ESTER 6:12 - Dios Rimashcata Quillcashcami

¹² Chai quipaca jatun mandac mandacuc huasi pungullamantacmi Mardoqueoca cutirca. Cutin Amanca yallita llaquirishpami, paipac umata tapashpa, paipac huasiman utca cutirca.

ESTER 6:12 Referans Kwoze

2 SAMUEL 15:30

Davidca llaquillami umata quillparishpa, lluchu chaquilla huacashpa olivos yuracuna tiyac huichaita llucshirca. Shinallatac tucui paihuan caccunapish umata quillparishpa huacashpami huichai llucshirca.

JOB 20:5

Mana allita ruhuaccunapac cushicuica utcami tucurin, Diosta mana manchac runapac cushicuipish ashacamallami can.

1 REYES 21:4

Nabot: «Ñuca taitacuna saquishca allpata mana cushachu» nishcamantami, Acabca mai llaquirishpa piñarishcata ricuchishpa paipac huasiman rirca. Huasiman chayashpaca camapi siririshpa pirca ladota chapashpami micunatapish mana munarca.

JOB 9:24

Cai pachataca paita mana manchaccunapac maquipimi churashca. Paica juezcunapac ñahuitapish tapanmi. Mana pai ruhuacpica, ¿pitac ruhuangayari?

ESTER 7:8

Mandashpa tiyana huasi lado huertamanta jatun mandac ucuman yaicushpaca Amantaca mandac Ester tiyacuc cama jahuapi siricuctami ricurca. Chaita ricushpami Amantaca: —¿Jatun mandac huarmitapish ñuca huasillapitacchu japirisha ningui?— nirca. Jatun mandac chashna nicpimi Amanpac ñahuita taparca.

ESTER 2:19

Carihuan manarac chayarishca solteracunata cutin tandachicpimi, Mardoqueoca jatun mandacpac huasi pungupi tiyacurca.

2 CRÓNICAS 26:20

Paipac frentepi lepra ungüi llucshishcataca curacunata mandac Azarías curapish, caishuc curacunapish ricurcami. Chaimantami chai ucumantaca utca llucshircacuna. Mandac Dios llaquichicpimi, chai ucumantaca paillatac utca llucshirca.

1 REYES 20:43

Shina nicpimi, Israel llactata jatun mandacca yallita llaquirishpa piñarishcata ricuchishpa, Samaria pueblopi cac paipac huasiman chayarca.

2 SAMUEL 17:23

Ashtahuanpish Ahitofelca pai yuyaita cushcata mana ruhuacpimi, paipac burrota parejashpa montashpa pai huacharishca pueblopi tiyac huasiman rirca. Paipac familia imata ruhuana cashcata ña allichishca quipaca sipirishpami huañurca. Pai huañucpica, paipac taita enterrashcallapitac enterrarca.

1 SAMUEL 3:15

Samuelca cayandi tutamantacamanmi sueñucurca. Ña jatarishpaca, Mandac Diospac huasi pungucunatami pascarca. Shina cashpapish muscuipi ricushcata Eliman parlanataca mancharcami.

ESTER 6:11

Chashna nicpimi, Amanca churarinatapish, caballotapish apamushpa. Mardoqueoman churachishpa, caballopi montachishpa plazaman apashpaca: “Jatun mandac alli nigricushca runataca chashnami alli nina” nirca.

1 REYES 21:6

Shina nicpimi paica: —Jezreel pueblopi causac Nabothuan parlashpami ñucaca: “Uvas chagra allpata ñucaman cui. Chai allpamantaca cullquita, mana cashpaca canman ashtahuan alli cana cacpica uvas tarpushcata shuctac allpata cushallami” nircani. Shina nicpimi paica: “Uvas chagrahuan cai allpataca mana cushachu” nircami— nirca.