Puyan 7:10 - Maung a Balita Biblia

¹⁰ Ineyag day maksil, Say kilalaban manlalapud Dios tayo ya akayorung ed trono, tan say Kordiro!

Maung A Balita Biblia

¹⁰ Ineyag day maksil, “Say kilalaban manlalapud Dios tayo ya akayorung ed trono, tan say Kordiro!”

Puyan 7:10 Referans Kwoze

Puyan 19:1

Kasumpal to ya, nadngel koy singa maksil a bosis na amayamay a totoo ed tawen ya inkuanda, Igalang yoy Dios! Say kilalaban, kagalangan, tan pakayari kayaryan ira na Dios tayo!

Saray Salmo 3:8

Say kilalaban manlalapud Katawan bindisionan to komun iray totoo to.

Puyan 12:10

Insan nadngel koy maksil a bosis ed tawen ya inkuanto, Sinmabi lay pangilabay Dios! Impanengneng la na Cristo so pakaoley to! Ta apataynan lad tawen so mangaakusan agew-labi ed saray agagi tayo, diad arap na Dios.

Isaias 45:21

Dago kayo tan iparontal yod korti so dalem yo; mampapanonan komun iray nidalem. Siopay abayag lan angipasakbay ed agawa? Aliwa tan siak, say Katawan, say Dios so mangilalaban ed saray totoo to? Anggapo lay arum a Dios likud ed siak.

Puyan 22:3

Diad saman a siudad anggapoy naalmon antokaman ya insambay Dios. Naalmod saman a siudad so tronoy Dios tan say Kordiro, tan mangigalang ed sikato ray aripen to.

TAGA-EFESO 2:8

Ta lapud baleg a panangaroy Dios nilaban kayo la diad panamegley na pananisia. Impangaroy Dios yan kilalaban, ag nanlapud sikayon dili.

Juan 1:29

Diad kaimbwasan, anengneng nen Juan si Jesus ya ondaragod sikato. Inkuanto, Nia so Kordiro na Dios a mangekal na kasalanay sankamundoan.

Isaias 43:11

Bukbukor ko so Katawan, siak labat so makapangilaban ed sikayo.

Puyan 21:5

Insan inkuanto may akayorung ed trono, Natan, pasimbaloen ko ya amin iray bengatla! Inkuantod siak ed satan, Isulat mo ya, ta napanmatalkan tan tua ra yan salita.

Lucas 3:6

Tan nanengneng na amin a katoowan so panangilaban na Dios!

Jeremias 3:23

Anggapoy naalagar min tulong a manlapud saray diriyos a gagalangen mid saray toktok na kapokdulan. Manlapu labat ed Katawan a Dios mi so tulong a para Israel.

Puyan 5:7

Inmasingger imay Kordiro tan inala to may babasaen a nilokut a walad kawanan a lima to may akayorung ed trono.

Puyan 4:6

Diad arap na trono, walay singa salming a dayat a kaparparay linew na kristal. Akaliber ed trono, diad balang dapag to, so apatiran mabilay a pinalsa a napnoy mata so arap tan beneg da.

Juan 4:22

Sikayo ran Samaritano et ag yo amtay gagalangen yo, balet sikami ran Judio kabat mi no siopay gagalangen mi, ta saray Judio so panlalapway kilalaban.

Juan 1:36

Nen anengneng ton manaakar si Jesus inkuanto, Niay Kordiro na Dios!

Zacarias 9:9

Manliket kayo na baleg, sikayon totood Sion! Eyag kayod liket, sikayon totood Jerusalem! Nengneng yo, onsasabid sikayo so ari yo! Onsasabin analo tan sipapalabo, balet mapaabeba tan akakabayod sakey a kilaw na asno

Jonas 2:9

Balet mankanta ak na panangidayew ed sika; mangisaklang ak ed sika na bagat tan sumpalen ko so insipan ko. Manlalapud Katawan so kilalaban!

Oseas 13:4

Say Katawan kuanto, Siak so Katawan a Dios ya angipaway ed sikayo ed Egipto. Anggapo lay arum a Dios yo no ag siak labat. Bukbukor ko so manangilaban.

Isaias 45:15

Say Dios na Israel a mangilalaban ed saray totoo to et Dios ya iyaamut toy sikaton dili.

Saray Salmo 115:1

Sika labat, Katawan, sika labat, aliwan sikami so nepeg a pangitnay galang, lapud ag mangoman a panangarom tan say katooran mo.

Saray Salmo 37:39

Say Katawan ilalaban to ray totoon matonung tan iyaagel to ra no panaoy gunigon.

Zacarias 4:7

Naandipat ed arap mo iray bangen a singa ra palandey. Napasimbalom a nipaalagey so Timplo, tan diad pangiliram na sankasamputan a bato, saray totoo iyeyag da, Marakep, marakep!