JEREMÍAS 2:18 - Dios Rimashcata Quillcashcami

¹⁸ Cunanca, Egiptopi tiyac Nilo yacuta ubiangapac cutishpaca, ¿imatatac llucchinguichic? Asiria llacta Eufrates yacuta ubiangapac cutishpaca, ¿imatatac llucchinguichic?

JEREMÍAS 2:18 Referans Kwoze

JOSUÉ 13:3

Egiptomanta inti llucshina ladoman cac Sihor yacumanta jahua Ecrón pueblocamanmi tiyanrac. Chai allpaca, cananeocunapacmi nincuna. Gaza, Asdod, Ascalón, Gat, Ecrón pueblocunami tiyanrac. Aveocunapac llactapish tiyanracmi.

OSEAS 7:11

Efraín ailluca paloma shinami imatapish mana yachac tucushca. Chaimantami Egiptopi causaccunatapish, Asiria llactapi causaccunatapish ayudachun mañan.

JEREMÍAS 2:36

¿Ima nishpatac ñanpi caiman chaiman callpacunguiyari? Asiria llactata jatun mandac pingaichishca shinallatacmi Egipto llactata jatun mandacpish cantaca pingaichinga.

ISAÍAS 31:1

¡Aij, Egiptopi causaccunata ayudai ningapac urai riccunalla! ¡Aij, caballocunapi ric soldadocunapi, achca carretacunapi, sinchi caballocunapi shunguta churashpa “paicunaca ayudangallami” nishpa yuyaccunalla! Shina yuyacushpapish, israelcunapac jucha illac Diostaca mana yuyarincunachu. Mandac Diospac ayudata mana mañancunachu.

OSEAS 5:13

Efraín ailluca ungüihuanmi llaquichishca canga. Judá llactapi causaccunataca sisu ungüimi tucuchinga. Chaimantami Efraín ailluca Asiria llactata jatun mandac Jarebman huillachun cachanga. Shina ricpipish, sisu ungüitaca mana jambingachu.

EZEQUIEL 17:15

Chashna ari nishca cashpapish mana cazushpami, maijan huillaccunata Egipto llactapi caballocunatapish, achca runacunatapish mañachun cacharca. Chashna ruhuashpaca, ¿allichu causanga? Ari nishcata paquic runaca, ¿quishpiringachu?

LAMENTACIONES 4:17

Ñucanchicta ayudacta chapacucllapitacmi ñahuipish amsayan. Mana ayudanata pudic llactatami torre jahuaman huichicushpa chapacushcanchic.

ISAÍAS 7:20

Chai punzhapica Mandac Diosca Eufrates yacu lado llactapi alquilashca navajahuanmi cancunata uma acchatapish, barbastapish, chaqui millmatapish pitinga. Chai navaja shinaca Asiria llactata jatun mandacmi canga.

ISAÍAS 23:3

Nilo yacu patapi pucushca chagracunatapish, chai yacu chimba ladopi pucushca granotapish apamuc carca. Chaimantami Tiro llactapi causaccunaca achca cullquita japic carca.

EZEQUIEL 16:28

Chashna huainayashpapish mana amirishpami, asiriocunahuanpish huainayarcangui. Paicunahuan huainayashpapish mana amirircanguichu.

2 CRÓNICAS 28:16

Chai punzhacunapimi jatun mandac Acazca Asiria llactata jatun mandaccunata ayudac shamuchun nichun cacharca.

JEREMÍAS 31:22

Mana cazuc soltera shina Israel-lla, ¿ima horascamantac caita chaita puricunguilla? Mandac Dios ñucami cai llactapica mushucta ruhuasha. Huarmica cusapac ladomanmi shamunga» ninmi.

LAMENTACIONES 5:6

Micunata charingapacca Egipto llactapi, Asiria llactacunamanmi maquita chutashpa mañanchic.

EZEQUIEL 23:30

Shuctac llactapi causaccunahuan huainayashcamanta, paicunapac ruhuashcalla dioscunata adorashpa mapayashcamantami cai llaquicunaca japinga.