JEREMÍAS 29:10 - Dios Rimashcata Quillcashcami

¹⁰ Cutinllatacmi Mandac Diosca: Cancuna Babilonia llactapi canchis chunga huata cacpimi, cancunata ricuc shamusha. Chaipimi ñuca huillashcata pactachishpa, cancunaman allita ruhuashpa, cai llactaman cutichimungapac risha.

JEREMÍAS 29:10 Referans Kwoze

ZACARÍAS 7:5

«Cai llactapi tucui causaccunatapish, curacunatapish rimashpaca: “Cancuna cai canchis chunga huatacunata, pichca quillapi, canchis quillapi llaquilla tucushpa, ayunashpaca, ¿ñucata yuyarishpachu ayunarcanguichic?

DANIEL 9:2

Daniel ñucaca ima horascaman Jerusalén shitashca saquirinamanta Dios ima nishcata huillac Jeremiasman Mandac Dios huillashpa, quillcashca libropi rezarcani. Canchis chunga huatata chashna shitashca saquirinatami huillacurca.

JEREMÍAS 27:22

Babilonia llactamanmi apashca canga. Ñucallatac ricungapac rishpa, cutichimuna punzhacamanmi chaipi canga. Chai quipaca ñucallatacmi cai pushtullapitac churasha. Chaitaca Mandac Dios ñucami nini» ninmi.

JEREMÍAS 25:12

Canchis chunga huata tucucpimi, Babilonia llactata jatun mandactapish, chai llactapi causaccunatapish, caldeocunatapish paicuna mana allita ruhuashcamanta llaquichishpa, huiñaita shitashca pambata shina saquisha.

SOFONÍAS 2:7

Chai allpaca maijan saquirishca Judapac huahuacunapacmi canga. Chaipimi michinga. Tutaca Ascalón llacta huasicunapimi sueñunga. Paicunata Mandac Dios ricurishpami prezumanta cutichimunga.

JEREMÍAS 27:7

Tucui llactacunami paita, paipac churita, paipac nietota servishpa causanga. Babilonia llactaman yalli llaqui huatacuna chayamungacamanmi chashna causanga. Quipaca Babiloniapi causaccunapish shuctac llactacunata jatun mandaccunatami servishpa causanga.

2 CRÓNICAS 36:21

Mandac Diosca paicunata cashna llaquichinataca Dios ima nishcata huillac Jeremiastami huillachishca carca. Paicunata chai llactaman apacpimi, Judá llactaca canchis chunga huatacunacaman sumacta samarirca.

RUT 1:6

Noemica Moab llactapi cashpami: “Mandac Diosca pai acllashcacunata llaquishpami cutinllatac granota pucuchi callarishca” nicta uyarca. Shina uyashpami paipac ishcai nueracunandi Moab llactamanta cutirca.

2 CRÓNICAS 36:22

Persia llactata jatun mandac Ciro ña shuc huatata mandacucpimi, Mandac Diosca Jeremiasman huillachishca pactachun, Mandac Diosllatac Persia llactata jatun mandac Ciroman yuyaita cushpa, pai mandacuc tucui llactacunapica shimillahuanpish, quillcacunahuanpish cashna huillachun mandarca:

ESDRAS 1:1

Jatun mandac Ciro Persia llactata shuc huatata mandacucpimi, Mandac Diosca Jeremiasman huillachishca pactachun, Persia llactata jatun mandac Ciroman yuyaita curca. Chashna yuyaita cucpimi, jatun mandac Ciroca huillashpapish, quillcaccunata cachashpapish pai mandacuc tucui llactacunapi causaccunaman huillachishpaca:

JEREMÍAS 25:11

Tucui cai llactami manchaipac shitashca pamba canga. Cai llactapi causaccunaca canchis chunga huatatami Babilonia llactata jatun mandacta servinga.

JEREMÍAS 29:28

Paica Babilonia llactapi causaccunaman quillcashpaca: ‘Chai llactapica unai huatatami prezu causagringuichic. Huasicunata shayachishpami, chaipi causaichic. Huertacunata ruhuashpa, chaipi pucushcata micuichic’ nishpami cacharca” ningui» nirca.

JEREMÍAS 29:32

Chaimantami Mandac Dios ñucaca: Nehelam llactamanta Semaiastapish, paipac huahua huahuacunatapish llaquichigrinimi. Paicunapuramantaca shucllapish cai gentepurapica mana saquiringachu. Ñuca acllashcacunaman ñuca ima mana allita ruhuactaca pipish mana ricungachu. Chaica, Mandac Dios ñucata mana cazuchun huillashcamantami chashna tucunga” nishpa quillcai. Chaitaca Mandac Dios ñucami nini» nirca.

JEREMÍAS 30:3

Ñuca acllashca israelpuramanta, Judá llactapi causacpuramanta prezu apashcacunata cutichimuna punzhami chayamucun. Paicunapac ñaupa taitacunaman ñuca cushca llactamanmi pushamusha. Chaipimi causanga. Chaitaca Mandac Dios ñucami nini» nirca.

JEREMÍAS 33:14

Mandac Diosca: Riquichic, israelcunaman, Judá llactapi causaccunaman, ñuca imata ruhuasha nishcata pactachina punzhacunami chayamugrin.

ZACARÍAS 1:12

Shina nicpimi, Mandac Diospac angelca: —Tucuita Mandac Dioslla, Jerusalenpi, Judá llacta pueblocunapi causaccunahuanca canchis chunga huatacunatami piñashca cangui. ¿Ima horascamantac mana llaquishpa piñacunguilla?— nirca.

ESDRAS 1:2

Persia llactata jatun mandac Ciroca: «Jahua pachata Mandac Diosmi tucui cai pachapi tiyac llactacunata mandachunpish, shinallatac Judá llactapi cac Jerusalenpi Diospac huasita shayachichunpish mandarca.

SALMOS 102:14

Canta serviccunaca pueblo urmashca rumicunatami cuyacun! Chai pueblo ñuto allpatami llaquincuna.

EZEQUIEL 11:17

Chaimanta canca: “Mandac Diosca: Caita, chaita rishpa, causacucpimi, chai llactacunamanta tandachishpa, Israel llactata cusha.