San Mateo 17:20 - Nuevo Testamento Uwotjüja

²⁰ Pättäku Jesú-mä̧ ädätinä̧u̧: —Jua'amä̧ kua̧'kua̧ ku̧wȩnä̧rä̧tu̧ku̧ juikuätukua'attü. Isopäi'ünä̧tä̧ pä'üsä ukuturu, mostaza u̧wä̧ju̧ isäte a̧'u̧kuä̧'i̧jü̧ta̧'a̧nü̧, a̧'u̧ku̧nä̧tä̧ kua̧'kua̧ ku̧wȩnä̧rä̧tu̧ku̧ttü̧'i̧nä̧, ji'kaja mü̧ä̧'ka juorümä̧ tü'ipächi päkuätukuttümä̧ tüipächäkua'a. Ja̧'wa̧nü̧ ja̧'a̧ttü̧ jȩttü̧ juiyünä̧ weyekumä̧ juiya'a.

TÄ̧DO Ä̧CUÄ̧ I̧HUȨNȨ

²⁰ Jesús päinä̧u̧do: —Ucutumä rö̧ȩnä̧ esetocotöjä. Iso päi'önä pä'ösä ucuturu, mostaza jacuä jähuä ta'anö ji̧'qui̧cha̧nö̧tä̧ cuesetätucuomenä, ja̧u̧ möä'ca päcuhuätucuttumä: “Pporächi'i koromecu.” Iso päi'önä adiunä cuesetätucuttumä, juhuä'ca möä'ca koromecu pporächi'äcua'a. O'ca juiyönä jȩcu̧'ä̧cuo̧tö̧jä̧ adiu cuesetätucuttumä.

San Mateo 17:20 Referans Kwoze

San Lucas 17:6

Pättäku ttu̧ru̧wa̧mä̧ ädätinä̧u̧: —Kua̧'kua̧ ku̧wȩnä̧rä̧tu̧ku̧mä̧, suro mostaza u̧wä̧ju̧ isäte jä̧'i̧jü̧ta̧'a̧nü̧ jü̧ttü̧'i̧nä̧, pi dau sicómoro isäi: porümä̧ pporächi'ü, rü̧ä̧ ajenä̧ kkä̧mä̧di̧, päkuätukuttü'i̧nä̧, esetäkua'a.

San Marcos 11:23

Isopäi'ünä̧ ukuturu pä'üsä, ya̧tȩ pi'ka mü̧ä̧'ka pätetü: ¡Juorü pporächi'ü rü̧ä̧ duboranä̧ ma̧'ä̧chi̧! päüttümä̧, päüta'anü̧ 'kuäopäkua'a, üdüdüwoka'a a̧'kua̧ wȩnä̧rü̧ päomȩnä̧mä̧.

San Lucas 18:27

Pättiyäku Jesú-mä̧ ädätinä̧u̧: —Pi̧jä̧ ttü̧ja̧sa̧, jȩü̧ juiyünä̧ iweyekumä̧, Dio-mä̧ jȩü̧tä̧ ja̧'a̧.

San Lucas 1:37

Isopäi'ünä̧ Dio iweyekumä̧ yoriso juiya'a.

San Mateo 21:21

Jesú ädätinä̧u̧: —Isopäi'ünä̧ pädäu̧jä̧, 'kikuekuätukuoka'a jueünä̧tä̧ kua̧'kua̧ ku̧wȩnä̧rä̧tu̧ku̧ttü̧mä̧, suro higuera isäinä̧ 'kuäopäjitämä̧ jo̧ka̧'a̧ jä̧kua̧'a̧; pi'ka mü̧ä̧'ka «juorü tü'ipächü, rü̧ä̧ duborara̧'a̧ ma̧'ä̧chi̧ päkuätukuttü'inä̧,» ja̧'wa̧ta̧nü̧ jä̧kua̧'a̧.

San Marcos 9:23

Ja̧'wa̧nü̧ päku, Jesú-mä̧ pä'inü̧: ¿Dio-rümä̧ kua̧'kua̧ kku̧wȩnä̧rü̧'a̧nü̧ tä̧jí̧? ¡Esetürümä̧, o'kajuiyünä̧tä̧ eseta'aku iso juoa'a!

1 Corintios 13:2

Ja̧'wa̧ta̧nü̧ Dio i̧mi̧nä̧ jiäkuäwä chu̧ju̧nä̧ra̧ja̧ pä'ü'i̧nä̧, ttu̧wo̧juo̧kü̧ jäwä o'kajuiyünä̧ chu̧wo̧jua̧ja̧ pä'ü'i̧nä̧, wo̧juä̧wä̧ wȩnȩ chu̧wo̧juo̧ttü̧'i̧nä̧, müä'ka'i̧nä̧ pporächi'ünä̧ cha̧'kua̧ chu̧wȩnä̧rü̧ttü̧'i̧nä̧, eseu repeäkuäwä juidüttümä̧, ttümä̧ mikuäwokütä jȩpü̧sä̧.

San Mateo 13:31

Kkoronä̧ wȩnȩtü̧ ji̧ä̧wi̧nä̧u̧: Mo̧ro̧jä̧ ru̧wa̧ weümä̧, ya̧tȩ ü'ättanä̧ mostaza pä'ü miku u̧wä̧ju̧ u̧ju̧ni̧nü̧ ji̧nü̧'a̧nü̧ ja̧'a̧.

San Juan 11:40

Jesú päinäkua̧: —Täkü jidäwäkuajä̧, kuesetüttümä̧, Dio ü̧rü̧ä̧ to'kuäkuajujä̧, pä'ü.

San Marcos 4:31

Jua̧u̧mä̧ mostaza u̧wä̧ju̧ isäte, rȩjȩ ttu̧ju̧na̧'a̧ jä̧'i̧nü̧'a̧nü̧ ja̧'a̧. Jua̧u̧mä̧, pi̧jä̧nä̧ kka̧ku̧ u̧wä̧ju̧ttu̧'i̧nä̧ abonä̧nü̧ ppo̧ü̧ ja̧'a̧.

Hebreos 3:19

Ja̧'wa̧nü̧ ji̧na̧'a̧mä̧ topätüjä̧; ttesetokomȩnä̧mä̧, dodepokotü pinä̧tü̧ pä'ü.

San Mateo 17:17

Päku, Jesú-mä̧ ädätinü̧: —¡Isoo ukutumä̧ esetokotü, suropätü ttü̧ja̧jä̧! ¿Ti̧yȩnü̧bü päi'ünä̧ ukutukumä̧ chü̧jä̧kua̧'a̧jä̧ttü̧? ¿Ti̧yȩnü̧bütä kuesetätukuoka'amä̧ cha̧mi̧'kidächi'äkua'ajä̧ttü̧? Poku i'chächirü.

1 Corintios 12:9

Ja̧'wa̧ta̧nü̧ Jua̧u̧ Epíritu-nä̧tä̧ kkorotümä̧ i̧yä̧u̧ tta̧'kua̧ wȩnä̧rä̧kuä̧wä̧ ttu̧ju̧nä̧ra̧ pä'ü'i̧nä̧ ja̧'wa̧ta̧nü̧ kkorotümä̧ i̧yä̧u̧ na̧nȩpä̧tü̧rü̧ aditü ikuäwä'i̧nä̧, jü̧nä̧.

San Mateo 17:9

Ja̧'wa̧nü̧ jä̧ja̧'a̧ mü̧ä̧'kattü tti̧mȩyȩwo̧mȩnä̧, Jesú-mä̧ ro̧'ȩpü̧nü̧ päinä̧u̧: —I̧jȩkua̧'a̧ to'kuäjätukumä ya̧tȩrü̧'i̧nä̧ jikuäwätukuä, ubo I̧tti̧ wa'arettü ttoächomȩbü päi'ünä̧.

San Mateo 8:26

Pättäku päinä̧u̧: —¿Tta̧'a̧nü̧ pä'ü yekuekuätukua'ajä̧ttü̧, ukutumä̧, Dio-rümä̧ kua̧'kua̧ wȩnä̧ro̧ko̧tü̧jä̧ tä̧jí̧? Pä'ü kkä̧nü̧, ä̧rä̧mi̧'ü̧ kkä̧rü̧'kopparü'i̧nä̧, rü̧ä̧ duborarü'i̧nä̧ ujuruku woi'omȩnä̧ o'kajuiyünä̧tä̧ wirochi'ina̧'a̧.

San Mateo 17:19

Jua̧u̧nü̧ o'ka'a Jesú-mä̧ kkatä päi'omȩttü̧ u̧wo̧juȩtä̧u̧mä̧ jä'epü ttä̧ju̧kui̧nä̧ku̧: —¿Tta̧'a̧nü̧ pä'ü, ujutumä̧ epíritu su̧ro̧pa̧rü̧mä̧ rä'epü tiku juiyünä̧ jä̧ja̧'a̧kuä̧ttü̧?

San Marcos 11:22

Ja̧'wa̧nü̧ päku, Jesú-mä̧ ädätinä̧ku̧: —Dio-rü kua̧'kua̧ wȩnä̧rä̧tu̧kui̧.

San Mateo 14:29

—Päku, Jesú-mä̧: —Ichi, päinä̧ku̧, Ja̧'wa̧nü̧ ja̧'a̧ Peduru-mä̧ woi'kattü mȩyȩwä̧chü̧ aje wä̧mo̧tonä̧ Jesú ü̧ja̧'a̧ku̧ 'chi̧nü̧.