6 wölo kitïng anka tïkwïl tokochtin angwan nko kapepoy angwan.
Kitïng anka tïkwïl tokoch angwan kïtïng nyo tagh tokochu kerupim akïtïng nyo pö odeny tokochu chi, kïtïng nyo sömök tokochu ngötïny kïtïng nyo pö angwan tokochu sich.
Karkegh kwangwan lentöy chi kinomnyö.
Otini nyu kyomitan orosöy tyonchini sötote, asïwan koropetin angwan cho mi kamasu tyonchini.
Kiwit nyinte tyonkïn cho kilata lyopöt. Kitïng anka tïkwïl ompö chane köpepoy mut nko akonga. Kiluma kïgh anka tïkwïl tokochunyi köpepoy odeny, akuluma portanyi köpepokö walaka odeny, atolapay kupilö köpepokö chinö walaka le odeny.
Syolöy kerupimtine köpepokökwa parak atökïkarta köröwonte. Pörchini kegh mutïn kurosöy köröwonte.
Kighïtoy nyu tyonchay sötote köpepoykökwa ompö mïröt kutang wölo mi anka, atolapay kuyenö kegh anka tïkwïl köpepoy odeny wölini nko wölini.
