1 Werïnyu, ikaman ngalechan airorchï kegh kirurutköchan.
Tera werïnyu, ngaleko kon amesas kïgh nyo netin yongu.
Soyönote chi nyo somönöy kitapunï akusoyönote pich cho lïmöy ngalechï pö werkoynön akïrïpöy lenyini kikikirchï orinyi, ompöwölo kikïlekïtit ato ighisyot ngalechï.
Kuyokyï Yeso lö, “Wölo soyönote tya pich cho lïmöy ngölyonto Tororöt akïrïp.”
Wölo kïlenchanïn, “Ewo mesoghanïn! Ochan mötworin le nyi nko tupcheniku chay le werkoy nko chane tïkwïl cho rïpöy ngal cho mi kitapunï. Sagha Tororöt!”
Kuyokyï Yeso nyinte lö, “Chi anka tïkwïl nyo chömanïn kïrïpöy ngölyontenyan akïchömöy nyinte Paponyan akepkonecha wölo mi nyinte aketïpïyö nko nyinte.
Anana ngölyontonay kyomwowokwa lö, ‘Möminye mötworintö nyo wow kïsir echotyontenyi.’ Ato kichopanïn chane kong, kuchopokwa kong tïkwïl, ntökiter chane ngölyontenyan, kötöteröy nyinkwa tïkwïl.
Werïnyu, mewutyeghö kirurutyenyan wölo ikomönchï mïkulöwungu kinetutkochan.
Tacha kinetut cho pkono kutinyi airorchï ngalechi mïkulöwungu.
Kïnyïl kösïghechay kichïnchï nyïngwïtyan nyo akwagh kï pich cho lïmöy ngölyonto Tororöt akïkomönchï mïkulögh nyo ghanat, akï nyo karam, akïmïkukön ntökïyï akwa.
Wölo lïku chïpöt ato marïpakwanye kirurutchoni, amastekwa ompö aranoni asagh tororötin walaka cho melö kyonkïtökwa.
Roröy pich cho ngöghomöch chïreryö, wölo ipu kuti sölwö kiwurat kïlekïtit.
Mepïstö kïchïwïtenin konyïn, Ikomönchï mïkulöwungu.
Werïnyu irip kirurutko kon, amepïstö kinetutko komöt.
Amöchömönye kïgh nyo kitötoy töketyaka, amötïng keropa tïkwïn cho chang.
Ryöghchini kelyechi meghat, petöy kelyechi kirïpöy or nyo wetöy ngwen.
