7 Akwa cho omi koro Papilon, oryöwunö lawel osorï Sayon!”*
Apeghena koro Papilon, kiketyakakwa! Amwatïtena lökoye ompö ngörekyö, akanya kenkïtunö wop anka tïkwïl lö, “Kösörï ECHOTYON mötworintenyi Yakopo!”
Atolapay alïman kuti anka nyo kingwïna yïm nyo kilentöy, “Ongetunenö pikachu wölo mi nyinte! Ongetunenö kanasyanta Papilon! Tömagh ngokï tïkwïl nko pipö kanasyantanoni, atömonyorï sito Tororöt nyo nyoru chane!
“Akïsöwintön kïmwa, ngal walaka cho chang, akukil kïlenchï, osörunenö kegh pïnï gha!”
Arye apeghena Papilon, sörunö chi anka tïkwïl söpontöngu! Orip kegh momeghyö kwïle akwompö ngoki Papilon. Ompöwölo pöroyïntanyan nyete nyo otökisïyi, omungan pipö Papilon kïrïp kegh nko ngokikwa,
Angeta apegha yi! Angetena koro Papilon! Amaswany kïgh nyo kïkïröy. Apeghena kwenunyi atïlil kegh, akwa cho opöy kari Kö pö Tororöt.
Kïkany kumïtuna chane kanasyan kïpka sany, kïlenchï malaykayan akong ompö malaykenichay, “Aryagha tosörunö kegh. Maros löt, amoghyongö wölnö le mpöghogh: oryöghchinö wölnö le kutïngkot, tömowonyö.”
Ochïtö ompö ngwonïn akwa pipö Sayon, le korka nyo kïghöy. Ompöwölo opeghenekwa kanasyantanï apa amang wuw. Opetekwa Papilon alïkwï pïnot. Kisörwokwa nyu ompö wölini, sörwokwa ECHOTYON, ompö mori pungkökwa.
“Akwa pikachu, pipö Israel, oryöwunenö korononi! Osörunö kegh kïtomö anyaran Papilon ompö sïngiryenyan nyo ngwan!
“Akwa pipö Israel, oryöwunenö koro Papilon! Angetena koro Papilonia lawel. Akarakegh nko kwagha nyo nyoghöy ngaror tagh!
Kutkutö kegh, we Yerusalem nyo kiketyakïn! Ngetunenö terïtyon aitöpö ngacharungu nyo pö paytagh! Tyaka sïrïmtin cho kikïrateninyi kat, we chepï pö Sayon* le pïnotyon!
Kïryagh pipö Israel löwïr cho kimi atoni otini kilïm riratengwa akïlö, “Keryagha atömelumech ngwïnya tïkwïl!”
Akïlenchï pich, “Owuwenö wölo mi Emeni pïchï ghach amaswany tïkukwa atömomeghö ompö ngokikwa.”
Lentöy ECHOTYON, “Rökunenö we Papilon, ngacharungu nyo pö paytagh, rökunö aingwïn itöpö terïtyon. Kilatenyi tagh chepkïltït, kanasyan nyo awes, melö tökïkurinyi pich ngat lö nyo tapïlïl akï nyo ngarngar! Kelïkunyi ye nyu sekeyon!
