2 REYES 9:7 - Dios Rimashcata Quillcashcami

⁷ Canta mandac Acabpac huasi ucupurataca canmi huañuchingui. Chashna ruhuashpami ñuca ima nishcata huillaccunata, tucui ñucata serviccunata huañuchishpa, yahuarta jichashcamantaca paicunatapish chashnallatac huañuchingui. Chai serviccunataca Jezabelmi huañuchichirca.

2 REYES 9:7 Referans Kwoze

1 REYES 21:15

Nabotta rumicunahuan shitashpa huañuchishcata Jezabel yachashpami Acabtaca: «Jezreel pueblopi cac Nabotpac uvas chagrataca jatarishpa japigri. Chai allpataca cullquipipish mana catunata munarcachu. Nabotca mana causacunchu, ñami huañushca» nirca.

1 REYES 18:4

Jezabel Mandac Dios ima nishcata huillaccunata huañuchicucpica, Abdiasmi chai huillaccunamantaca patsac runacunata apashpa pichca chungataca shuc jatun jutcupi, caishuc pichca chungataca shuctac jatun jutcupi pacarca. Shina pacashpaca, tandata, yacutapish cararcami.

DEUTERONOMIO 32:43

¡Llactacunalla, Dios acllashca llactata alli nichicyari! Paipac servicta huañuchiccunataca huañuchingami. Paimi, paita piñaccunata huañuchinga. Pai acllashca llactacunapac juchata pichangapacmi chashnaca ruhuanga» nirca.

1 REYES 21:25

Acab shinaca Mandac Diospac ñaupapi millaita ruhuacca pipish mana tiyarcachu. Paitaca paipac huarmimi millaita ruhuachicurca.

1 REYES 21:21

Mandac Diosca: “Riqui, cunanmi jatun llaquita canman apamugrini. Cambac huahua huahuacunataca pichac shinami tucui tucuchisha. Cambac huahua huahuapurataca shucllatapish mana saquishpami, Israel llactapica servishpa causaccuna cacpi, mana servishpa causaccuna cacpipish tucui tucuchisha.

DEUTERONOMIO 32:35

Ima shina llaquichina cashca shina, llaquichinapish ñucapacmi. Ima punzha pactacpimi, chaqui lluchcaric shina urmanga. Paicuna chingarinaca ñami pactamucun. Paicunaman allichishcapish ñami chayamucun.

APOCALIPSIS 19:2

Paica pimanpish mana tucushpa, cashcata ruhuac cashpami, chai huarmi huacllirishpa tucui cai pachapi causaccunata juchapi urmachishcamantaca llaquichishca. Shinallatac Diospacta ruhuaccunata huañuchishcamantapish llaquichishcami» nircacuna.

APOCALIPSIS 18:20

¡Chai pueblota tucuchishcamantaca Diospaclla caccunapish, Jesusmanta huillachun acllashcacunapish, Diosmanta ñaupa huillaccunapish, shinallatac jahua pachapi tucui causaccunapish cushicuichic! Cancunata llaquichic cashcamantami Diosca chai pueblotaca chashna llaquichishca.

HEBREOS 10:30

Mandac Diosca: «Ñucami llaquichiccunataca llaquichisha. Ñucami paicuna japina cashcata cusha» ninmi. Shinallatacmi: «Ñuca huahuacunataca ñucami taripasha» ninmi. Chaitaca yachanguichicmi.

ROMANOS 13:4

Mandaccunaca Diosta servic cashpami, cambac allipac can. Mana yanga churashcachu, ashtahuanpish mana allita ruhuac runata llaquichingapacmi. Paicunaca Diospacta ruhuac cashpami, maijanpish llaquichina cacpica, cashcata ruhuashpa llaquichin. Chaimanta mana allita ruhuashpaca manchanami cangui.

ROMANOS 12:19

Cuyashca criccuna, cancunata maijan llaquichicpica, ama cancunallatac llaquichinata yuyaichicchu, ashtahuanpish Dios llaquichichun saquinguichic. Chaica, Dios quillcachishcapica: «Llaquichina cacpica, ñucami llaquichisha. Paicuna japina cashcatami cusha» ninmi.

SAN MATEO 23:35

Cashcata ruhuaccunata huañuchishcamantaca, cancunatami Diosca llaquichinga. Abelpac yahuarmanta callarishpa, Berequiaspac churi Zacariaspac yahuarcamanmi cancunataca taripashpa llaquichinga. Zacariastaca Diosta mañana huasipi tiyac altar ladopimi huañuchirca.

APOCALIPSIS 2:20

Shina cacpipish shuc mana allitami canpica ricuni. Jezabel huarmi yachachichunmi saquingui. Paica ‘Diosmantami yachachicuni’ nishpami paipac yachachishcacunahuanca ruhuashcalla dioscunaman cushca micunacunata micuchun, shinallatac huacllirichun nishpa ñucapacta ruhuaccunataca pandachicun.

2 REYES 10:10

Mandac Dios Acabpac huasi ucupurata tucuchishami nishcaca mana pambapi urmashca shina yanga canchu. Mandac Diosmi paita servic Eliasta huillachishcata pactachishca. Chaitaca yuyarinami canguichic» nirca.

2 CRÓNICAS 22:7

Ocozías Joramta ricungapac rishpa, huañuna cashcataca Mandac Diosllatacmi munarca. Mandac Diosmi Nimsipac churi Jehutaca Acabpac huasi ucupurata huañuchichun, aceitehuan cahuishpa acllashca carca. Ocoziasca Jorampacman chayashpami, Jehuhuan tupangapac Joramllahuantac llucshirca.

JEREMÍAS 26:5

ñuca ima nishcata huillac serviccunata cutin, cutin cancunapacman huillachun cachacpi, paicunata mana uyasha nicpica,

2 REYES 10:11

Chashnami Jehuca Jezreel pueblopi saquirishca Acabpac huasi ucupuracunata tucui huañuchirca. Shinallatac Jehuca Acab churashca tucui mandaccunatapish, paicunapac huasi ucupuracunatapish, Acabpac curacunatapish, shucllatapish mana saquishpami tucui huañuchirca.