6 Wölo nyini kyomisyö kïpïghyö, kutor kïmen akïwutyeghanïn.
Kwolöy kegh mwokïyon amöyongönye ECHOTYON. Nonöy lö, “Möminye Tororöt.”
Kitönönyi chane paytagh aitö kor nyo akwagh akï pöro ompö köromnyengu, wölo melö kipöghisyeghunyi anta pïstö ighisyewutkökwa cho ghach.
Kïwutyeghö chane Ghatyengwa, Tororöt nyo kigh chane. Tororöt nyo kitö chane söpon.
Kilenye Israel sapipu nyo pïchigh nyoman nyo yinöy akwechi kuten. Le otini kiyï sapipun kïlïkwï, kïtösöy tagh kïtekyini kegh wölay kïpelo amörostin. Le wölini kitas tagh korengwa kïlïkwï, kïminöy chane tïkwïl wölo sogho.
“Kikïlchï kegh pöytoghï, amatepenanïn, kutökegha kintöghoghï cho melö kyonkïtön. Kwighchï kegh tororötino silpa nko koltin. Choni nyu cho ighöy chane kuwonyö lömïs.
Ochopan kong nyinte ompö osis cho ropchini Paal amörostin akïmina kegh karïn yitïn cho pïchighöch akïwö kïrïpata chamankachi, akïwutyeghenanïn, mwoghöy ECHOTYON.
Kowutyeghekwa, pipö Israel, Tororöt nyo sörwokwa akïkartakwa le ghat nyo wow, apekwa akatkat ket atasagha tororötin cho sis.
tömopïghyan ataghinyi alan, “Ngo ECHOTYON nya?” Anta alïkwan meywon achorsyö, asïmnyonön kaynata Tororötïnyu.
Tepöy ECHOTYON lö, “Olöstowunyi lö ne nya we Yerusalem? Isïwïyenyi lö kapeny piköku ngalechan, akuwalwala kegh tororötin cho möle. Atanya kyapaghakwa ntopïghyö, opïstanïkwa apa aghata cheporesnan, osupchïkwa kegh kori chepkarten.
“Kïlenyona lentöy Echotyon TORORÖT, ominyi pïrchintöngu nko chepkartananengu ompöwölo kiwutyeghaninyi aipörtochï patagh.”
Kitasa sïkönötengu nyoman ompö ngöghomnyengu nyo wow ompö mïnchïrïsnön. Atolapay kïkwol nyu kegh mïkulöwungu ompö mökosyengu.
Ato lentöy oyonotoy chamankachi, kïmönyorunye. Kïkany kïlö oyöröy, kïmönyorunye chane. Atolapay kïlö, “Omïlonan ngat wölo mi chitönyan nya kipö tagh, ompöwölo kyomitan nyo karam atanye kitïl ye.”
Kikuwongwï piköchan ompöwölo menkïtcha kïgh, ompöwölo kataghakwa chïreryö, kïlenyona otöghokwa tïkwïl. Melö tochikwa tïsichan ngat, ompöwölo kowutyeghekwa kiyomisut pö Tororötïngwo, kïlenyona owutyeghonan tïkwïl monekwa.
“Kïle wölini changta tïsï, kïtösöy nyoni tagh kwighwanïn ngokï, owöghökan ye nyu ororyengwa kïlïkwï arasï.
Rirchinanïn chane wölo melö ompö man, wirchini kegh ngwïny akïsölölyö akïlentöy tatakan sowutkökwa cho pagh nko dipay,* wölo tökïtaghanïn chane.
“Ompöwölo kikïwityeghö pipö Israel ighintengwa, akïtekyï kegh korïn echön. Kïtek Yuda kanastin cho chang akuyokir nyoman, wölo oyokyinan ma kanastinechi, nyo pelöy kuwonyö wölona tigho kegh.”
Kwolöy kegh, Epraim kïlentöy, “Nyo le ne, akyochan sïkön, kyoyörchan kegh mökosyenyu. Mi onö ghöyïn nyorchinan chi kïgh nyo le ngokï ompö sïkönöt nyo tenö nyï.”
Ompöwölo kyalïkwan le ngötïny ompö Israel alïkwï le wawa ngötïny ompö Yuda. Opokpokan chane, awechan kegh, amöminye chi nyo muköy kïsöru chane.
