2 PEDRO 1:3 - Dios Rimashcata Quillcashcami

³ Diosca Jesucristota ricsichishpami, paipac poderhuan ñucanchic paita allita yuyariccuna cachun, tucui ima illashcatapish ñucanchicman cushca. Cristoca pai cashcata ruhuac cashcata, sumaimana cashcata ricuchingapacmi cayarca.

Nuevo Testamento en Quichua Cañar 1996

³ Taita Diosca Jesucristota ricsichishpami, pai imatapish ruhuaclla cashcahuan ñucanchic paita allita yuyariccuna cachun, tucui ima illashcatapish ñucanchicmanca cushca. Cristoca pai cashcata ruhuac cashcata, sumaimana cashcata ricuchingapacmi c'ayarca.

2 PEDRO 1:3 Referans Kwoze

1 PEDRO 5:10

Ashtahuanpish asha punzhacaman llaquicunata cancuna apashca quipaca, Diosllatacmi pi mana juchanchipacta, alli sinchiyachishpa, alli caticta, pi mana cuyuchipacta ruhuanga. Paillatacmi ñucanchictaca Jesucristohuan shuc shinalla tucushcamantaca, paipac jatun cuyaimanta huiñaita sumacyachishca cachun acllarca.

2 TIMOTEO 1:9

Diosmi paipaclla causachun nishpa, ñucanchictaca quishpichishpa cayarca. Mana ñucanchic ima allita ruhuashcamanta, ashtahuanpish Dios cuyashcallamantami, Jesucristomanta quishpichirca. Cai shinaca cai pacha manarac callaricpimi, ñucanchicta Diosca cuyashca.

SALMOS 84:11

Mandac Diosca ñucanchicta achicyachic inti, ñucanchicta jarcac escudomi. Mandac Diosca mana pandarishpa causaccunataca cuyashpami allipi churan.

ROMANOS 8:32

Diosca, paipac quiquin Churitapish tucui ñucanchicmanta llaquita apachun, mana jarcarishpa, cushpaca, ¿manachu paipac Churita cushca shina imatapish cunga?

2 CORINTIOS 12:9

Shina mañacpipish Apunchic Jesusca: «Chashna llaquicunata apacushpapish, ñuca cuyashcamantaca cushicuilla. Ñuca imatapish ruhuaclla cashcaca, can imatapish mana ruhuaipac cacpimi alli ricurin» nircami. Chaimanta Cristo imatapish ruhuaclla cashca ñucapi ricurichunmi, ñucaca imatapish mana ruhuaipaclaya canata munani.

1 PEDRO 2:21

Chai shina causachunmi Diosca cayarca. Cristoca pai llaquita apashca shinallatac cancunapish llaquita apachunmi, cancunamanta llaquita aparca.

2 TESALONICENSES 2:14

Chashnaca ñucanchic Apunchic Jesucristopac sumaimana cushicuita chasquichunmi, ñucanchicman alli huillaita huillachishpa, Diosca cancunataca cayarca.

1 PEDRO 2:9

Ashtahuanpish cancunaca Dios acllashpa chicanyachishcacuna, Jatun Mandacpacta ruhuac curacuna, Diospaclla cac gentecuna, shinallatac Dios munashpa paipacllatac ruhuashcacunami canguichic. Amsamanta sumac achic luz shina causaiman llucchic Dios ruhuashca sumaimanacunata huillachunmi, chashnaca ruhuashca.

1 TESALONICENSES 2:12

Shinallatac Diospac huahuacuna shina causachunmi yachachircanchic. Cancunataca Diosllatacmi paihuan mandachun, alli nishca cachun acllarca.

1 TESALONICENSES 4:7

Diosca mana millaita ruhuashpa causachunchu acllarca, ashtahuanpish jucha illac causachunmi acllarca.

1 PEDRO 1:15

Ashtahuanpish cancunata acllac Diosca ima jucha illacmi. Shina cashcamanta cancunapish tucui causaipi ima jucha illac causanata munaichic.

EFESIOS 4:1

Ñuca Apunchic Jesuspacta ruhuacushcamanta prezu tiyacushpami cancunataca: Dios ima shina causachun cayashca shina causaichic.

1 CORINTIOS 1:9

Pai nishcataca pactachic Diosmi paipac Churi ñucanchic Apunchic Jesucristohuan shuclla tucushpa causachun cayarca.

2 PEDRO 1:2

Diostapish, ñucanchic Apunchic Jesucristotapish allita ricsishcamantaca, sumaimana cuyaitapish sumac causaitapish yallita chasquishca cachunmi munani.

2 PEDRO 1:5

Chaimanta cancuna crishcamantaca, allita ruhuanata munaichic. Ña allita ruhuashpaca, allita entendinata munaichic.

1 PEDRO 3:9

Shuccuna mana allita ruhuacpipish, ama cancunapish chai shinallatac ruhuaichicchu. Camishpa rimacpipish, ama cancunapish camishpa rimaichicchu. Chaipac randica Dios allicunata cuchun nishpa munaichic. Diosca allicunata chasquichunmi, cancunataca cayarca.

COLOSENSES 1:16

Diosca paihuanmi jahua pachapi tiyac imacunatapish, cai pachapi tiyac imacunatapish, ricuipaccunatapish, mana ricuipaccunatapish, poderta charic mandac espiritucunatapish ruhuarca. Tucuitami paihuan ruhuashpa, paipaclla cachun ruhuarca.

1 TIMOTEO 4:8

Cuerpo sinchiyachun pucllanaca, ashacamanca allimi. Ashtahuanpish Dios-huan alli canami tucuimanta yalli allica. Cai causaipacpish, quipa causaipacpish allicunatami apamun.

EFESIOS 4:4

Diospac Espirituca shucllami. Tandanacushca criccunapish shuc cuerpo shinami can. Diospish cancunata shuclla japina cashcata cushicushpa shuyachunmi cayarca.

FILIPENSES 4:8

Cuyashca criccuna, tucuri shimicunata rimashpaca: “Tucui imapipish mana llullac canata, shuccuna munashca canata, tucui imatapish allita ruhuac canata, tucui imapipish mapa illac canata, pimanpish cuyaita ricuchic canata, shinallatac sumac, tucuipac alli nishca cana yuyaicuna tiyacpica, chaillata yuyashpa catichic” ninimi.

SAN MATEO 28:18

Jesús paicunapacman cuchuyashpaca: «Diosca ñucamanmi cai pachatapish, jahua pachatapish mandachun poderta curca.

HEBREOS 1:3

Diospac Churimi pai jatun cashcata ricuchicun. Paica Dios shinallatacmi can. Diospac Churica tucui ima tiyashcataca, paipac poderhuanmi mandacun. Paica ñucanchic juchacunata pichashpami, jahua pacha Dios mandacuc alli maquiman tiyarigrirca.

SALMOS 110:3

Can sumaimana cashcahuan imatapish ruhuai punzhami, cambac soldadocunaca quiquin munaimanta shamungacuna. Tutamanta garua tamyahuan mushucyac shinami, punzhanta mushucllatac cangui.

1 PEDRO 1:5

Cancuna Diosta crishcamantami, cancunaman allichishca quishpirinata japingacaman, pai imatapish ruhuaclla cashcahuan cancunataca huacaichishpa, paipac maquipi charicun. Chai quishpirinataca tucuri punzhapimi ricuchinga.

ROMANOS 9:24

Diosca ñucanchictaca israelcunapuramantapish, mana israelcunapuramantapishmi acllarca.

PROVERBIOS 12:4

Yuyaisapa huarmica paipac cusapac corona shinami. Ashtahuanpish yuyai illac huarmica cusapac tulluta ismuchic shinami.

RUT 3:11

Cunanca ñuca huahualla, ama manchaichu. Imata can mañacpipish ñucaca ruhuashallami. Ñuca llactapi causaccunapish, cantaca alli huarmi cashcatami yachancuna.

PROVERBIOS 31:29

“¡Achca huarmicunami allita ruhuan. Shina cashpapish canmi tucui paicunata yalli alli cangui!” ninmi.

PROVERBIOS 31:10

Yuyaisapa huarmitaca ¿pitac tari pudingayari? Chashna huarmica achic nicuc sumac rumitapish yalli valimari.

FILIPENSES 3:8

Ñucata Mandac Jesucristomanta sumac yachana tucuita yalli alli cacpimi, ñucapac tucui imalla allicunatapish yangata ruhuashpa saquircani. Cristota cuyashpa paihuan cangapacmi, chai tucui yangallacunataca ima mapatalaya shitarcani.

2 PEDRO 1:6

Ña allita entendishpaca, quiquinllatac jarcaric canata munaichic. Quiquinllatac jarcaric cashpaca, mana shaicushpa catinata yuyaichic. Mana shaicushpa caticcuna cashpaca, Diosta allita yuyariccuna canata munaichic.

2 PEDRO 1:8

Cancuna tucui caicunata charishpa, punzhanta ruhuashpa causacpica, cancunapac causaipish grano pucuc shinami alli canga, shinallatac Apunchic Jesusta crishcapish mana yangachu canga.

2 PEDRO 1:10

Chaimanta cuyashca criccuna, cancunata Dios acllashpa cayashcamantaca, caicunata ashtahuan yuyaipi charishpa causanata munaichic. Chashna causashpami, jaicapi mana urmanguichic.

2 PEDRO 2:20

Maijanpish ñucanchicta Mandac Quishpichic Jesusta crishpaca, chai mana alli causaimanta anchurishcami can. Chashna anchurishca cashpapish cutin chaillamanta tigrarishpaca, ñaupa ima shina causacushcatapish ashtahuan yallimi tucun.

2 PEDRO 3:18

Shina tucunapac randica, ñucanchic Quishpichic Apunchic Jesucristota ashtahuan ricsishpa, pai mai cuyac cashcata yachashpa, catichic. ¡Paica cunanpish, huiñai huiñaipacpish sumaimana alli nishca cachun! Chashna cachun.