Biblia Todo Logo
Bib sou entènèt

- Piblisite -




JEREMÍAS 15:15 - Dios Rimashcata Quillcashcami

15 Mandac Dioslla, canca tucuitami yachangui. Ñucata yuyarishpa, ayudangapac shamuiyari. Ñucata piñaccunata ñucata llaquichishca shinallatac llaquichiyari. Ama ashtahuan piñacuillachu. Ñucaca canmantami yalli llaquita apacuni.

Gade chapit la Kopi




JEREMÍAS 15:15
42 Referans Kwoze  

Mandac Dioslla, ashtahuanpish ñucataca ricsinguimi. Cambac ñaupapi ñuca shungu alli cactapish, canllatac yachanguimi. ¡Paicunataca ovejacunata huañuchingapac apac shina, huañuchina punzhapac chicanyachiyari!


Ñucata caticushcamantami, tucui gentecunapac piñashca canguichic.


Tucuita Mandac Dioslla, cashcata ruhuaccunataca ricuracunguimi. Yuyaitapish, shungutapish tucuitami ricungui. Ñucata llaquichiccunataca cambac maquipimi churani. Ñucata llaquichishcamantaca paicunatapish ñuca ricucucpi llaquichiyari.


Ashtahuanpish ñucaca paicunata can llaquichichunca mana munarcanichu. Paicunaman jatun llaqui punzha chayachunpish mana munarcanichu. Chaitaca canllatac yachanguimi. Ñuca imata rimashpapish, cambac ñaupallapitacmi rimarcani.


Chai quipami samana punzhaca Diospaclla chicanyachishca punzha cachun levitacunataca Diospaclla tucushpa, pungucunapi cuidac shamuchun mandarcani. Ñuca: «¡Dioslla, ñuca chashna ruhuashcacunataca yuyaringuiyari! ¡Canca llaquicmi cangui! ¡Chaimanta ñuca mana allita ruhuashcacunataca cungaringuiyari!» nircani.


Ñucamantami tucui gentecunapac piñashca canguichic. Maijanpish tucuringacaman llaquita apacmi quishpiringa.


Ñuca caparishpa huacashpaca: «Yalli llaquichinallata, tucurinallatami» huillacuni. Mandac Dioslla, can rimashcata huillacpica, punzhantami rimashpa, pingaichishpa asincuna.


¿Canta servicca ima horascamantac causagrinyari? ¿Ima horastac ñucata llaquichiccunataca llaquichigringuiyari?


Mandac Dioslla, can acllashcacunaman allita ruhuashca shinallatac ñucatapish yuyariyari. Ñucata quishpichingapac shamuiyari.


«Ñuca Dioslla, cai llactapi causaccunaman cai tucui allicunata ruhuashcamantaca ñucamanpish allita ruhuangapac yuyaringuiyari» nircani.


¡Chai pueblota tucuchishcamantaca Diospaclla caccunapish, Jesusmanta huillachun acllashcacunapish, Diosmanta ñaupa huillaccunapish, shinallatac jahua pachapi tucui causaccunapish cushicuichic! Cancunata llaquichic cashcamantami Diosca chai pueblotaca chashna llaquichishca.


Chaimanta sinchita caparishpaca: «Tucuita Mandac, jucha illac Dioslla, allpa pachapi causaccunataca, ¿ima punzhacamantac ñucanchicta huañuchishcamantaca taripashpa llaquichigringuiyari?» nircacuna.


Fierrocunata allichishpa causac Alejandroca ñucata mana allita ruhuashpami llaquichirca. Pai chashna ruhuashcamantaca, Diosmi paitapish llaquichinga.


Apunchic Jesustaca manchana cashcata yachashpami, gentecuna Dios-huan alli tucuchun nishpa huillacunchic. Ñucanchic ima shina cashcataca Diosca allimi yachan. Chaitaca cancunapish yachachunmi munani.


Cuyashca criccuna, cancunata maijan llaquichicpica, ama cancunallatac llaquichinata yuyaichicchu, ashtahuanpish Dios llaquichichun saquinguichic. Chaica, Dios quillcachishcapica: «Llaquichina cacpica, ñucami llaquichisha. Paicuna japina cashcatami cusha» ninmi.


Maijanpish ñucata catingaraicu huasita, huauquicunata, panicunata, taita mamata, huarmita, huahuacunata, allpata saquicca, chaicunamanta patsac yallihuanmi japinga. Huiñai causaitapish japingami.


Jeremiasca Ñucaca: «¡Aij, ñuca mamitalla! ¡Tucui llactapi causaccunahuan piñanacushpa, rimanacuchunmi ñucataca sajuarishcangui! Piman cullquita mana mañarcanichu, shinallatac mana mañachircanichu. Shina cacpipish, ñucataca mana alli nishpami rimacun.


«Mandac Dioslla, cambac ñaupapi mana llullashpa, tucui shunguhuan canta cazushpa causashcatapish, cambac ñaupapi allita ruhuashpa causashcatapish yuyariyari» nishpami, yallita llaquirishpa huacarca.


Chashna ruhuacpimi ñucaca: «Ñuca Dioslla, ama ñuca causana chaupi punzhacunata quichuichu. ¡Cambac huatacunaca huiñai huiñaitami can!»


Ama ashtahuan ñucata piñarishpa chapaichu. Ñucaca cushicuitami japisha. Causaitaca amarac quichuichu» nircani.


Canca ñuca shungutaca tucuitami ricushcangui. Tutapish ricungapac shamushcanguimi. Ñuca alli cacta, mana alli cacta taripashpapish, ima mana allitaca mana tarishcanguichu. Ñuca shimihuan cambac contra mana rimangapacmi yuyarircani.


Canca, ñuca mana juchayuc cashcatapish, cambac maquimanta pi mana quishpichi pudishcatapish canllatacmi yachangui.


Ima horas Diosman cuna yantata, punta pucushca granota cunatapish allichircanimi. «¡Ñuca Dioslla, ñuca chashna ruhuashcamantaca ñucamanpish allita ruhuanata yuyaringuiyari!»


Chaimantami ñucaca: «¡Ñuca Dioslla, Sanbalatpish, Tobiaspish caicunata ruhuashca shinallatac paicunata yuyari! ¡Noadías huarmipish, caishuc huillaccunapish ñucata manchachishpa pandachisha nishcatapish ama cungaringuichu!» nircani.


¿Pitac ñucanchictaca Cristopac cuyaimantaca anchuchinga? ¿Llaquicuna? ¿Yarcai? ¿Llaquichishpa caticcuna? ¿Churana illai? ¿Huañui, mana cashpaca espada?


Chaipimi Sansonca Mandac Diostaca: —¡Mandac Dioslla, ñucata yuyariyari! Filisteocuna ñuca ñahuicunata llucchishcamanta paicunatapish tucuchingapac cutinllatac ñucaman fuerzata cuiyari— nishpa mañarca.


Ashtahuanpish cambac cashcamantami punzhanta huañuchishun nishca causanchic. Huañuchina ovejacunata shinami charincuna.


Cantaca gentecunapac ñaupapi jatun bronce pirca shina cachunmi churasha. Canhuan macanacungapac shamushpapish mana mishai pudingachu. Mandac Dios ñucami, canta cuidashpa quishpichingapac canhuan casha.


Ashtahuanpish Mandac Diosca sinchi macanacuc soldado shinami ñucataca cuidan. Chaimantami ñucata llaquichiccunaca mitcaric shina pandarishpa mana mishai pudinga. Imapish mana alli llucshicpimi, yallita pingai tucunga. Paicuna pingai tucushcataca jaicapi mana cungaringacunachu.


Mandac Dioslla, paicuna ñucata huañuchingapac yuyaricushcataca yachanguimi. Paicunapac juchacunata ama cungaringuichu. Paicuna mana allita ruhuashcataca ama perdonanguichu. ¡Paicuna cambac ñaupapi urmachun, nina japiric shina piñariyari!


Mandac Dioslla, paicuna ima mana allita ruhuashca shinallatac llaquichiyari.


Mandac Dioslla, catishpa llaquichiyari. ¡Cai pachamanta chingachiyari!


Swiv nou:

Piblisite


Piblisite