca.

JEREMÍAS 51:7

Babilonia llactaca Mandac Diospac maquipica curi copa shinami carca. Chai copa vinohuanmi tucui llactapi causaccunata machachirca. Chaita ubiashpaca tucuimi yuyaita chingachirca.

JEREMÍAS 25:9

cai llactatapish, caipi tucui causaccunatapish, cai muyundi llactacunatapish llaquichichunmi jahua llactapi causaccunata, Babilonia llactata jatun mandac ñucata servic Nabucodonosorta cachasha. Chashna cachashpami tucuita tucuchisha. Paicunataca huiñaita tucuipac mancharina, burlanatami ruhuasha.

GÉNESIS 11:4

Chai quipaca: «Cunanca, shuc pueblotapish, jahua pachaman alto shuc torretapish chayachingapac jacuchic. Shina ruhuashpami, mana caita chaita rishpa, cai pachapica tucui gentecunapac alli nishca causashun» ninacurca.

2 PEDRO 3:10

Shina cashpapish Apunchic Jesús cutimuna punzhaca shuc shuhuac shamuc shinami canga. Jahua pachaca jatun manchanayaipac tulun nishca uyaricpimi chingaringa. Chaipi ima tiyaccunapish ninahuanmi tucuchishca canga. Shinallatac cai pacha allpataca, caipi tiyaccunandimi Dios taripashpa rupachinga.

SALMOS 138:7

Yalli llaquicuna chaupipi puricucpipish canmi ñuca causaita cuidangui. Ñucata piñaccuna yallita piñaricpipish, cambac alli maquihuanmi misashpa quishpichingui.

JEREMÍAS 50:25

Mandac Dios ñucami macanacunata huacaichishca ucuta pascashpa, nina japiric shina piñarishpa macanacunata llucchircani. Tucuita Mandac Dios ñucami caldeocunapac llactapi ñuca ruhuana cashcata ruhuasha.

JEREMÍAS 25:12

Canchis chunga huata tucucpimi, Babilonia llactata jatun mandactapish, chai llactapi causaccunatapish, caldeocunatapish paicuna mana allita ruhuashcamanta llaquichishpa, huiñaita shitashca pambata shina saquisha.