2 REYES 2:4 - Dios Rimashcata Quillcashcami

⁴ Eliasca cutinmi Eliseotaca: —Ñucataca Mandac Diosmi Jericó puebloman richun nin. Cunanca caipi saquirilla— nirca. Shina nicpimi Eliseoca: —¡Mandac Diospac shutipi, cambac shutipimi nini: Chaimanca mana cachashachu!— nirca. Chaimantami Jericó puebloman ishcaita rircacuna.

2 REYES 2:4 Referans Kwoze

2 REYES 2:2

Chaipimi Eliasca, Eliseotaca: —Ñucataca Mandac Diosmi Bet-el puebloman richun nin. Cunanca caipi saquirilla— nirca. Shina nicpimi Eliseoca: —¡Mandac Diospac shutipi, cambac shutipimi nini: Canllataca manatac saquishachu!— nirca. Chaimantami Bet-el puebloman ishcaita urai rircacuna.

JOSUÉ 6:26

Chai punzhacunapimi Josueca pactachingapac ari nishpaca: «¡Maijanpish cai Jericó pueblota cutinllatac allichishpa shayachicca Mandac Diospac ñaupapi mana alli nishca cachun! Cai pueblo callari pircataca paipac punta churipac jahuapi churachun. Cai pueblo pungutaca quipa churipac jahuapi churachun» nirca.

SAN LUCAS 19:1

Jesús Jericoman yaicushpaca, chai pueblo chaupitami ricurca.

2 REYES 4:30

Shina nicpimi, chai huahuapac mamaca: —¡Mandac Diospac shutipi, cambac shutipimi nini: Cantaca manatac saquishpa rishachu!— nirca.

1 REYES 16:34

Acab mandacuc huatacunapica Bet-el pueblopi causacuc Hielmi Jericó pueblota cutin allichirca. Chai pueblo muyundipi jatun pircata shayachingapac callari rumicunata churacucpica, paipac punta churi Abirammi huañurca. Chai pircapi punguta churacucpica, paipac quipa churi Segubmi huañurca. Chashna llaqui tucunataca Nunpac churi Josueman, Mandac Dios huillashca shinami tucurca.

HECHOS 11:23

Bernabé chaiman chayashpaca, Diosca yallita cuyashpa, quishpichishcata ricushpami cushicurca. Tucui criccunatami Apunchic Jesusllata tucui shunguhuan cazuchun rimarca.

HECHOS 2:42

Paicunaca apostolcuna yachachishcata allimi cazuccuna carca. Caishuc chaishuc-huan allimi apanacuc carca. Shinallatac Jesús huañushcata yuyarishpa tandata micungapacpish, Diosta mañangapacpish tandanacucmi carca.

1 SAMUEL 1:26

Shina cushpami Anaca: —¡Ñuca amitolla! Canca causacunguimi. Cambac ladopi mañashpa tiyacushca huarmillatacmi cani.

JOSUÉ 6:1

Jericó pueblopi causaccunaca israelcunata manchashpami, puebloman yaicuna pungutapish alli huichcarca. Chaimantaca pipish mana llucshircachu, shinallatac mana yaicurcachu.

RUT 1:16

Ashtahuanpish Rutca: —Canta saquishpa, canmanta caruyachun ama mañaichuyari. Can maiman ricpipish, ñucapish chaimanmi risha. Can maipi causacpipish chaipimi causasha. Cambac llactapish ñuca llactami canga. Cambac Diospish ñuca Diosmi canga.