Saray Tagleey 1:14 - Maung a Balita Biblia

¹⁴ Inlista ton amin iray kasalanan ko, insan to ra binerber ya amin; Imbitin to ra ed beklew ko, et kinmapoy ak lapud saya. Impalima ak na Katawan ed saray kalaban ko, tan siak so sarasarag da.

Maung A Balita Biblia

¹⁴ “Inlista ton amin iray kasalanan ko, insan to ra binerber ya amin; Imbitin to ra ed beklew ko, et kinmapoy ak lapud saya. Impalima ak na Katawan ed saray kalaban ko, tan siak so sarasarag da.

Saray Tagleey 1:14 Referans Kwoze

Isaias 47:6

Akapasnuk ak ed saray totook; impasen kon ag ko la ra kayaryan: Impasilong ko rad pakayarim, et ag mo ra kinasian; anggan saray mamatakken pinairap mo ran tuloy.

Deuteronomio 28:48

Kanyan sirin panlingkuran yo ray kalaban yo a say Katawan et ibaki to ran mibakal ed sikayo. Naerasan, naapgaan kayo, tan naandian kayoy ikawesamin a nakaukolan yo. Pairapen kayon mapalalo na Katawan ya anggad ompatey kayo.

Ezekiel 25:7

Lapud onmay ginawa yo, ipalima ta kayod pakaoley da ray bansa a mangala tan manamsam ed saray kayaryan yo. Sigput ta kayon deralen, pian magmaliw kayon aliwa lan bansa tan ag kayo la nawalaan na dilin bansa a panayaman yo. Diad satan nakabatan yo a siak so Katawan.

Ezekiel 25:4

Lapud akaliket kayo, abuloyan kon taloen kayo na saray tribu ed nibokig a kalawakan. Ipasen dad bansa yo iray kampo ra tan manayam irad man. Kanen da ray bungay tanaman yo tan inomen da ray kayaryan yon gatas.

Jeremias 28:14

Inkuan na Katawan a Makapanyarin-amin, say Dios na Israel, ya inan toy pakon balatyang so tenger na sarayan amin a bansa, tan panlingkuran day Ari Nabucodonosor iray ayayep ed katakelan.

Probirbio 5:22

Sakey a patit iray kasalanan na maoges a too. Naerel so maoges a too ed iket na dilin kasalanan to.

Oseas 5:14

Ondogpa ak a singa lion ed Israel tan diad Juda. Siak a dili so mambingbingkas ed sikara, insan ko ra taynan. No igayugoy ko ra, anggapoy makapangilaban ed sikara.

Ezekiel 23:28

Sikato yay ibabaga na Katawan a Dios: Ipalima ta kad saray totoon kabosul tan pakakaingungotan mo.

Ezekiel 21:31

Nalikna yo so sulit na pasnuk ko no singa apoy ya idapok ed sikayo. Insan ipalima ta kayod saray maruksan totoo a marunong iran manderal.

Ezekiel 11:9

Ipaway ta kayod siudad tan ipalima ta kayod saray taga arum a bansa. Sinintinsiaan ta kayon ompatey,

Jeremias 37:17

Insan impaawit ak nen Ari Sedekias, tan maamut ton tinepet ed siak diman ed palasio, Walay papaibaga na Katawan? Inmebat ak, Wala! Nipalima kad ari na Babilonia.

Jeremias 32:5

Niakar ed Babilonia si Sedekias, tan manayam diman ya anggad arapen kon tulongan. Anggano mibakal ed saray tagan Babilonia, ag manalo. Siak, say Katawan, so nansalita.

Jeremias 27:12

Onya met so inkuankod kinen Ari Sedekias na Juda, Paoleyan kad ari na Babilonia. Manlingkur kad sikato tan saray totoo to, et mambilay ka.

Jeremias 27:8

Balet no walay bansa odino nanarian ya ag onsilong ed pakaoley nen Nabucodonosor tan ag ontoluk ed pakaoley to, dusaen ko itan a bansa diad panamegley na bakal, eras, tan salot, anggad sigput a napaderal kod sikato.

Jeremias 25:9

Tawagen kon amin iray totood baybay tan say aripen kon Ari Nabucodonosor na Babilonia. Pibakalen ko ra sumpad sayan bansa tan amin a manaayam dia tan amin a kaliber-liber ton bansa. Deralen ko ya anggad angga yan bansa tan saray kaabay to, paolyan ko ran aderal-deral ya anggad angga, makapataktakot tan makapasinagem iran nengnengen.

Isaias 14:25

Deralen kod dalin na Israel iray taga Asiria tan igatin-gatin ko rad kapalandeyan ko. Ekalen kod panamairap na taga Asiria iray totook tan saray ambelat a nipasakbat ed sikara.

Jeremias 28:13

ya onla ak a mangikuan ed kinen Ananias, Inkuan na Katawan a nayarian mon poteren so pakon kiew, balet salatan to na pakon balatyang.

Jeremias 32:3

Impriso ak diman nen Ari Sedekias tan inakusa to ak ya imbawag kon say Katawan kuanto, Ipadakep ko yan siudad ed ari na Babilonia,

Mikias 2:3

Kanyan sa Katawan kuanto, Mangyakar ak na deral ed sikayo tan ag yo ya nibatikan. Nagulo-gulo kayo, tan diad satan ag kayo la makapanakar a mataltalker so tenger yo.