1 REYES 12:16 - Dios Rimashcata Quillcashcami

¹⁶ Tucui israelcunaca paicuna mañashcata jatun mandac mana uyasha nicpica: «Davidmantaca, ¿imatatac ñucanchicca charinchic? ¿Israelpac churimantaca, ima japinatatac charinchic? ¡Israelcuna cancunapac, carpa huasicunaman richiclla! ¡David cunanca, cambac huasi ucupurata ricuilla!» nirca. Shina nishpami, israelcunaca paicunapac carpa huasicunaman rircacuna.

1 REYES 12:16 Referans Kwoze

2 SAMUEL 20:1

Benjaminpac aillupuramanta Bicripac churi millaita ruhuac Sebami chaipi carca. Pai cornetapi tocashpa rimarishpaca: «¡Ñucanchicca Isaipac churi Davidmantaca ima ricunata, ima japinata mana charinchicchu! ¡Israelcuna cancunapac huasicunaman richiclla!» nirca.

JEREMÍAS 33:21

ñucata servic Davidhuan ari nishcapish yangami canga. Pai mandashpa tiyarinapi mandashpa tiyarichunca huahuata mana cushachu. Shinallatac curacunahuan, levitacunahuan ñucata servichun ari nishcapish yangami canga.

2 CRÓNICAS 10:16

Tucui israelcunaca paicuna mañashcata jatun mandac mana uyasha nicpimi: «Davidmantaca, ¿imatatac ñucanchicca charinchic? ¿Isaipac churimantaca ima japinatatac charinchic? ¡Israelcuna, cancunapac carpa huasicunaman richiclla! ¡David cunanca cambac huasi ucupurata cuidanguilla!» nirca. Shina nicpimi, israelcunaca paicunapac carpa huasicunaman rircacuna.

ISAÍAS 7:2

Chaita Davidpac huahua huahuapura Acazman huillangapac shamushpaca: «Siria llactapi causaccunaca Efrainpac llactahuan tandanacushpami canhuan macanacungapac shamushca» nirca. Chashna nicpimi, jatun mandac Acazpac shungupish, Jerusalenpi causaccunapac shungupish huairahuan sachacuna caiman chaiman cuyuric shina chucchurca.

SALMOS 132:17

Chaipimi David mandanataca cutinllatac callarichisha. Aceitehuan cahuishca ñuca jatun mandactami lamparahuan achicyachic shina achicyachisha.

SALMOS 76:10

Gentecuna piñaricpica, canca alli nishcami cangui. Piñashpa llaquichishcamanta saquirishcacunataca canmi tucuchingui.

1 REYES 22:36

Ña inti tigracucpimi, carpa huasicunamanta caparishpaca: «¡Tucui gentecuna cancunapac pueblocunaman, llactacunaman cutichic!

1 REYES 22:17

Shina nicpimi paica: —Tucui israelcunatami michicta mana charic ovejacuna shina, tucui urcucunata shic-huarishpa rishcata ricurcani. Shina cacpimi, Mandac Diosca: “Paicunaca mana mandacta charinchu. Chaimanta mana manchashpa, huasicunaman cutichiclla” ninmi— nirca.

1 REYES 11:39

Chashna llaquichishcamantami Davidpac huahua huahuacunataca llaquichigrini. Shina cashpapish, mana tucui causaipi llaquichishachu” ninmi» nirca.

1 REYES 11:36

Salomonpac churi mandachunca shuc aillullatami cusha. Ñucata servic Davidpac huahua huahuacunataca lámpara shina mana huañuc punzhanta cachunmi Jerusalenpi mandachun saquigrini. Chai pueblotaca ñuca shutipi mañachunmi acllarcani.

1 REYES 11:34

Shina cacpipish, pai mandanataca mana tucuichu paipac maquimantaca quichusha. Ashtahuanpish ñuca acllashca ñucata servic Davidta cuyashcamantami, Salomontaca tucui paipac causaipi mandachun saquigrini. Davidca ñuca mandashcacunata pactachichun ñuca nishca shimicunata cazushpami causarca.

1 REYES 11:13

Chashna ruhuashpapish mandanataca mana tucui quichushachu. Ñucata servic Davidtapish, ñuca acllashca Jerusalentapish cuyashcamantami shuc aillullata cambac churi mandachun cusha» nirca.

2 SAMUEL 16:11

Chai quipami Davidca Abisaitapish, paita serviccunatapish rimashpaca: —Ñucamanta llucshishca churillatac huañuchisha nicucpica, ¡Benjaminpac aillupuramantacarin mashnatapish rimangallami! Mandac Diosmi chashna nichun nishca canga. Chaimanta mashnatapish maldiciachun saquilla.

2 SAMUEL 15:13

Shuc huillac runa Davidman huillangapac shamushpaca: «Israelcunaca tucuimi Absalonta cati callarincuna» nirca.

JUECES 8:35

Gerobaal nishca Gedeontapish huasi ucupura causaccunatapish, cai tucui allicunata ruhuashcamantapish mana pagui nircacunachu.

SAN LUCAS 19:27

Cutin, ñucata piñashpa mana mandac cachun munaccunataca apamushpa, ñuca ñaupapi huañuchichic” nircami» nirca.

SAN LUCAS 19:14

Pai ña ricpica, chai llacta gentecuna paita piñashpa: “Cai runa ñucanchicta mandachunca, mana munanchicchu” nichun, huillaccunata quipata cacharca.

SAN JUAN 13:8

Shina nicpimi Pedroca: —¡Jaicapi ñuca chaquita jahuachun, mana saquishachu!— nirca. Shina nicpimi Jesusca: —Cambac chaquita ñuca jahuachun, mana saquishpaca, mana ñuca yachacucchu cangui— nirca.

1 REYES 11:11

Chaimantami Mandac Dios Salomontaca: «Canca cashna ruhuashpami, ñucahuan ari nishcatapish, pactachichun cushca shimicunatapish mana cazurcangui. Chaimantami can mandacushcata quichushpa, canta servicman cusha.

1 REYES 11:35

Ashtahuanpish chai mandanataca paipac churipac maquimanta quichushpami, chunga aillucunataca can mandachun cusha.

ISAÍAS 7:17

Mandac Diosca cantapish, can mandacuc llactapi causaccunatapish, cambac huasi ucupuracunatapishmi llaquichinga. Judá aillumanta Efraín aillu chicanyarishca punzhamanta cunancaman mana ricushca llaquicunami shamunga. (Chashnami Asiria llactata jatun mandactaca llaquichinga).

EZEQUIEL 37:16

«Huañunalla runa, cunanca shuc caspita japishpa, chaipica: “Judapacpish, paihuan apanacuc israelcunapacpishmi” nishpa quillcai. Quipaca shuc caspita japishpa chaipica: “Efrainpac, Josepac huahuacunapacpish, paicunahuan apanacuc israelcunapacpishmi” nishpa quillcai.

JUECES 9:28

Chaipimi Ebedpac churi Gaalca: «¿Ñucanchic servingapacca Abimelecca pitacyari? ¿Siquem puebloca imatacyari? Abimelecca Jerobaalpac churillami. Cutin Zebulca paita servicllami. Abimelecta servinapac randica Siquempac taita Hamorpac huahuacunata servishpa causashunchic.

PROVERBIOS 15:1

Sumacta rimashcaca piñarishcata allichinmi. Ashtahuan sinchita rimashcaca ashtahuanmi rabiachin.

MARCOS 3:24

Llactata mandaccunapura macanacucpica, chai llactaca chingaringami.