Probirbio 30:11 - Maung a Balita Biblia

¹¹ Wala ray totoon isasamba ray kaamaan da, tan ag da pisasalamatan iray kainaan da.

Maung A Balita Biblia

¹¹ Wala ray totoon isasamba ray kaamaan da, tan ag da pisasalamatan iray kainaan da.

Probirbio 30:11 Referans Kwoze

Probirbio 20:20

No isambam iray ateng mo, mansamput a singa lamparaan a naerep ed kabilongetan so bilay mo.

Probirbio 30:17

Say toon luludlureyen toy ama to odino balbalawen toy akolaw lan ina to et nepeg a kanen na saray buitri, odino ipatoktok ed saray wawak ed katakelan iray mata to.

Deuteronomio 27:16

Napelag komun so samba na Dios ed siopaman ya ag to igalang so ama odino ina to. Insan onebat iray amin a totoo, Amen!

Exodo 21:17

Siopamay mangisamba ed ama to odino ina to, nepeg a pateyen.

Levitico 20:9

Say Katawan inter to ray onggendan a totontonen. Siopamay mangisamba na ama to odino ina to et nepeg a pateyen; sikaton dili so makasengeg na ipatey to.

1 Timoteo 5:8

Balet siopamay ag mangasikasod kakanayon to, lautlad saray kabyangay dilin pamilya to, imbeneg to lay pananisia tan alabas ni nen say aliwan mananisia.

1 Timoteo 5:4

No say sakey a balon bii et wala ray anak o apo to, saratan ya anak o apo et nepeg a gawaen dan manonaan so kanepegan dad pamilya ra, ta diad ontan makabales iray utang dan maung a linawa ed saray atateng da. Makapaliket ya ed Dios.

1 Pedro 2:9

Balet sikayoy apilin totoo, papari na Ari, sakey a bansan masanto, tan totoo na Dios. Say Dios pinili to kayon mangipulong na makapakelaw iran gawgawa to. Sikato met so anawag ed sikayod kabilongetan tan angyakar ed sikayod makapakelaw a liwawa to.

Mateo 3:7

Nen anengneng to ray amayamay a Pariseo tan Saduseo ya ondadagod sikaton mampabinyag, inkuantod sikara, Sikayon apoliyay oleg! Siopay angibagad sikayon naliktaran yoy sanuk na Dios ya asingsingger lan onsabi?

Malakias 1:6

Say Katawan a Makapanyarin-amin kuantod saray papari, Say anak papagalangan toy ama to, tan say aripen papagalangan toy amo to. Siak so ama yoakin et ag yo ak pagalangan? Siak so amo yo, akin et ag yo ak itday galang? Babalawen yo ak balet tetepeten yo, Panoy pamabalaw mid sika?

Probirbio 23:22

Dengel kad amam; no anggapo, anggapoy bilay mo. No akolaw lay inam, ipanengneng mod sikatoy utang na linawam.