IBRANI 12:2 - PEJANJIAN EMPAI CERITAU ILUAK

² Mela kitau ngerjauka titu ngan maju merupuakka Yesus. Diau itula mbuat kitau percayau, mangku Diautu pulau nulung kitau maju percayau. Yesustu ta'an sengsarau, nidau nyanauka, bansau mati di kayu saliptu setu diau maluka. Diau cuman ngingatka riang diau ka dighasaukaNyau nanti. Mbak kini Diau duduak di sebela kanan Allah.

IBRANI 12:2 Referans Kwoze

1 PITRUS 3:18

Keristustu mati sekali batan endak dusau manusiau, jemau diau nidau besala batan endak jemau besala. Keristus ngerjauka titu, supayau Diau pacak mbimbing kamu njenguak Allah. Diautu la dibunua masau njadi manusiau, tapitu la diidupka agi nurut rua.

IBRANI 1:3

Di Diautula tekinak keagungan Allah diau besinagh. Gegalau sipat Allah adau di Diau galau. Diautu pulau nyayia gegalaunyau ngan katauNyau diau bekuasau nian. Diautu dipakuka di kayu salip, mangku dusau manusiau pacak diabiska. Udim itu Diau duduak di sebela kanan Allah diau Mahakuasau di bada diau tinggi.

IPISUS 5:2

Idupla sangi sayangi luak Keristus nyayangi kitau. Diau la nyeraka nyawauNyau batan endak kitau njadi kerban diau iluak ngan melemakka ati Allah.

PILIPI 1:6

Allah la mulai ngerjauka diau iluak di ati kamu. Mangku aku percayau nian, Diau ka neruska kerjauNyau diau iluaktu enggut udim, masau Yesus Keristus datang.

IBRANI 9:28

Luak itu pulau Keristus ngerbanka diriAu cuman sekali ajau endak ngabiska dusau banyak jemau. Mangku Diau ka datang agi ukan endak nanggungka dusau agi, tapitu endak nyelamatka jemau diau nunggu Diau datang.

YUHANIS 6:40

Nyela, inila kendak BapakKu: Supayau gegalau jemau diau nginak Ana'Au ngan percayau ngan Diau bulia idup empai selelamaunyau, mangku Akunila ngidupkanyau masau aghi kiamat.”

1 PITRUS 3:22

ngan la nayiak ke sergau. Mbak kini Diau duduak di sebela kanan Allah ngan merinta gegalau malaikat ngan penguasau ngan rua.

RASUL 5:31

Diautu la ditinggika Allah di sebela kananAu, dijadikaNyau Penguasau ngan Rajau Penyelamat, supayau jemau Israil pacak ngubai ngan dusaunyau diabiska.

LUKAS 24:26

Nyela, Rajau Penyelamat mesti meghasauka sengsarau itu kudai mangku diregaui.”

YUDAS 1:21

Jagauila diri kamu, mangku kamu nidau nyimpang jak di sayang Allah, sampai nungguka Tuhan kitau Yesus Keristus ngenjuakka ngan kamu idup selelamaunyau, karnau Diau iluak nian.

IBRANI 8:1

Inti gegalau kici'an tadi kitau adau Imam Besak diau duduak di sebela kanan Allah diau Mahabesak di sergau.

2 TIMUTIUS 4:8

Mbak kini adia menang la nunggu aku, karnau idupku la dibenaghka Allah. Masau aghi kiamat, Tuhan akim diau adil ka nyeraka adiatu ngan aku. Ukan aku ajau diau ka nerimau adiatu, tapitu gegalau jemau diau nungguka nian Tuhan datang.

PILIPI 3:20

Anyautu kitauni jemau diau behak di sergau. Jak di situla pulau kitau nantika ngan ghindu nian ngan Tuhan Yesus Keristus, Rajau Penyelamat kitau.

MARKUS 14:36

KatauNyau, “Bak, gegalaunyau ka pacak, amun Dighi. Jawuakala sengsarau itu jak di Aku. Anyautu jangan nurut kendak Aku, tapitu kendak Dighi ajau.”

PENGINA'AN 2:8

“Ngan malaikat jemau Keristen di Semirna tuliskala luak ini: ‘Inila katau Aku, Aku dulu sekali ngan mendian sekali. Aku la mati mangku ngulang idup.

IBRANI 13:13

Karnau itu mela kitau pegi njenguak Diau di luagh kuta ngikut meghasauka tanggunganNyautu.

IBRANI 5:9

Mangku la udim Diau njadi sempernau, Diau pacak nyelamatka enggut selelamaunyau jemau diau nurutiNyau.

YUHANIS 13:3

Yesus keruan, bansau Bapa'Au la ngenjuakka gegalaunyau ngan Diau. Diau pulau keruan Diau asalau jak di Allah ngan baliak agi ke Allah.

LUKAS 17:5

Mangku rasul-rasul mintak ngan Tuhan, “Teguakala iman kami.”

MARKUS 9:24

Bak itu tegauk, “Aku percayau. Tulungla aku diau nidau percayau.”

IBRANI 12:3

Rupuakkala maju sengsarau Yesustu ngadap jemau bedusau diau melawan Diau ngan luat kematila, mangku kamu nidau tekedan ngan maju adau aghapan.

IPISUS 2:16

Karnau Diau mati di kayu salip, bemusuan ughangtu diabiskaNyau, mangku ughangtu seghundak, mangku njadi seilu'an ngan Allah.

RASUL 5:41

Rasul itu pegi jak di pengadilantu ngan riang, karnau pantas sengsarau karnau namau Yesus.

YUHANIS 12:32

Amun Aku la dinayiakka jak di deniau, Aku ka ngajak gegalau jemau njenguak Aku.”

1 PITRUS 1:11

Ughangtu endak ngeruani, kebilau ngan luak manau titu ka tejadi diau dikiciakka Rua Keristus diau adau dalam ughangtu. Rua itu la ngiciakka sebelumau gegalau penanggungan diau mesti dighasauka Keristus ngan keagunganNyau diau ka dienjuakka ngan Diau udim itu.

IBRANI 10:14

Ngan sutiak kerban ajau Keristus la nyempernauka selelamaunyau jemau diau la diberesiaka jak di dusaunyau.

YUHANIS 12:24

Ngenian katauKu ini: Amun semughak padi nidau ditugalka ke tana, mangku nidau busuak, diau ka maju semughak itula. Anyautu amun mughaktu busuak karnau tumbua, mangku ka banyak asilau.

YUHANIS 8:56

Abraham, bak kapu dighi, injiak nianan ka nginak aghi Aku datang, mangku la ngina'au, diau injiak.”

YUHANIS 1:29

Pagi di aghiau Yuhanis nginak Yesus datang njenguak diau, mangku Yuhanis bekatau, “Kina'ila, itu Anak Bebiri diau disediauka Allah endak ngabiska dusau deniau.

LUKAS 23:11

Herudis ngan tenterahau musiakka, nggelakka Yesus ngan nyurumiNyau ngan baju rajau. Udim itu Herudis ngajung Diau ngulang ngadap Pilatus.

MATIUS 20:28

Semegi luak Anak Manusiau pulau datang ukan endak ditulung, tapitu endak nulung mangku ngenjuakka nyawauNyau njadi tebusan batan endak banyak jemau.”

MATIUS 16:21

Jak masau itu Yesus mulai ngiciakka ngan anak-buaHau, bansau Diau mesti pegi ke Yerusalim, mangku meghasauka banyak penanggungan jak di pengulu-pengulu, imam-imam bepangkat tinggi ngan guru-guru ukum Taurat. Diau mesti dibunua, mangku la duau malam Diau ka idup agi.

PENGINA'AN 1:17

Masau aku nginak Diau, aku tejeghumus di adapan ketingAu luak jemau mati. Diau nepiakka tanganAu di aku mangku bekatau, “Nidau nanti takut! Aku diau dulu sekali ngan mendian sekali.

PENGINA'AN 1:11

Katau suarautu, “Setu diau kaba kinak tuliskala di sebua kitab, mangku kighimkala ngan jemau Keristen di tujua kuta, diautu Ipisus, Semirna, Pergamus, Tiatira, Sardis, Piladelpia ngan Laudikia.”

IBRANI 7:19

Ukum Taurattu nidau pacak nyempernauka. Mangku mbak kini kitau dienju'i aghapan diau lebia iluak agi, mangku kitau pacak masighi Allah.

IBRANI 1:13

Nidau kekela Allah ngiciak ngan sughang malaikat, “Duduakla di sebela kananKu, enggut musua Kaba Kutunduakka ngan Kaba.”

RASUL 2:36

Mangku gegalau jemau Israil mesti keruan nian, Yesus diau kapu dighi salipkatu dijadika Allah Tuhan ngan Rajau Penyelamat.”

MARKUS 9:12

Yesus nimbal, “Nyela, Elia datang mangku nyediauka gegalaunyau. Anyautu luak manau ngan ceritau diau ditulis di Injil ngiciakka Anak Manusiau ka banyak sengsarau ngan digelakka jemau?

PENGINA'AN 1:8

“Akunila diau dulu sekali ngan mendian sekali,” katau Tuhan Allah diau Mahakuasau, diau adau jak di senitu enggut mbak kini ngan maju ka adau.

IBRANI 11:36

Adau pulau diau digelakka, dipeciti, dikebat ngan rantai ngan dimasuakka dalam jil.

IBRANI 10:33

Adau masau kamu dimadakka di mukau jemau banyak, adau masau kamu ngikut sengsarau ngan jemau diau dimadakka luak itu.

MARKUS 16:19

La udim Tuhan Yesus ngiciak ngan ughangtu, Diau tuangkat ke sergau. Di situ Diau duduak di sebela kanan Allah.

RASUL 3:15

Luak itula kapu dighi mbunua Diau, awuak Diautu pacak ngenjuakka idup nian ngan jemau. Allah la ngidupka Diau jak di mati. Kamini la ngina'Au mangku ngiciakkanyau.

1 KURINTUS 1:18

Ceritau Yesus mati di kayu salip dianggap mbu'ung ngan jemau diau ka benasau, anyautu ngan kitau diau ka diselamatka, itu kuasau Allah.

1 KURINTUS 1:23

Kamini ngiciakka Keristus mati di kayu salip. Ceritau itu nyinggung jemau Yahudi, jemau ukan Yahudi nganggap itu bigal.

YAKUBUS 2:1

Kantin-kantinku diau percayau ngan Yesus Keristus, Tuhan diau agungtu, jangan kamu nginak rupau.

MARKUS 15:28

Luak itula ditepati setu diau ditulis di Injil, bacauannyau, “Diau ka dikiciakka jemau ja'at.”]