9 Kyaman aren le omisyö kötuyö lokechan nko pögh cho ogheghan
Kalïkwï lok omisyenyan nyo omöy pöghet nko nangat. Kïmi pich kïtepanïn kïtenö osis lö, “Mi onö Tororötïngu nya?”
Kekonechanyi makatyanta nyarïl kyama akeghegha lok mpalaw nyo wow.
Chuto kegh ngwïny le moroyut, puluno wölo kögheto kegh ompö potana nko mïghö. Yokyini kegh ECHOTYON Tororötïnyo ompö kiwaghat.
Momwochï ngalechete pipö Kat, amoriryö kïtörengu lok! Omelmelenö kegh terïtyon ompö Peteleapra kuporï lö omikwa lok.
Karkegh nyinte ato kinam nko chi nyo omöy aren. Kegh nyinte kinonutkachi cho pö sölwontön kïchumpön ntömökïminye or nyo kingöroköy nyinte. Memukönye ntökïchömchï kegh lö körkeyïnoni nömo nyinte ewunyi kïmelö tororöt nyonikïny.
Kikonanïn chane ködöwï, otini kyamatanïn kömöy. Otini kyamatanïn maral, kïkonanïn chane ngwana.
Ompöwölo kilïkwï sönönötö omisyenyan, kariran kïtörengu lok le pögh.
Ompö ne tökïsilön söpontönyan le nyï? Kölö ne towongwan le nyï? Okönan Tororöt, osölan nyinte ngat. Sörunintenyan nyinte akï Tororötïnyan.