ISAÍAS 1:23 - Dios Rimashcata Quillcashcami

²³ Mandaccunapish mana cazuncunachu. Shuhuaccunahuan apanacuccunami tucushca. Tucui paicunami cullquita pacalla japinallata munancuna. Imatapish pacalla cuchunllami munancuna. Taita mama illac huahuacunatapish, viuda huarmicunatapish mana ayudanchu.

ISAÍAS 1:23 Referans Kwoze

MIQUEAS 7:3

Paicunapac maquica ima mana allita ruhuangapac yachachishcami. Jatun mandaccunaca mana allita ruhuangapacmi imatapish cuchun mañacun. Juezcunaca imata pacalla japishpami mandan. Mandacpish, paipac shungu munashcatami riman. Chashnami allita ruhuanataca saquin.

ZACARÍAS 7:10

Viuda huarmitapish, taita mama illactapish, caru llacta runatapish, huacchatapish ama llaquichinguichicchu. Ama quiquin huauquicunata ucu shungupi piñanguichicchu” nini» nirca.

ÉXODO 23:8

Ama agradota japinguichu. Chai agradoca cashcata ruhuac runatapish, alli runatapish ñahuita quillpac shinatami ruhuan.

SAN LUCAS 19:46

“Dios quillcachishcapica: ‘Ñuca huasica, ñucata mañana huasimi canga’ ninmi. Ashtahuanpish cancunaca shuhuaccuna miticuna machaitami ruhuashcanguichic” nirca.

MALAQUÍAS 3:5

Tucuita Mandac Diosca: «Chaipimi brujocunatapish, huainayaccunatapish, llullashpa ari niccunatapish taripashpa llaquichisha. Cullquimanta trabajaccunata, viuda huarmita, taita mama illac huahuacunata, caru llacta runacunata llaquichishpa, ñucata mana manchashpa causaccunatapish llaquichisha» ninmi.

ISAÍAS 3:14

Mandac Diosca pushac yuyaccunatapish, pai acllashca llactata mandaccunatapish llaquichingapacmi shamunga. Paicunataca: “Cancunami uvas chagracunata quichushpa micurcanguichic. Huacchacunamanta imata quichushpaca huasipimi charicunguichic.

MARCOS 11:17

Jesusca chaipi caccunataca yachachishpaca: —Dios quillcachishcapica: “Ñuca huasica tucui llactamanta shamuccuna ñucata mañana huasimi canga” ninmi, ashtahuanpish cancunaca shuhuaccuna miticuna machaitami ruhuashcanguichic— nirca.

SAN MATEO 21:13

tigrachishpaca: «Dios quillcachishcapica: “Ñuca huasica, ñucaman mañana huasimi” ninmi. Ashtahuanpish cancunaca shuhuaccuna miticuna machaitami ruhuashcanguichic» nirca.

MIQUEAS 3:11

Juezcunaca pacalla imata japishpami, ima llaquitaca allichin. Curacunaca cullquimantami yachachin. Huillaccunapish cullquimantami yachac tucushpa huillan. Chashna ruhuacushpapish Mandac Diostami yuyarinchic nishpaca: “¿Manachu Mandac Diosca ñucanchic-huan? ¡Ima llaquipish ñucanchictaca mana japingachu!” nincunami.

OSEAS 9:15

Mandac Diosca: «Paicuna mana allita ruhuashcataca Gilgalpi ricunallami. Chaipimi paicunataca mana ricunayachircani. Paicuna yalli mana allita ruhuashcamantami, ñuca huasimanta llucchishpa cachasha, mana ashtahuan cuyashachu. Paicunata tucui mandaccunapish mana cazuccunami.

OSEAS 4:18

Paicunaca machana yacu tucuricpipish, huainayashpami catin. Paicunata mandaccunapish pingaichishca canatami ashtahuan munan.

JEREMÍAS 22:17

Shina cacpipish, cambac ñahuipish, cambac shungupish shuccunata llaquichishpa, yallita chayucyanallatami munan. Shinallatac mana faltayuc runata yahuarta jichanallata, llaquichinallata, millaita ruhuanallatami munan. Chaitaca Mandac Dios ñucami nini» ninmi.

JEREMÍAS 5:5

Cunanca yachaccunapacman rishpa, paicunahuan parlasha. Paicunaca Mandac Dios mandashcatapish, pai taripashpa llaquichinatapish yachancunami. Ashtahuanpish paicunapish yugota paquishpami, coyundatapish pitirca.

ISAÍAS 33:15

Maijanpish cashcata ruhuac, mana llullac, pimanta quichushpa mana chayucyac, allita ruhuangapac imata mana pacalla japic, huañuchina yuyaita mana uyasha nic, ima mana allita mana ricusha nicmi

PROVERBIOS 29:24

Shuhuac parte tucuc runaca paipac causaitami piñan. Ima shuhuashcata yachashpaca mana huillanchu.

PROVERBIOS 17:23

Diosta mana manchac runaca cashcata ruhuac runata llaquichingapacmi pacalla pagota japin.

2 CRÓNICAS 36:14

Shinallatac curacunata tucui mandaccunapish, tucui gentecunapish ashtahuanmi mana allita ruhuashpa catircacuna. Shuctac llactapi causaccuna shinallatacmi mana allita ruhuashpa Mandac Diospac huasita mapayachirca. Chai huasitaca Mandac Diosllatacmi paipaclla cachun Jerusalenpi chicanyachishca carca.

DEUTERONOMIO 16:19

Cashcata ruhuanata ama saquinguichicchu. Ama ñahuita ricushpalla taripanguichicchu. Imata ruhuangapac ama imata pacalla japinguichicchu. Chai japishcami alli yachac cacpipish, ñahui mana ricucta shina ruhuan. Shinallatac cashcata ruhuactapish pandachinmi.

SAN LUCAS 24:27

Chashna nishpami, Moisés quillcashcamanta callarishpa, Dios ima nishcata tucui huillaccuna quillcashcacamanmi paimanta huillacushcata entendichirca.

SANTIAGO 1:27

Diospac ñaupapi mapa illac, Diosta alli cricmi cani ninaca, llaquipi cac viuda huarmicunatapish, taita mama illaclla cac huahuacunatapish ayudanami can. Shinallatac cai pachapi tiyac imapish mana allicunamanta huacaichirinami can.

ISAÍAS 1:22

Cambac cullquipish fierro ismushca shinami tucushca. Cambac vinopish yacuhuan chapushcami.

ISAÍAS 5:23

Paicunaca cullquita pacalla japishpami, mana allita ruhuaccunataca cashcata ruhuacmi nincuna. Chashna ruhuashpami, cashcata ruhuac runa japinataca quichun.

ISAÍAS 30:1

Mandac Diosca: «¡Aij, ñuca yuyaita cushcata mana chasquishpa, ñucamanta anchuriccunalla! Paicunaca manapish ñuca Espíritu yuyaita cucpimi, paicunallatac ari nincuna. Chashnami yallita juchallishpa catincuna.

ISAÍAS 65:2

Punzhantami mana cazushpa, quiquin munashca ruhuashpa causac gentecunataca maquita chutashpa cayarcani.

JEREMÍAS 4:17

Cancunallatac mana cazushcamantami chai soldadocunaca chagrata cuidac runacuna shina, muyundipi chapacun. Chaitaca Mandac Dios ñucami nini.

JEREMÍAS 32:32

Chashnami israelcunapish, Judá gentecunapish, paicunata jatun mandaccunapish, caishuc mandaccunapish, curacunapish, huillaccunapish mana allita ruhuashpa, ñucata piñachishpa causarca. Chaimantami anchuchigrini. Tucui Judá gentecunapish, Jerusalenpi causaccunapish ñucataca piñachircami.

EZEQUIEL 12:2

«Huañunalla runa, canca mana cazuccunapac chaupipimi causacungui. Paicunaca mana cazuccuna cashpami, ñahuita charishpapish mana ricun, ringrita charishpapish mana uyan.

OSEAS 5:10

Judá llactata mandaccunaca linderota yaicuric shinami cancuna. Ñuca yallita piñarishcataca yacuta tallic shinami paicunapac jahuata cachasha.

AMÓS 5:12

Ñucaca cancuna yallita mana cazushcatapish, yalli millaita ruhuashcacunatapish, cashcata ruhuac runata llaquichishcatapish, imata pacalla japishcatapish, juezcunapac ñaupapi huacchacuna japinata quichushcatapish yachanimi.

MIQUEAS 3:9

Cunanca, Jacobopac huahuacunata pushaccunapish, israelcunata mandaccunapish caita alli uyaichic. Cancunaca cashcata ruhuanatapish, allita ricushpa mandanatapish millanayachinguichicmi.

MIQUEAS 6:12

Chashnami chai llactapi causaccunaca yallita llaquichishca. Paicunaca llullaccunami. Calluca llullashpa umangapacllami.

NÚMEROS 22:7

Shina nicpica, Moab llactata, Madián llactata pushac yuyaccunaca pai maldiciashcamanta pagana cullquita apashpami rirca. Paicuna Balaampacman chayashpaca, Balac imata nishcatami huillarca.

1 SAMUEL 8:3

Ashtahuanpish churicunaca paicunapac taita shinaca mana causarcacunachu. Paicunaca charicyangaraicu cullquita pacalla japishpami cashcataca mana ruhuarcacuna.

ISAÍAS 1:17

allita ruhuanata yachacuichic. Allita mandanata munaichic. Llaquichic runata rimaichic. Taita mama illac huahuacunatapish, viuda huarmitapish ayudaichic» ninmi.

ISAÍAS 1:18

Mandac Diosca: «Cunanca tandanacushpa allichingapac ñucapacman shamuichic. Cancunapac jucha puca tela shina cacpipish, rasu shina yuranllatami ruhuasha. Yana puca tela shina cacpipish, yuranlla millma shinatami ruhuasha.

ISAÍAS 28:14

Cai Jerusalenpi causaccunata burlac mandaccunalla, Mandac Dios rimashcata uyaichic.

JEREMÍAS 5:6

Chaimantami paicunataca sachapi causac leoncuna huañuchinga. Shitashca pambapi causac atuc shamushpami tucuchinga. Leopardomi paicunapac llacta muyundipi shayacunga. Maijanpish chaimanta llucshictaca japishpami micunga. Paicunaca yallitami Diosta mana cazushpa, juchata ruhuashca» nircani.

EZEQUIEL 22:27

Mandaccunapish animalcunata japic atuc shinami, millaita ruhuashpa cullquita japingaraicu gentecunata huañuchishpa, yahuarta jichancuna.