ECLESIASTÉS 1:2 - Dios Rimashcata Quillcashcami

² «Tucui imapish yangallami. Ima cashpapish tucuimi yangallata» nirca.

ECLESIASTÉS 1:2 Referans Kwoze

SALMOS 144:4

Gentecunaca samai shinallami. Paicuna causana punzhacunaca llandu shinallami.

ROMANOS 8:20

Tucui Dios ruhuashcacunaca, mana paicuna munaimantachu yangalla tucurca, ashtahuanpish Diosmi punzhanta shuyachun chashnaca ruhuarca.

ECLESIASTÉS 5:10

Cullquita munac runaca mashnata charishpapish mana cushicunchu. Ima charishcacunata munacca, chai charishcamanta ima allita mana japinchu. Chaipish yangallami.

ECLESIASTÉS 12:8

Huillac runaca: «Imapish yangallami cashca. Tucui imapish yangallatami» nirca.

ECLESIASTÉS 2:26

Diosca, paipac ñaupapi alli causac runallamanmi alli yuyaita, alli yachaita, cushicuita cun. Ashtahuanpish juchayuc runamanca charishca jahuapish, ashtahuan tandachichunmi cun. Chai huacaichishcacunataca Diospac ñaupapi alli causac runaman cungapacmi chashnaca cun. Chaicunapish huairata caticuc shina yangallami.

ECLESIASTÉS 2:19

Chai mandac alli yachac cactapish, mana cashpaca yuyai illac cactapish, ¿pitac yachan? Shina cashpapish alli yachaihuan inti achicyachicuc cai pachapi imatapish yallita ñuca ruhuashcataca japingami. Chaicunapish yangallami.

ECLESIASTÉS 2:11

Chashna cushicushca quipami achca shaicuihuan ñuca maqui imallata ruhuashcacuna imapac cashcata alli yuyarircani. Chashna yuyarishpami tucui chaicunaca yangalla cashcata, shinallatac huairata caticushca shina cashcata yacharcani. Chashna cashcamantaca inti achicyachicuc cai pachapica imapish yangallami.

ECLESIASTÉS 2:23

Tucui paipac causai punzhami llaquillata, mana allillata apan. Imata ruhuashcapish paillatatacmi llaquichin. Paipac yuyaica tutapish mana samarinchu. Chaipish yangallami.

ECLESIASTÉS 2:17

Inti achicyachicuc cai pachapi tucui imalla ruhuashcaca umata nanachinmi. Chaimantami ñuca causaitapish mana ricunayachini. Tucui chaicunata alli yuyaricpica, huairata caticuc shinami yangalla.

ECLESIASTÉS 11:8

Maijan unai huatata cushicushpa causashpaca, pura tutapi ashtahuan unai huatacunata causana cashcatami yuyarina can. Quipaman ima tucugricucca yangallami canga.

ECLESIASTÉS 6:11

Yallita rimarishpaca, imapish yanga rimaicunatami ashtahuan riman. Chaica runamanca imapac mana valinchu.

ECLESIASTÉS 4:8

Maijan sapalla runaca ricsishcacunatapish, huahuacunatapish, huauquillatapish mana charinchu. Pai charishcata piman saquina mana tiyacpipish, manatac samarinchu. Mashnata charishpapish mana cushicunchu. Shinallatac: «¿Piman saquingapactac chashna mana samarishpa trabajacuni, imamantatac ñuca almataca yallita shaicuchini?» nishpapish mana tapurinchu. Chaipish yangallami. Shinallatac llashacta aparishca shina llaquimi.

ECLESIASTÉS 4:4

Shinallatac achcata trabajashpa tucui imatapish alli ruhuacpica, shuccunaca envidiashpa piñac cashcatapish ricurcanimi. Shinaca alli canapish, huairata caticushca shina yangallami.

ECLESIASTÉS 3:19

Chaica gentecunapish, animalcunapish chai shinallatacmi tucurincuna. Gentecunapish, animalcunapish huañunmi. Causaita cuc samaitapish tucuimi charin. Ima shina causashcapish yangallami. Chashna cashcamanta gentecunaca mana animalcunamanta yallichu.

ECLESIASTÉS 2:21

Chaica shuc alli yuyaihuan allita ricushpa, alli yachaihuan ruhuashcataca manapish imata trabajac runami japin. Chaica yangallami, shinallatac jatun mana allimi.

ECLESIASTÉS 11:10

Cambac shungumantaca piñarina yuyaita, cambac cuerpomantaca ima mana allita ruhuana yuyaita anchuchi. Huambrarac cashpa cushicunaca yangallami.

ECLESIASTÉS 4:16

Paita chasquiccuna yallita achca cacpipish, paicunapac huahuacunaca ña mana munangacunachu. Jatun mandac canapish huairata caticushca shina yangallami.

ECLESIASTÉS 2:15

Chaimantami ñuca shungupica: «Mana entendic runa ima shinami tucugrin, shinallatacmi ñucapish tucusha. Shina cashpaca, ¿imapactac ashtahuan yachacurcani?» nircani. Chaita yuyarishpami ñuca shungupica: «Caicunapish yangallami» nircani.

JOB 11:12

Sacha burro genteta huachacpimi, mana entendic runapish yuyaita japinman.

SALMOS 89:47

Ñuca causaica llandu shinalla cashcataca yuyaringuiyari. ¿Imapactac aichayuc runapac huahuacunataca ruhuarcanguiyari?

ECLESIASTÉS 2:8

Curitapish, cullquitapish, jatun mandac charinacunatapish achcatami tandachircani. Cantac caricunatapish, huarmicunatapish, tocanacunatapish tucuitami charircani. Chashnami ñucaca gentecuna cushicuna cashca shina, yallita cushicushpa, huarmicunata catipi charircani.