JEREMÍAS 10:10 - Dios Rimashcata Quillcashcami

¹⁰ Ashtahuanpish Mandac Diosca cashcata nic Diosmi. Paica huiñaita Mandac, causac Diosmi. Pai yallita piñaricpica, allpapish chucchunmi. Shuctac llactacunapi causaccunapish pai piñaricpica, mana causai pudincunachu.

JEREMÍAS 10:10 Referans Kwoze

DEUTERONOMIO 32:4

Paica jatun Rumi shina Diosmi. Paipac ruhuashcaca tucui allimi. Pai ruhuashcaca allita ruhuashcami. Paica cashcata nic Diosmi. Paipica ima mana allica mana tiyanchu. Paica cashcata ruhuacmi.

ISAÍAS 57:15

Huiñaita jahua pachapi causac, tucuita yalli, jucha illac Diosca: «Ñucaca jucha illac jahua pachapimi causani. Shina cashpapish, cushichishpa causaita cungapacmi llaquilla causaccunahuan, shungupi llaquilla caccunahuan cani. Llaquichishca causaccunapac shungutapish cushichinimi.

SALMOS 76:7

Canca manchana Diosmi cangui. Can piñaricpica, ¿pitac cambac ñaupapi tiyacui pudingayari?

NAHÚM 1:6

Pai piñaricpica, ¿pitac paipac ñaupapi shayaringayari? Nina japiric shina pai piñaricpica, ¿pitac paipac ñaupapi cai pudingayari? Nina talliricuc shinami paica yallita piñarin. Jatun rumicunapish chaupirinmi.

SALMOS 42:2

Ñuca almaca yacunayaihuan huañucuc shinami, causac Diosta mashcan. ¿Ima horastac Diospac ñaupapi ricuringapac rishayari?

SALMOS 100:5

Chaica Mandac Diosca allimi. Paica huiñaitami cuyacun. Pai ima nishcataca huiñaita pactachicungallami.

APOCALIPSIS 20:11

Chai quipaca shuc jatun yuranlla mandashpa tiyarinapi shuc tiyacuctami ricurcani. Paipac ñaupamantaca cai pachapish, jahua pachapish tucui chingarishpami maipi mana ricurirca.

SALMOS 31:5

Cambac maquipimi ñuca espirituta mingani. Cashcata nic, ñucata Mandac Dioslla, canmi quishpichircangui.

SALMOS 10:16

¡Mandac Diosca huiñaita jatun mandacmi! Paipac allpamantaca mana cazuccunaca chingaringami.

SALMOS 18:7

Pai piñaricpica, cai pachaca mancharinatami chucchurca. Jatun urcu callari rumicunapish chucchurcami.

1 JUAN 5:20

Diospac Churi shamushpa ñucanchicman yuyaita cushpami, cashcata nic Diostaca ricsichirca. Chaimantami cashcata nic-huan shuclla causanchic. Paica Diospac Churi Jesucristomi. Paillatacmi huiñai causaita cucpish, shinallatac cashcata nic Diospish can.

HEBREOS 10:31

¡Causac Diospac maquimanta urmanaca yalli llaquimi!

1 TIMOTEO 1:17

¡Chaimanta huiñaita causacuc Jatun Mandac, jaicapi mana chingaric, pipish mana ricushca, shuclla Diostaca, huiñai huiñaita “allimari cangui, sumacmari cangui” nishunchicyari! Chashna cachun.

1 TESALONICENSES 1:9

Chaipac randica, paicunallatacmi ñucanchicta cancuna ima shina chasquishcata, ruhuashcalla dioscunata saquishpa, causac Diostatac servi callarishcata parlancuna.

HECHOS 14:15

yaicushpaca: —¿Imapactac chashna ruhuashun ninguichic? Ñucanchicca cancuna shina runallami canchic. Ñucanchicca cai yangalla ruhuanata saquishpa, causac Diosman cutirichunmi, alli huillaita huillangapac shamurcanchic. Paica jahua pachatapish, cai pachatapish, mama cuchatapish, tucui ima tiyactapish ruhuacmi.

MALAQUÍAS 3:2

Pai shamucpica, ¿pitac ricuri pudingayari? Pai ricuricpica, ¿pitac paipac ñaupapi shayari pudingayari? Paica chuyayachic nina shina, tacshana lejía shinami.

HABACUC 3:6

Pai shayaricpica, cai pachami chucchun. Pai ricucpica, llactacunami manchan. Ñaupa huatacunapi tiyac urcucunapish tuñirinmi. Lomacunapish urmanmi. Paipac ñancunaca huiñaicamanmi.

MIQUEAS 1:4

Pai sarucpica, urcucunapish, pambacunapish ninapi cera yacuyac shinami yacuyashpa ucuyanga. Jahuamanta yacu talliricuc shinami talliringa.

SALMOS 146:6

Diosca jahua pachatapish, cai pachatapish, mama cuchatapish, chaicunapi tucui tiyaccunatapish ruhuacmi. Paica huiñaita cashcata nicmi.

SALMOS 145:13

Can mandanaca huiñai huiñaitami. Can mandashpa causanaca huahua huahuacunacamanmi.

SALMOS 114:7

Jacobopac Mandac Diospac ñaupapica allpaca chucchunmi.

SALMOS 104:32

Pai allpata ricucpica chucchunmi. Urcucunapi tuparicpica cushninmi.

SALMOS 97:4

Paipac relampacunaca tucui cai pachatami achicyachin. Chaita ricushpami allpaca chucchun.

SALMOS 93:2

Can mandanaca ñaupamanta pachami sinchi tiyacun. Canca huiñaita causac Diosmi cangui.

SALMOS 90:11

¿Pitac can yallita piñarishca ima shina cashcata yachan? ¿Pitac yallita piñarishcataca entendinyari?

SALMOS 84:2

Ñuca almaca Mandac Diospac huasi pungupi canatami yallita munan. Ñuca shungupish, ñuca cuerpopish cushicushpami causac Diosta cantan.

SALMOS 77:18

Canca acapana huairapimi tulun nishpa uyarircangui. Cai pachatapish cambac relampahuanmi achicyachircangui. Allpapish manchaihuanmi chucchurca.

JOB 9:6

Paimi allpatapish maipi cashca pushtumanta cuyuchin. Allpata charicuc pilarcunatapish Paimi chucchuchin.

2 CRÓNICAS 15:3

Israelcunaca unaitami causac Dios illac, yachachic curacuna illac, Dios mandashcacunapish illac causarcacuna.

1 REYES 18:39

Chaita tucui gentecuna ricushpa, allpacaman cumurishpaca: «¡Mandac Diosca, Diostacmi! ¡Mandac Diosca Diostacmi!» nircacuna.

1 SAMUEL 17:36

Canta servic ñucaca leonta cashpa, osota cashpa huañuchicllami carcani. Circuncisionta mana ruhuashca filisteo runaca causac Diospac soldadocunatami rimashpa llaquishca. Chaimanta paitapish chai animalta shinallatacmi huañuchisha— nirca.

1 SAMUEL 17:26

Shina cacpimi, Davidca paipac ladopi caccunataca: —Cai filisteo runata huañuchishpa, israelcunata llaquichishpa rimacta tucuchicpica, ¿imatatac cunga? Causac Diospac soldadocunata llaquichic mana circuncisionta ruhuashca filisteo runaca, ¿imatacyari?— nirca.

JUECES 5:4

Mandac Dioslla, can Seir urcumanta llucshimucpipish, Edom pambamanta shamucpipish allpaca chucchurcami. Jahua pachamantapish tamya urmarcami. Puyumantapish tamyata shutuchircami.

DEUTERONOMIO 5:26

Chaica, ¿pi shuctac runacunata causac Dios nina chaupimanta rimashcata uyashpaca causacungayari?

1 TIMOTEO 6:17

Cai pachapi achcata chariccunataca: “Ama jatun tucushpa, chingarinalla charishcapi ama shunguta churangui” nishpa rimangui. Chaipac randica, ñucanchicman imallatapish atic aticta cushpa cushichic Diospi shunguta churachun ningui.

SAN JUAN 17:3

Cai huiñai causaitaca, shuclla Dios cashcata crishpa, Jesucristoca Dios cachashca cashcata crishpami chasquinga.

SAN MATEO 26:63

Ashtahuanpish, Jesusca imata mana nircachu. Chaimantami mandac curaca: —Causac Diospac shutipi huillai. ¿Canchu Diospac Churi Cristoca cangui?— nirca.

SAN MATEO 16:16

Shina tapucpimi Simón Pedroca: —Canca causac Diospac Churi, Quishpichic Cristomi cangui— nirca.

HABACUC 3:10

Canta ricushpaca urcucunapish mancharircami, yacu jundashcapish yallircami. Manchana jatun jutcupish caparircami. Mama cuchapish jahuata alzarircami.

JOEL 2:11

Mandac Diosca paipac soldadocunapac ñaupapimi mandacun. Paipac soldadocunaca achcami. Pai mandashcacunaca llaquimi. Mandac Dios shamuna punzhapica, jatun llaquimi tiyanga. Chai jatun llaquitaca, ¿pitac apai pudingayari?

DANIEL 7:14

Paimanmi llactata mandanatapish, podertapish curca. Tucui llactapi causaccunapish, llactapi causaccunapish chican chican rimaita rimaccunami paita servicurca. Paipac mandanaca jaicapi mana tucuric, huiñaita mandana cashcata, mana taripac mandana cashcatami ricurcani.

DANIEL 6:26

Ñucaca tucui ñuca mandana llactacunapi causaccuna Danielpac Diospac ñaupapi manchaihuan pagui nichunmi mandani. Paica huiñaita causac Diosmi. Pai mandanaca mana tucuringachu. Huiñaita mandacungallami.

DANIEL 4:34

Chai nishca punzhacuna pactacpimi, Nabucodonosor ñucaca jahua pachata huichailla ricurcani. Chashna ricushpami, cutin yuyaita japircani. Chaimantami jahua pachapi huiñaita causac Diostaca: “Huahua huahuacunata jatun mandac, sumaimanami cangui nishpa alli nircani.

DANIEL 4:3

¡Pai mancharinacunata, pi mana ruhuaipacta ruhuashcaca mai sumacmi! Paica huiñai huiñaitami mandacunga. Quipa huahua huahuacaman mandacungallami.

JEREMÍAS 23:36

Cancunaca jaicapi: “Mandac Diosmi huillachun nirca” nishpaca, ama ninguichicchu. Chaica maijanpish chai rimashcata huillacpica, chai huillashcaca llashac carga shinami tucunga. Causac Diospac, tucuita Mandac ñucanchic Diospac rimashcata mana allita ruhuashcamantami chashnaca tucunga.

ISAÍAS 37:17

Mandac Dioslla, cambac ringrihuan uyaiyari. Mandac Dioslla, cambac ñahuita pascashpa ricuiyari. Senaquerib causac Diosta camishpa rimachun cachashcata uyaiyari.

ISAÍAS 37:4

Asiria llactata jatun mandac quipa mandacta Mandac Diosta camishpa rimarishcata uyashpa, llaquichishca cashpachari alli canman. Chaimanta cunanca, caipi maijan saquirishcacunamanta Mandac Diosta mañaiyari” ninmi— nirca.

SALMOS 68:11

Mandac Diosmi huillachun mandarca. Chaita achca huarmicuna huillashpaca:

GÉNESIS 21:33

Abrahamca Beerseba pambapimi tamarisco yurata tarpurca. Chaipimi huiñaita causac Mandac Diosta mañarca.

1 REYES 8:60

Chashna ruhuacpimi, cai pachapi tiyac tucui llactacunapi causaccunaca shuctac Dios mana tiyashcata, ashtahuanpish Mandac Dioslla, Dios cashcata yachangacuna.

SALMOS 29:10

Mandac Diosca yacu juizhu jahuapimi tiyarirca. Huiñaitami jatun mandaccunapac tiyarinapi tiyacun.

SALMOS 68:8

Chashna shamucpica, allpaca chucchurcami. Jahua pachamantapish tamya urmarcami. Sinaí urcupish israelcunapac Diospac ñaupapica chucchurcami.

SALMOS 90:2

Urcucuna manarac tiyacpi, shinallatac cai pachatapish manarac ruhuashpami canca ña tiyashcangui. Ñaupamanta huiñaicamanmi Dios cangui.

ISAÍAS 40:15

Diosmanca gentecunaca baldepi tamya urmacuc shinami. Ñuto allpata balanzapi churashca shinami. Riquichic, islacunataca ñuto allpata shinami pezan.

ISAÍAS 65:16

Maijanpish cai pachapi bendicionta mañashpaca, cashcata nic Diosmantami japinga. Maijanpish cai pachapi ari nicca cashcata nic Diosmantami ari ninga. Utcapi tiyashca llaquica illangami. Ñuca ñaupapica mana ashtahuan ricuringachu.

JEREMÍAS 4:2

Mandac Dios ñucapac shutipi ari nishpaca, mana llullashpa cashcata nichic. Shina ruhuacpica, shuctac llactacunapi causaccunapish, ñucamantami bendiciashca canga. Ñucahuanmi cushicunga.

JEREMÍAS 4:24

Urcucunata ricucpica chucchucurcami. Lomacunapish cuyuricurcami.

JEREMÍAS 50:46

Babilonia llactata llaqui japicpi, caparinacushcaca allpata chucchuchingami. Chashna caparishcaca, tucui llactacunamanmi uyaringa nini» ninmi.

JEREMÍAS 51:29

Mandac Diosca Babilonia llactata tucuchishpa pipish mana causana shitashca pambata ruhuangapac yuyarishcataca pactachigrinmi. Chaimantami cai pachaca cuyurishpa chucchunga.

JOSUÉ 3:10

Cancunaca caita ricushpami, causac Dios cancunapac chaupipi cashcataca yachanguichic. Paimi cunanca cananeocunatapish, heteocunatapish, heveocunatapish, ferezeocunatapish, gergeseocunatapish, amorreocunatapish, jebuseocunatapish cancunapac ñaupamanta llucchishpa cachanga.

1 CRÓNICAS 29:11

Mandac Dioslla, jatun canapish, tucuita ruhuanapi sumaimana canapish, tucui mandanapish, tucuipac alli nishca canapish cambacmi. Jahua pachapi ima tiyashcapish, cai pachapi ima tiyashcapish cambacmi. Mandac Dioslla, tucuita mandanapish cambacmi. Tucuita yallimi cangui.

SALMOS 9:8

Paimi cai pachapi causaccunataca cashcata ruhuashpa taripanga. Shinallatac cashcata ruhuashpami mandanga.

SALMOS 74:12

Shina cashpapish Dioslla, ñaupa punzhacunamantami ñuca jatun mandac cangui. Canmi cai pachapica jatun macanacuita atishpa quishpichic cangui.

SALMOS 76:8

Jahua pachamantami llaquichinata huillarcangui. Shina huillacpica, tucui cai pachapi causaccunami mancharishpa upalla saquirirca.

SALMOS 100:3

Mandac Diostaca, Dios cashcata ricsichicyari. Paimi ñucanchictaca ruhuarca. Ñucanchicca mana ñucanchicllatac ruhuarircanchicchu. Pai acllashca gentecunami canchic. Paipac michina pambapi micuc ovejacunami canchic.

ISAÍAS 40:28

Huiñaita causac Diosca Mandac Diosmi. Chaitaca, ¿manachu yacharcanguichic? ¿Manachu uyashcanguichic? Paimi tucui cai pachataca ruhuarca. Paica mana shaicunchu, mana fuerza illac saquirinchu. Paipac yuyaitaca pi mana yachai pudinchu.

DANIEL 6:27

Paillatacmi quishpichicpish, cacharichicpish can. Jahua pachapipish, cai pachapipish pi mana ruhuaipaccunata ruhuashpami ricuchin. Paimi leoncuna causana jutcupica cuidarca» nishpami quillcarca.

NAHÚM 1:5

Paipac ñaupapica, urcucunapish chucchunmi, lomacunapish yacuyanmi. Allpapish, cai pachapish, tucui chaipi causaccunapish cuyurinmi.