10 Kïkany kïsïwa chane kokelyantanay, kïngörekyö nyoman.
Ongörekyenö ompöwölo ochikwa pikachi, akanya kïturonchö pich löwïr cho soghöy nyinte.
Kïmïlonchö mösöwechay, akï tumöy sölut pö Tororöt ompö ngal löwïr cho kilïm akïsïwa, ompöwölo kighisyö nyo mötïny le wölini kimwochï malayken chane.
wölo kïlenchï malaykayantanay, “Mowöghisyö! Ompöwölo opkokwa Lökoy cho Karamach cho ipchini pich lapay ngörekyö nyo wow.
Nya kïngörekyö puntonï akïtum ompö ngörekyö, ompöwölo irwokyinenyi pipö ngwïny ompö man aintöghoghchï punton cho mi ngwïny.
“Kitö chane kïpayta kor wölo le mösop, akwam tïkwïn cho kipkono paren. Akïlany ponit pö ghatoy, kïpita ketikwa cho pö arol wölo le kaghnötyan.
Kïkany kïlïm pïchay ngalechay kïpechï kegh, akwotini kimi pan kïsïwa kokelyantanaye kisöchï chane Kongasis kimi kuntöghoghchini chane ntökughyongö ato kimi monïngay.
Kïpa kïlïtöy köyay, kïsïwa monïngay kïmi nko kame Marya. Kïkïtïng akïsagh nyinte, atolapay kutyak mïlotwekwa akutö nyinte ropöw, choni kï, koltin, upani nko manemane.
