Biblia Todo Logo
Bib sou entènèt

- Piblisite -




Hechos 26:18 - Nuevo Testamento Uwotjüja

18 tti'äre bakuepa pä'ü, yo̧ü̧ttü̧ tȩya̧u̧ku̧ tti'ärowächa pä'ü; Satanás ujuruttü Dio-ku tti'ärowächa pä'ü; suronä̧ jȩttä̧'i̧ja̧'a̧, jua̧u̧ jȩpü̧ chi̧kuä̧u̧, tta̧'kua̧ wȩnä̧kuä̧wä̧ ttüttü tȩmä̧kua̧'a̧nü̧, surojü jui'ätü jü̧nä̧tä̧.

Gade chapit la Kopi

TÄ̧DO Ä̧CUÄ̧ I̧HUȨNȨ

18 Jahuätörö ttö'äre bacuhue'a pä'ö huedäcujä, yo̧ö̧cu̧ cuettächö juiya pä'ö, tȩa̧u̧cu̧ cuettächa pä'ö, ja̧'hua̧ta̧nö̧ ähuettä jahuätörö hueomenä, ja̧u̧ru̧ ttesetö juiyönä Diosrö pä̧huä̧ rö̧jö̧tä̧ jȩtta̧ pä'ö. Ja̧'hua̧ta̧nö̧ ttörö ttesetomenä, suronä jȩttö̧ jȩpö̧ icua pä'ö Dios, jahuätö'inä ttörö esetätöcu adiu ttö̧ja̧cua̧ pä'ö, jahuätörö huedäcujä”, pä'inö ttörö, ru̧hua̧ Agripa.

Gade chapit la Kopi




Hechos 26:18
90 Referans Kwoze  

Ja̧'wa̧nü̧ ja̧'a̧nä̧ ukutumä̧ ya̧tȩ i̧tti̧mü̧ jü̧nä̧ ü'ojo'inä̧u̧jä̧, ru̧wa̧ Rey-rü ppädärä̧kuä̧wä̧ i̧sa̧ sacerdote jü̧nä̧'i̧nä̧, pi̧jä̧ ruwäkuiyä ttü̧ja̧ surojü jui'ätü jü̧nä̧'i̧nä̧, Dio aditäwä adiwäjuei jikuäwätukua pä'ü, yo̧mȩttü̧ rä'epü iku i̧tȩya̧u̧ra̧'a̧ku̧ wopinü̧rü̧.


Ja̧'wa̧ta̧nü̧ jädepomȩnä̧mä̧, kua̧mi̧so'kituku'i̧nä̧ bawekuächünä̧ i̧tȩya̧u̧ kkä̧dȩpa̧ pä'ü jä'epüsä, tta̧tä̧rä̧'i̧jü̧mä̧ ji̧yȩja̧ ja̧'a̧ tä̧jí̧ pä'ü kkä̧nü̧ churutä esetätürü iäre i̧yä̧kuȩ ukuou'i̧nä̧ ku̧wo̧juä̧tu̧kua̧ pä'ü.


isopäi'ünä̧ ji̧yȩnü̧ mo̧ro̧mä̧ yo̧ü̧nä̧ kka̧kui̧nä̧tü̧jä̧, ja̧'wa̧nü̧ ja̧'a̧nä̧ jitämä̧, Tu̧ru̧wa̧nä̧mä̧ tȩya̧u̧ wotüjä̧; ja̧'wa̧nü̧ ja̧'a̧ttü̧ tȩya̧u̧ i̧tti̧mü̧ jü̧nä̧ kka̧kuä̧tu̧kui̧.


Ja̧'wa̧nü̧ ja̧'a̧ttü̧ chawaruwä chü̧jä̧wa̧tü̧ Dio u̧mü̧nä̧ wedipä̧u̧jä̧ ja̧'wa̧ta̧nü̧ rettü iyipinü̧ i̧wȩnȩnä̧. Jua̧u̧tä̧tä̧ ja̧'a̧ Epíritu jäwänä̧ buojuokuätukunä̧ ppä̧dä̧kua̧mä̧ ja̧'wa̧ta̧nü̧ Chutä ȩmi̧nä̧u̧ o'katoi'ünä̧rü̧ chi̧yä̧kua̧sä̧ pä'inü̧, iyümä̧.


Isopäi'ünä̧ Chutä Dio-tä, yo̧mȩttü̧ tȩya̧u̧ kkä̧dȩpa̧ pä'ü jȩpi̧nü̧tä̧ ja̧'a̧, tta̧mi̧'iso'kinä̧ tȩya̧u̧ kkä̧dȩpa̧ pä'ü'i̧nä̧ jȩpi̧nü̧mä̧, jua'amä̧ Jesucrito-nä̧tä̧, Chutä Dio ü̧rü̧ä̧ tu̧wo̧jui̧ya̧rü̧ pä'ü.


Jesú-mä̧ pä'äjita'anü̧ ttü̧ja̧rü̧ pä'inü̧: Ttütäsä pi̧jä̧ttü̧ tȩya̧u̧mä̧; ttüku ichümä̧, yo̧ü̧nä̧mä̧ kue'ächokü jä̧kua̧, pärokuä tȩya̧u̧ tta̧'kua̧rü̧tä̧ u̧ju̧nä̧rä̧kua̧.


Rü̧ȩnä̧ yo̧ü̧nä̧ kka̧kuä̧tü̧rü̧ ja̧'wa̧ta̧nü̧ wa'are ujurunä̧ kka̧kuä̧tü̧rü̧ tȩya̧u̧ i'chächü iya pä'ü. Ja̧'wa̧ta̧nü̧ wȩnȩ jui̧yä̧mä̧nä̧ ti̧'chü̧nä̧ weye juoepa pä'ü.


Juätümä̧ tta̧mü̧kuädü'i̧nä̧ yo̧ä̧chä̧chi̧nä̧u̧, Dio jäwä a̧'kua̧rä̧kuä̧wä̧ttü̧mä̧ otó wotü, yoriso jerupü tta̧mi̧ 'kittädäkuäwina̧'a̧ttü̧.


Jesucrito-rü esetokotü jȩttü̧nä̧mä̧ ppäkuächä̧rä̧tu̧kuä̧, ji̧yȩtȩnä̧'i̧nä̧. Adiwä jueimä̧, surojükumä̧ i̧mi̧ku̧ jäwä ja̧'a̧. Ja̧'wa̧ta̧nü̧ yo̧ü̧'i̧nä̧, tȩya̧u̧ku̧mä̧ ji̧nä̧ ji̧yȩtȩmä̧ jo̧ka̧'a̧.


Ja̧'wa̧nü̧ ja̧'a̧ttü̧, esetokotürümä̧, pi̧jä̧nä̧ttü̧ ttü̧ä̧nä̧wa̧mä̧ ttu̧wo̧juö̧ juiyünä̧ ä̧to̧dü̧ ikuinä̧u̧, jareü wȩnȩ i̧tȩya̧u̧ Crito üadiwä kkä̧dȩpü̧ juiyatü pä'ü, jua̧u̧mä̧ Dio a̧'kua̧juä̧ ja̧'a̧ttü̧.


Surojü jȩpü̧ kkü̧mä̧ äwettä i̧sa̧ ja̧'a̧; isopäi'ünä̧ äwettämä̧ ä̧kuo̧mȩnä̧ttü̧tä̧ päi'ünä̧ surojü jȩi̧na̧'a̧ttü̧. Isopäi'ünä̧ Dio I̧tti̧mä̧ ichinü̧, äwettä aditäwä si'epü ikua pä'ü.


Peduru-mä̧ ädätinä̧u̧: —Suronä̧ jȩ'kuä̧'i̧jä̧tu̧ku̧ttü̧ kä'ädäkuäu Jesucrito i̧mi̧nä̧ yotukunä̧ bautizo jȩpä̧kuä̧wä̧tu̧kui̧; suronä̧ jȩ'kuä̧tu̧ku̧ Dio jȩpü̧ ikuomȩnä̧, pärokuä Epíritu Sa̧tu̧ iyü kuȩmä̧tu̧kua̧ pä'ümä̧.


Ujutumä̧ Dio-ku ji̧nä̧ ji̧yȩtȩ wotüjä̧ ja̧'wa̧ta̧nü̧ pi̧jä̧ ttü̧ja̧mä̧ o'katoi'ünä̧ äwettä weünä̧tä̧ kka̧kuä̧tü̧.


Isopäi'ünä̧ suronä̧ jȩta̧'a̧, iweye ja̧'wa̧nü̧tä̧ wa̧sä̧ pätäuttümä̧, Dio-mä̧ adiwä juei, ppä'ädü ja̧'a̧ttü̧, suronä̧ jȩtä̧'i̧jü̧mä̧ aditü i̧kuä̧u̧jä̧.


Judío-rü'i̧nä̧, griego-rü'i̧nä̧, ji'äwä'ijüsä Dio-ku ppa̧'ä̧chü̧, Tu̧ru̧wa̧ Jesucrito-rü tteseta pä'ümä̧.


Ja̧'wa̧ta̧nü̧ i̧mi̧mä̧ pi̧jä̧ o'kajuiyünä̧tä̧ jiäkuäwäkua'a, suronä̧ jȩttä̧'i̧jü̧ kättädi'a pä'ümä̧, Dio surojü jȩpo̧ko̧tü̧ 'kua̧rü̧nä̧ jȩpü̧ ikuatü pä'ümä̧. Jerusarȩ́-ttü̧ kkä̧mä̧dü̧ jiäkuäwäkua'a.


Juȩnȩmä̧, yorisotä surojümä̧ doächoka'a jä̧kua̧'a̧, ya̧tȩ surojü jȩpü̧'i̧nä̧, yapareu'i̧nä̧ do'ächokü jä̧kua̧, jua̧u̧ ja̧jü̧ jueimä̧ kkä̧kuä̧wä̧ kuyäru'tä, oweja mü̧ä̧ya̧ jü̧nä̧ wa̧ üäre'tänä̧ i̧mi̧ rü̧tä̧rü̧tä̧ do̧ä̧chä̧kua̧.


Ja̧'wa̧nü̧ ja̧'a̧ttü̧ ä'kojimä̧ oweja-tü̧ re'tewächätü jä̧'i̧nü̧'a̧nü̧ kue'ächinä̧tü̧jä̧, ja̧'wa̧nü̧ ja̧'a̧nä̧ jitämä̧ Crito-nä̧ ppa̧'ä̧chinä̧tü̧jä̧, Pató jä̧'i̧nü̧'a̧nü̧ ukuturu to̧pä̧rü̧ tta̧'a̧ru̧nä̧.


Ja̧'wa̧nü̧ ja̧'a̧ttü̧ tta̧'kua̧ wȩnä̧rä̧kuä̧wä̧ juiyünä̧ Dio-rü eseunä̧ jȩä̧kuä̧ juiya'a; ja̧'wa̧nü̧ ja̧'a̧ttü̧ Dio-rü kutü'küwächi'omȩnä̧mä̧, Kkü̧ pä'ü esetünü̧, usätürümä̧ adiwä juei ppä'ädü pä'ü ttesetarü pä'ü ja̧'a̧.


Tu̧ru̧wa̧mä̧, pa̧'a̧nü̧ pä'ü weinä̧u̧jä̧: «Ukurumä̧ kku̧nu̧sä̧, judío pokotürü tȩya̧u̧ kkȩdȩpü̧nä̧ ku̧ja̧ pä'ü, pi̧jä̧ beipomȩbü päi'ünä̧ surojüttü kki̧'ä̧kuä̧wä̧ ȩpü̧ kuiya pä'ü,».


ja̧'wa̧nü̧ ja̧'a̧ttü̧, Dio-mä̧ ujutu jü̧ta̧'a̧nü̧tä̧ jȩi̧nä̧u̧, tta̧'kua̧ ttu̧wȩnä̧ra̧'a̧ttü̧, tta̧mi̧ iso'ki tükü ikumä̧.


Jua̧u̧ru̧mä̧ Dio-mä̧ u̧wo̧jua̧'a̧ku̧nä̧ rütäu, ru̧wa̧ päi'ünä̧ jȩpü̧ ra̧wä̧pi̧jü̧ttü̧ ttü̧ji̧pü̧nä̧ ppädäkuäwä i̧sa̧ päi'ünä̧ jȩi̧nä̧ku̧, Irae ttü̧ja̧rü̧ suronä̧ jȩttü̧ttü̧ kättädi'a pä'ü ja̧'wa̧ta̧nü̧ suronä̧ jȩttä̧'i̧jü̧ jȩpü̧ ikuatü pä'ü.


Ji̧nä̧ pi̧jä̧nä̧ chü̧jä̧i̧mä̧, Ttütäsä pi̧jä̧ i̧tȩya̧u̧sä̧.


Pa̧'a̧nü̧ jo̧mȩnä̧ ro̧ȩpä̧kua̧ Dio-mä̧: Ttümä̧ pi̧jä̧ra̧'a̧ ichinü̧sä̧, Ttütä ja̧'a̧ tȩya̧u̧, yo̧mȩ kkȩdȩpü̧mä̧; ja̧'wa̧nü̧ ja̧'a̧nä̧ ttü̧ja̧mä̧ yo̧ü̧tä̧ eseu repe'ätü, surojütä jȩtta̧'a̧ttü̧.


Ukutu chi̧tti̧mü̧ wotürü, wȩyu̧tu̧ we'üsä; ukutu suronä̧ jȩ'kuä̧'i̧jä̧tu̧ku̧mä̧, Jesucrito jȩi̧nü̧nä̧tä̧, Dio-mä̧ jȩpü̧ i̧kui̧nä̧u̧jä̧ pä'ü.


Ja̧'wa̧ta̧nü̧ ukutu Dio mo̧ro̧jä̧nä̧ adiu jȩpü̧ u̧ju̧ni̧nü̧ toe'ächokü, joächächokü ju'to kuiäretuku päi'ünä̧ kuȩmä̧tu̧ku̧nä̧ jȩä̧kuä̧u̧jä̧.


Jueü wȩnȩ kui̧wȩnȩ pä'aku surojü juittächächünä̧ jȩpi̧tü̧; kui̧wȩnȩmä̧ jueü wȩnȩ ja̧'a̧ttü̧.


Jua'amä̧ kki̧'i̧kuä̧ wȩnȩ ttu̧wo̧jui̧pü̧nä̧ kuiya pä'ü, ja̧'wa̧ta̧nü̧ suronä̧ jȩttä̧'i̧jü̧ttü̧ rä'epü ikuatü pä'ü,


Ttü Juda, Jesucrito u̧mü̧wä̧ya̧ jü̧nä̧ wa̧ ja̧'wa̧ta̧nü̧ Sa̧ti̧a̧ku̧'i̧nä̧ ü̧jä̧wa̧, chi̧wȩnȩ we'üsä: ukutu Jä'o Dio repe'ü ȩmi̧nä̧u̧ru̧ ja̧'wa̧ta̧nü̧ Jesucrito-nä̧ tta̧wä̧rä̧u̧ru̧.


Chawaruwä chü̧jä̧wa̧tü̧ pi̧yȩ adiu ä̧ju̧kuä̧tu̧kui̧: Dio-mä̧ pi̧jä̧nä̧ttü̧ usurä isotürü pojopü ȩmi̧nü̧ tta̧'kua̧ wȩnä̧rä̧kuä̧wä̧nä̧ ruwotü juotta pä'ü, ja̧'wa̧ta̧nü̧ eseu rȩpȩä̧u̧ru̧ Ru̧wa̧ Dio iäre ju'to uruwotü pätti'ünä̧, chi̧yä̧kua̧sä̧ päinü̧ ji̧nü̧ ttȩma̧ pä'ümä̧;


ja̧'wa̧nü̧ ja̧'a̧ttü̧ ofrenda pättümä̧, ji̧yȩtȩtä̧ jȩa̧'a̧nä̧, 'kuäopünä̧tä̧ jo̧mȩnü̧ mikuäwächünä̧ jȩpi̧nü̧.


Ja̧'wa̧nü̧ ja̧'a̧ttü̧, Jesucrito-nä̧tä̧ Abraha̧-rü̧, Dio iya päinü̧ adiwä jueimä̧ judío pokotürü'i̧nä̧ rȩbȩä̧kuä̧wi̧na̧'a̧. Ja̧'wa̧nü̧ jo̧mȩttü̧, ta̧'kua̧ tu̧wȩnä̧ro̧mȩnä̧mä̧, Dio iya päinä̧ku̧ Epíritu Sa̧tu̧rü̧ ȩmä̧tü̧jä̧.


Ja̧'wa̧nü̧ ji'äu, ttu̧wo̧jui̧pü̧nä̧ tta̧mü̧kuädü bawepinä̧u̧, wȩyu̧kuä̧ wȩnȩ ttu̧wo̧jui̧pa̧ pä'ü.


Jua̧u̧ wo̧jui̧'ü̧tä̧ äwettä ttä̧tȩkuä̧ jȩpü̧ u̧ju̧ni̧no̧mȩmä̧ ttü̧ttȩpä̧ri̧'ä̧kuo̧tü̧, ja̧'wa̧nü̧ jo̧mȩnä̧ juorümä̧ tüttipächäkuotü. Jitätämä̧ ji̧nä̧ äwettämä̧ kärenä̧ rü̧tä̧rü̧ kkä̧nü̧ churutä pä̧wä̧rü̧jo̧mȩnä̧ jȩä̧u̧.


Isopäi'ünä̧ mikuä juiyünä̧tä̧ surojüttümä̧ kka̧kui̧pi̧nä̧tü̧jä̧, kua̧'kua̧ ku̧wȩnä̧rä̧tu̧kuo̧mȩttü̧, jua'a'i̧nä̧ ukutu jäwä jo̧ka̧'a̧tä̧, Dio rettü ppädina̧'a̧tä̧.


Ja̧'wa̧ta̧nü̧ Crito-nä̧mä̧, Chutä iäre tȩma̧ pä'ü ä'kojitä päi'ünä̧ ü'ojo'inä̧u̧jä̧, Chutä o'kajuiyünä̧ jȩpü̧ ja̧'a̧ttü̧, churutä pä̧wä̧rü̧jo̧mȩnä̧tä̧.


Ja̧'wa̧nü̧ ja̧'a̧nä̧, Chutä Dio-tä ja̧'a̧ ukuturu Jesucrito-ku ji̧nä̧ ji̧yȩtȩ päi'ünä̧ jȩpi̧nü̧mä̧ ja̧'wa̧nü̧ jȩpü̧ Crito-nä̧mä̧ wo̧juä̧wä̧ kkü̧nä̧, adiwomȩnä̧ jȩä̧kuä̧wä̧ kkü̧nä̧, 'kȩ'ȩpü̧ ȩmä̧wo̧tü̧ jü̧nä̧'i̧nä̧ ja̧'wa̧ta̧nü̧ mitäu ȩmi̧nä̧u̧ jü̧nä̧'i̧nä̧, jȩi̧nä̧u̧jä̧.


Dio i̧sa̧ Epíritu ttünä̧tä̧ kkü̧, Jua'amä̧ ȩmi̧nä̧ku̧ cha'attü, usurä isotürü adiwäjuei jareü wȩnȩ ȩpü̧ chiya pä'ü; weinä̧ku̧sä̧ tta̧mi̧ iso'kinä̧ usurä ȩmä̧wä̧tü̧rü̧ aditü chikua pä'ü. Kärenä̧ pȩjä̧tü̧rü̧ rä'epü chikua pä'ü. Ja̧'wa̧ta̧nü̧ ä̧to̧kä̧tü̧rü̧ tottünä̧ jȩcha̧ pä'ü; suronä̧ jȩttä̧u̧ usurä ȩmä̧wä̧tü̧rü̧ rä'epü chikua pä'ü;


Jua̧u̧tä̧ ja̧'a̧ pi̧jä̧ ttü̧ja̧ o'katoi'ünä̧rü̧ tȩya̧u̧nä̧ kkȩdȩpä̧kua̧mä̧ ja̧'wa̧ta̧nü̧ Irae ttü̧ja̧ tteseunä̧ jȩä̧kua̧mä̧.


Ttü̧ja̧ yo̧ü̧nä̧ kka̧kui̧nä̧tü̧mä̧ rü̧ȩnä̧ tȩya̧u̧ tottäkuotü; ji̧yȩtȩ tȩya̧u̧, kkä̧dȩpä̧kua̧'a̧ wa'are isoppanä̧ kka̧kuä̧tü̧rü̧.


Jua̧u̧nä̧tä̧ Dio-rü pä̧wä̧rü̧ji̧nü̧nä̧ surojümä̧ jo̧mȩnü̧ jȩpü̧ ikuinä̧u̧jä̧, Jesucrito idepä jä̧ttä̧pä̧ya̧, ofrenda jü̧nä̧ ya'utenä̧tä̧ ji̧nü̧mä̧, 'kuäopünä̧tä̧ mikuäunä̧ jȩpü̧ kku̧ni̧nü̧.


Ja̧'wa̧nü̧ ja̧'a̧ttü̧, Jesucrito-nä̧mä̧ jitä jareünä̧ esekuinü̧nä̧ dodepätüjä̧. Jua'amä̧ wa'arenä̧ 'korujuoächomȩnä̧ ä̧kuo̧mȩnä̧ esekuinü̧ jäwänä̧ kkä̧nü̧ suronä̧ jȩtti̧nü̧ttü̧mä̧ rä'epü ikuäu̧jä̧. Ja̧'wa̧nü̧tä̧ Dio woinä̧u̧mä̧ isopäi'ünä̧tä̧ ttȩmä̧kuo̧tü̧jä̧, i'ko iyatü päinü̧mä̧.


Ja̧'wa̧nü̧ ja̧'a̧ttü̧ pä'a: Ukú ä'ümä̧, porächi'i; ja̧'wa̧ta̧nü̧ wa'ü ikuinä̧tü̧ttü̧ ä̧rä̧mi̧'i̧, ja̧'wa̧nü̧ jȩ'kuo̧mȩnä̧ Crito i̧tȩjä̧dä̧kua̧jä̧.


Ujuturu Dio iya päinü̧mä̧ Jua̧u̧ Epíritu-nä̧ todepätüjä̧, o'katoi'ünä̧ ukutu u̧mü̧wä̧yotürü rä'epü ikuomȩbü päi'ünä̧. Ja̧'wa̧nü̧ jo̧mȩttü̧ Dio ü̧rü̧ä̧ esewätüjä̧.


Jua̧u̧ ukuojänä̧tä̧ i̧mi̧tä̧wi̧nä̧u̧jä̧, suronä̧ jȩtä̧'i̧ja̧'a̧mä̧, rȩrü̧jü̧ toäkuäwä u̧ju̧nä̧ra̧'a̧ttü̧,


Ukuturu ji̧yȩtȩtä̧ jä'epü chä̧ju̧kua̧ pä'üsä: ¿Dio i̧sa̧ Epíritu-rumä̧, toku kuȩmi̧nä̧tu̧kuä̧ttü̧: weäwä wȩnȩ kukuotätukuomȩnä̧; ja̧'wa̧nü̧ jo̧ka̧'a̧ jü̧ttü̧'i̧nä̧ kua̧'kua̧ wȩnä̧rü̧ kuä̧ju̧kuä̧tu̧kuo̧mȩnä̧ jo̧ka̧'a̧ ji̧na̧'a̧ tä̧jí̧?


Ja̧'wa̧nü̧ ja̧'a̧ttü̧ jitämä̧ a̧'kua̧ro̧kü̧sä̧, Crito-tä ja̧'a̧ ttünä̧ a̧'kua̧rü̧ kkü̧mä̧; jitä pi̧jä̧ttü̧ chidepänä̧ a̧'kua̧rü̧ chü̧jü̧mä̧, Dio i̧tti̧, ttürü re kkä̧nü̧ iyäkuäwinü̧nä̧ cha̧'kua̧ wȩnä̧rü̧ chü̧jü̧tä̧ ja̧'a̧.


Ja̧'wa̧nü̧ i̧tti̧mü̧ ta'amä̧, iya päinü̧mä̧ tiäremä̧ tȩmä̧kuo̧tü̧jä̧ ja̧'wa̧ta̧nü̧ Crito üäremä̧ ujutu'i̧nä̧ tüäre ja̧'a̧, chutäku usurä tȩmä̧u̧ttü̧mä̧, chutäku uruwonä̧ iyäwi'äkuä̧u̧jä̧.


Pä'inä̧tü̧, Crito-mä̧ 'korujuoächä̧kua̧, 'korujuo'ächi̧'ü̧'ka̧ jua̧u̧ jä̧kua̧'a̧ ä̧kuo̧mȩnä̧ wa'inä̧tü̧ttü̧ tto̧ä̧chä̧kua̧mä̧ tȩya̧u̧ jiäwa pä'ü, judío-rü'i̧nä̧, judío pokotürü'i̧nä̧, jü̧nä̧.»


Profeta-mä̧ o'katoi'ünä̧, pide Jesú ütü'kümä̧ jittäwinü̧ o'ka'a ji̧na̧'a̧, Jua̧u̧ru̧ esetätümä̧ o'katoi'ünä̧ suronä̧ jȩttü̧ttü̧mä̧ jȩpü̧ i̧kuä̧kuä̧u̧ pä'ü.


Ja̧'wa̧nü̧ ja̧'a̧ttü̧, suronä̧ jȩ'kuä̧'i̧jä̧tu̧ku̧ kä'ädi'ü, Dio-ku ppa̧'ä̧chä̧tu̧kui̧, suronä̧ jȩ'kuä̧'i̧jä̧tu̧ku̧ jȩpü̧ ikuätukuaku pä'ümä̧; Dio-ttü unichä̧rü̧ eseu kkä̧kuä̧wä̧ ichäkua'anü̧.


Jua̧u̧nü̧ o'ka'a Jesú-mä̧ pä'inü̧: —Adiu ja̧ pä'ü'i̧nä̧, surojü ja̧ pä'ü'i̧nä̧ jiäu ichinü̧sä̧, ä̧to̧kä̧tü̧mä̧ totta pä'ü ja̧'wa̧ta̧nü̧ topätümä̧, ttä̧to̧kä̧cha̧ pä'ü.


Ja̧'wa̧nü̧ ja̧'a̧nä̧, ttü chiyoyattü awätümä̧, yorisotä ttawa a̧di̧ri̧jo̧ko̧u̧ ttäkuotü; pärokua'aku ttü chiyoya ajiyamä̧, jitünä̧tä̧ rȩjȩ jakuättü räopoya jä̧'i̧jü̧'a̧nü̧ jä̧kuä̧u̧, kkä̧kuä̧wä̧ i'kora̧'a̧ku̧tä̧ ȩpa̧'a̧ttü̧.


Päjiyäku, Jesú-mä̧ ädätinä̧kua̧: —Isopäi'ünä̧, Dio rettü iyü'i̧nä̧ ja̧'wa̧ta̧nü̧ ukuru, ajiya chawa iyittü pä'ürü'i̧nä̧ ku̧wo̧juö̧ttü̧mä̧, ukutätä jua̧u̧ru̧ jä'epajajujä̧, jäkuepäkumä̧ ajiya a̧'kua̧rü̧ kkoya iyakuajä̧,


Päomȩnä̧, Jesú-mä̧ ädätinä̧ku̧: —Satanás täkü täi, wȩyu̧kuä̧ wȩnȩmä̧ pä'a: Ku̧ru̧wa̧ Dio-rütä kuiwe'kiyunä̧ mä̧'ä̧mü̧ esewirü ja̧'wa̧ta̧nü̧ Jua̧u̧ weütätä tukuota pä'ü ja̧'a̧.


«Ja̧'wa̧nü̧ jä̧ku̧, ¡ru̧wa̧ rey Agripa!, jarodokü pinü̧sä̧ mo̧ro̧jä̧ jäwä i̧jȩkuo̧mȩnä̧mä̧,


Ja̧'wa̧ta̧nü̧ u̧wä̧juö̧ juiyü yo̧ü̧nä̧mä̧ ppä̧kuä̧chä̧rä̧, pärokua'aku, pä̧i̧ku̧nä̧ ya'okui'ütä ya'okui'i.


Isopäi'ünä̧ ujutumä̧, pi̧jä̧ ttü̧ja̧ jü̧'a̧nü̧ ttidepä'i̧nä̧, ttiwe'kiyu'i̧nä̧ kku̧nä̧rä̧tu̧ku̧mä̧ rowäwokotüjä̧, pärokua'aku ruwo we'ätuku, ttujuru kku̧nä̧rä̧tu̧ku̧, ja̧'wa̧ta̧nü̧ pi̧jä̧ttü̧ yo̧ä̧jä̧nä̧ we'ätuku, epíritu wotü suropätü mo̧ro̧jä̧nä̧ we'ätuku rowäwätüjä̧.


Swiv nou:

Piblisite


Piblisite