Apasol 9:16 - God Vonana Vovokaravina

¹⁶ Ma ani beyei da kaku vava kubiine ina vokwarakwara kirakai.”

Apasol 9:16 Referans Kwoze

1 Tesalonika 3:3

da maranai wawaya ina vivitupaketowanemi na ami nota ke ina peku. Namada koakovi da weni vikamyuyuwina Keresiyana kudubita tapanapanani na bade God iakovi.

Apasol 21:11

Ma ipisi kurikai na Pol kana radi borinai ivotawei ma iviiya da tuna mani imana ma kaena ikutatana. Ma ivona bo, “Kanuma Vovokaravina ivoneku da meni wawayina weni radina ekotekotei na Jiu damsi i babada Jerusalem kamonai ina kutatani ma kupuna damsi ku imasi ina terei.”

2 Korint 6:4

Kegha da bera kudubina kaberabera bubuni na kaimatakira da tokai na God ina bigabiga. Namanaki nuwapoya ma piropiro kapanapanani, ma nuwanubiiyai ma akii nota kudubinai kabigabiga.

Jon 15:20

Ami nota evovira da aku sisiya ikikava aterei kurimi na kona notai. ‘Biga kana kavakavara wawayina ke ina ghae da ina bada ina ghekuyowei.’ Taku ikikava itupaketowaneku na bade tami nakanani ini tupaketowanemi. Ma ikikava aku vibeyebeyena iviiya na bade nakanani tami ami vibeyebeyena ina viiya.

1 Pita 4:14

Keriso koitumaghanei kubiine, wawaya ini avaberowemi na kovi nuwabiibiiyei, iyamna Kanuma kadakadarina gwabimiyai, tuna na God Kanumina.

2 Timoti 1:12

Tuna kubiine karako avovokwarakwara. Ma ke ata vivinimaya, iyamna akovi da iyi aitumaghanei. Ma anotanotai da aviyavisina ku imana aterei na ina koyagha bubuni da ina ku vovira marana.

Matiu 5:11

“Tami iyavo kava taku kubiiku wawaya iavaberowemi bo itupaketowanemi bo viberowai iwavumi na God ini biibiinimi.

Matiu 24:9

“Nani maranai wawaya ina patumimi, ini tupaketowanemi ma ini rabobomi. Taku kubiiku na dam kudubina dobuwai ina baremi.

2 Timoti 3:11

ikikava wawaya ivi tupaketowaneku ma bade aku vokwarakwara. Tam kuakovi aviyavisina kuriku itupuwa Antiyok, Aikoniyam ma Listra kamonai. Nani dobusiyai na wawaya ivi tupaketowaneku da berona ghamanakina apanani. Ma kegha da weni berasi kudubina kamonai Bada ivi yawasiku.

Apasol 21:4

Ma vitumaghana damsi viya kapananisi da yavata kamakai taparoro sago. Ma Kanuma Vovokaravina ina rewapanai ti damsi Pol ivona kirakiiyei da ke ita ghae ku Jerusalem.

Revelation 1:9

Taku varesimi Jon. Tami ma taku na Yesu ina vikiivavona kamonai ma wawaya itupaketowaneta da tavovokwarakwara patapata ma kegha da ere nuwanubata tamiimiirikikina. Ma taku na God vonana adimadimei ma Yesu avivi sisiyei tuna gigituna na ipatumiku ma ivonataweku ku Patmos nuwana.

Apasol 9:14

Ma bade avi yanei da taparoro babadisi i babada gwabisiyai rewapana iviiya ma ipisi wike ku Damaskas da iyavo kava kavovokavakavarim na ina patumikai.”

Apasol 9:6

Kevomiiri ma kuna rui ku kwanatu ma nani dobunai wawaya ina vonem da aviyavisina kuna berai.”

Apasol 14:22

Ma kwanatu nununai Keresiyana ikiikiiepepisi da i nota iti rewapana ma sisiya biibiisi itereterei da i vitumaghana ita vokikini. Ma ivonesi bo, “Vitumaghana damta nuwapoya bogii ma bogiiyai tapanapanani da God ina ku vikiivavona tarui.”

Apasol 21:13

Ma Pol ivonapotekai bo, “Avi kubiine kotutou na nuwanuwaku kopiropiroi? Taku aivaghinei da ina patumiku Jerusalem kamonai ma ke patuma kava ma bade aivaghinei da ini raboboku Bada Yesu kubiine.”