JEREMÍAS 32:41 - Dios Rimashcata Quillcashcami

⁴¹ Ñucaca paicunaman allita ruhuashpami cushicusha. Cai llactataca tucui shunguhuan, tucui almahuanmi tarpuc shina churashpa, maita mana cuyuchipacta ruhuasha.

JEREMÍAS 32:41 Referans Kwoze

JEREMÍAS 24:6

Paicunata cuidashpami, cai llactaman cutin cutichimusha. Chashna cutichimushpaca, mana cutin llaquichishachu. Ñuca tarpushca shina yuracunataca mana cutin sapindi llucchishachu.

SOFONÍAS 3:17

Mandac Diosca cancunapac chaupipimi. ¡Paica quishpichingami! ¡Paica yallita poderyuc Diosmi! Paica cancunamanta yallita cushicungami. Paica cuyacmi, cushicushpa cantangami.

AMÓS 9:15

Paicunapac allpallapitacmi tarpuc shina causachun churasha. Ñuca paicunaman cushca allpamantaca mana pitic shina anchuchishachu. Chaitaca cancunata Mandac Dios ñucami nini» ninmi.

ISAÍAS 62:5

Carihuan manarac chayarishca solterahuan, cunan huiñai moso cazarashca shinami, caipi causaccunapish, canhuan cazarashca shina causanga. Shuc cusa paipac huarmihuan cushicuc shinami, Diospish canhuan cushicunga.

ISAÍAS 65:19

Ñucapish Jerusalenmantami cushicusha. Ñuca acllashcacunahuanmi yallita cushicusha. Jerusalenpica llaquihuan huacashcaca jaicapi mana uyaringachu.

JEREMÍAS 31:28

Ima shinami paicunata sapimanta pilac shina anchuchinata, urmachinata, llaquichinata, tucui chingachinata munarcani. Chashnallatacmi allichishpa shayachinata, tarpuc shina cutin callarichinata munani.

JEREMÍAS 18:9

Cungaillami uchilla llactacunatapish, jatun llactacunatapish tarpuc shina shayachinata huillasha.

DEUTERONOMIO 30:9

Shina causacpimi, Mandac Diosca tucui cancunapac maqui ruhuashcatapish, huahuacunatapish, cancunapac animal mirashcatapish, tucui allpa pucushcatapish achcata mirachinga. Mandac Diosca ñaupa taitacunahuan cushicushca shinallatacmi cancunahuanpish allita ruhuashpa cushicunga.

DEUTERONOMIO 28:63

Mandac Diosca cancunata allita, achcata ruhuashpaca cushicurcami. Chashnallatacmi cancunata llaquichishpapish, tucuchishpapish cushicunga. Cancuna japishca allpamantaca anchuchishcami canguichic.

SALMOS 80:8

Chai llactapi causac runacunata llucchishpa cachashpami, Egiptomanta uvas yuracunata apamushpa tarpurcangui.

ISAÍAS 62:4

Jaicapi mana “Shitashca llacta” ningachu. Llactatapish mana “Llaquinayaita shitashca llacta” ningachu. Ashtahuanpish Dios munashcami cangui. Cambac llactapish Dios-huan cazarashca huarmi nishcami cangui. Mandac Diospac cuyaica canhuanmi canga. Llactaca paihuan cazarashca shinami canga.

MIQUEAS 7:18

Dioslla, saquirishca can acllashcacuna mana allita ruhuashcata perdonashpa, juchacunata cungaricca, ¿pi shuctac Diosta tiyanyari? Canca llaquic cashpami, mana huañui causaita piñaringui.

ISAÍAS 60:21

Tucui gentecunami cashcata ruhuaccuna canga. Llactataca huiñaita causangapacmi japingacuna. Paicunaca ñuca tarpushca yura sapimanta huiñashca yura shinami canga. Ñucata alli ningapacca ñuca maquihuan ruhuashca chagra shinami canga.

EZEQUIEL 36:36

Cancunapac muyundipi causaccunaca tucui urmachishcacunata ñuca cutin shayachishcatapish, shitashca pambapipish ñuca tarpushcatapish yachangami. Mandac Dios ñucami chashna nini. Chaitaca ruhuashatacmi.

OSEAS 14:5

Ñucami israelcunapacca tamya shina casha. Paicunaca lirio sisa shinami canga. Líbano urcupi tiyac cedro yura shinami sapiyanga.