COLOSENSES 3:3 - Dios Rimashcata Quillcashcami

³ Cancunaca Cristota crishcamantami, paihuan huañushca shina canguichic. Cancuna causagrinataca, Cristohuanmi Diosca pacashpa charicun.

Nuevo Testamento en Quichua Cañar 1996

³ Cancunaca Cristota crishcamantami, paihuan huañushca shina canguichic. Cancuna causagrinataca, Cristohuanmi Taita Diosca pacashpa charicun.

COLOSENSES 3:3 Referans Kwoze

GÁLATAS 2:20

Ñucaca Cristohuanmi chacatashca shina cani. Ña mana ñucallachu causacuni, ashtahuanpish Cristomi ñucapica causacun. Cunan aichapi causacushpapish Diospac Churita crishpami causani. Paica ñucata cuyashpami, ñucamanta huañurca.

ROMANOS 6:2

¡Mana chashnachu cana can! Juchata ña mana ruhuangapacmi, huañushca shina canchic. ¿Maitatac juchata ruhuashpa catishunyari?

COLOSENSES 2:20

Cancuna Jesucristohuan huañushca shina cashcamantaca, cai pachapi tiyashca imapish manchanacunaca cancunata ña mana mandacunchu. Shina cashpaca, ¿ima nishpatac cai pacha mandashca shina causacunguichic?

SAN JUAN 5:24

Maijanpish ñuca nishcata uyashpa, ñucata cachac Taitata cricca, huiñai causaita charinmi. Paica huañushcamanta causaiman pasashcamantami, llaquimanca mana ringa. Chaica chashnatacmi can.

ROMANOS 8:2

Chaica, Jesucristohuan shuc shinalla tucucpimi, Diospac Espirituca jucha mandashpa charinamantapish, huañuimantapish cacharichirca.

ROMANOS 5:10

Dios ñucanchic-huan piñashca cashpapish, paipac Churi huañushcamantami ñucanchicta chasquirca. Ña chashquishca cashpacarin Cristo causacushcamantami quishpichishca cashun.

2 CORINTIOS 5:14

Cristo tucuimanta huañushcata yachashcamanta pachami, paipac cuyaica ñucanchicman yuyaita cun. Cristo huañushcamantami tucui mashna huañushca shina canchic.

SAN JUAN 5:21

Ima shinami ñuca Taitaca huañushcacunata causachishpa, causaita cun, chashnallatacmi paipac Churi ñucapish maijanman causaita cusha nishpaca cuni.

SAN JUAN 3:16

Diosca cai pachapi causaccunata yallita cuyashpami, paipac shuclla Churita cai pachaman cacharca. Pipish paita cricca ama chingarichun, ashtahuanpish huiñai causaita charichunmi, chashnaca cacharca.

SAN JUAN 14:19

Cai pachapi causaccunaca asha punzhacuna quipaca mana ñucata ricungachu. Shina cacpipish cancunaca ricunguichicmi. Chaica, ñucaca causacunimi, cancunapish causacunguichicmi. Chaimantami ricucunguichic.

1 PEDRO 3:4

Chaipac randica cancunapac ucu shungumantatac allichirishpa, mana piñaric, alli shungu caichic. Chashna allichirishpami, Diospac ñaupapica huiñaita mai alli nishcacuna canguichic.

SAN MATEO 11:25

Chai quipami Jesusca: «Jahua pachata, cai pachata Mandac ñuca Taitalla, cantaca “allimari cangui” ninimi. Canca, cai yachanacunataca alli yuyaiyuc, alli yachaccunamanta pacashpami, huahuacuna shinamanmi, yachana yuyaita cushpa yachachishcangui.

COLOSENSES 3:4

Cristollamantami cancunaca causaita charinguichic. Chaimanta pai cutimucpica, cancunaca paihuanmi pai shinallatac sumaimana ricuringuichic.

HEBREOS 7:25

Paimanta Diospacman cuchuyaccunataca, huiñai huiñaipacmi quishpichin. Paica huiñaitami causacun, chashnami huiñaita mañacun.

COLOSENSES 2:3

Diosmanta sumac yachaicunatapish, alli yuyaicunatapish paillatacmi charicun.

SAN JUAN 5:40

Cancunaca huiñai causaita charingapac mana ñucapacman shamushun ninguichicchu.

SAN JUAN 4:14

Ashtahuanpish maijanpish ñuca cushca yacuta ubiacca, jaicapi mana yacunayachingachu. Ñuca cushca yacuca paipica huiñai causaita cuc, tucyacuc yacu shinami canga— nirca.

APOCALIPSIS 2:17

Maijanpish ringrita charicca, Diospac Espíritu tandanacushca criccunaman ima nicushcata uyachun. Maijanpish millaita mishacmanca pacashca tiyacuc maná shuti tandatami carasha. Shinallatac mushuc shutita quillcashca yuranlla rumitami cusha. Chaitaca pipish mana ricsingachu, ashtahuanpish chaita chasquicllami ricsinga” ninmi.

1 JUAN 3:2

Cuyashca huauquicuna, ñucanchicca ña Diospac huahuacunami canchic. Shamuc punzhapi ima shinami ñucanchic cana cashcataca manarac yachanchicchu. Shina cashpapish Jesucristo ricuricpica, pai shina cana cashcatami yachanchic. Paitaca pai ima shina cashcatami ricushun.

FILIPENSES 4:7

Chashna ruhuacpimi, cancuna Jesucristohuan shuclla cashcamanta, gentecuna mana entendishca Diospac sumac causaica cancunapac shungutapish, yuyaitapish huacaichinga.

1 CORINTIOS 15:45

Dios quillcachishcapica: «Diosca punta Adantaca causaiyuctami ruhuarca» ninmi. Cutin quipa Adantaca causachic Espirituyuctami Diosca ruhuarca.

1 CORINTIOS 2:14

Diospac Espirituta mana charicca Espíritu cushcacunataca mana chasquisha ninchu. Chaicunaca paimanca pucllashca shinami. Shinallatac imata nisha nicushcatapish mana entendinchu. Chaitaca Diospac Espíritu yuyachicllapimi, yachac chayancuna.

ROMANOS 5:21

Ima shinami juchaca cai pachaman yaicushpa tucuita huañuiman aparca, chai shinallatacmi Diosca cuyashpa, Apunchic Jesucristomanta chasquishpa, huiñai causaita cunga.

COLOSENSES 1:5

Cashcata nic alli huillaita uyashpami, cancunaca jahua pachapi Dios huacaichishcata tucui shunguhuan cringuichic.

2 CORINTIOS 5:7

Paitaca mana ricui pudinchicchu, paita crishpallami causacunchic.

ROMANOS 6:11

Chai shinallatacmi cancunapish juchata ruhuangapacca, huañushca shina, cutin Diospacta ruhuangapacca Cristohuan pacta causacuc shina yuyana canguichic.

EFESIOS 3:9

Tucuita ruhuac Diosca pai imata ruhuasha nicushcataca, ñaupamanta pachami pacashpa charicushca. Chaita huillachunmi ñucamanca mingarca.

1 PEDRO 4:2

Cai pachapi causashcacaman jucha munaicunata mana ruhuashpa, ashtahuanpish Dios munashca shina causangapacmi, chai shinaca saquin.