1 TIMOTEO 1:5 - PIPÏLIA

⁵ Keröte tamwaghan ngalechete, kï tökumuka angetnget ompö orinkwa chomnyogh nyo ngwïno mïkulögh nyo puryö lelut nko choghïn nyo karam nko kighanat nyo pö man.

1 TIMOTEO 1:5 Referans Kwoze

1 TIMOTEO 1:19

Ripö kighanatengu ompö choghïn nyo karam. Mi pikö walaka cho möterchïnicha choghïntangwa, söromunyi kunyar kighanatengwa.

KALATIA 5:22

Wölo okin nyo yinu Mïkulögh kï: chomnyogh, ngörekyö, kalya, mïkukönöt, tölosyö, köromnyö, kighanat,

2 TIMOTEO 2:22

Imala kegh pïrchin pö naran, ainoghyö irïp ngala man nko kighanat nko chomnyogh nko kalya. Igha lenyoni ainomnyotö nko pich cho kuröy Echotyon otini somöy kingarakat ompö mïkulögh nyo karam.

2 TIMOTEO 1:5

Ononan tïkwïl kighanat nyo puryö lïs nyo itïngetenyi, kighanat nyo karkegh nko nyo kitïng kokötöngu Lois nko yongu Yunis akï nyo otïngetan man lö mi oringu tïkwïl.

2 TIMOTEO 1:3

Oyokyinan sörö Tororöt nyini opöghisyechinan ompö choghïn nyo karam, kïle wölini kipöghisyeghchini papotïnechan. Oyokinan nyinte sörö otini omitan ononinyi ompö sowutköchan nangat nko pöghet.

1 PETRO 3:21

Kicheng ngalechoni körkeyïn pö kipatisanat nyo sörwokwa otï le ye ompö owesyo Kristo. Molenchï kegh kipatisanat kï kemwatïta sïmnyonto por, wölo ayomis nyo kïmwochini Tororöt ompö choghïn. Sörwokwa kipatisanata ompö kitutunöto Yeso Kristo,

1 PETRO 3:16

Wölo omwochï lenyoni ompö tölosyö nko konyït. Orip lasiny totöpinö ompö choghïn nyo karam, nyo ato mwagha pich, kïlolïyonchö choni ngölono nyo gha otöptönkwa nyo karam le pipö Kristo.

1 PETRO 1:22

Kökitïlil mïkuliskökwa ye otï karïpakwa ngala man, achomnyekwa akwane ompö chomnyot nyo puryö. Okilö nyu kegh aparta chomnyononi ompö mïkuliskökwo kïmïkul.

2 PETRO 1:7

atasa kiwaghata Tororöt chomnyo kighonï, atasa chomnyo kighönï, chomnyogh.

RUMI 10:4

Ompöwölo kingwïn Kristo* ighisyo kirurut, atökeyityï chi anka tïkwïl nyo ghönöy man ompö tawu Tororöt.

TITO 1:15

Tïlil kïgh anka tïkwïl ompö pich cho tïlilöch, wölo möminye kïgh nyonikïny nyo tïlil ompö pich cho le sïmnyon cho puryö kighanat, ompöwölo kikesïmnyon kinonutkökwa nko pköchintöngwa.

1 TIMOTEO 3:9

Mïchini kïkaman chane ngölyontonï pö kighanat kikengongchï chane ompö choghïn nyo karam.

2 KORINTO 1:12

Kïkwolecha kegh ompöwölo söwintönchini mïkulöwecha lö, kakemangacha ompö tïlilyö nko kitenat, mïr tya atanya kimitecha nka akwa. Melö kintöghoghwecha ngöghomnyo ptangengmöt kïpoto pöropcho Tororöt.

TUMWÖY 51:10

Konante mïkulögh nyo karam, we Tororöt, aitö orinyan mïkulögh nyo sis.

1 PETRO 4:8

Wölo nyo wow tya mïchini achama kegh akwane lasiny, ompöwölo körtoy chomnyogh ngokï cho chang.

YAKOPO 4:8

Arika wölo mi Tororöt atökïrikakwa nyinte. Owunö ewunekwo akwa mwokïyischï! Amwata mïkuliskökwo, akwa lïsichï!

IGHISYEWUT 23:1

Kuchirchï kong Paulö pïchay mi Kokwö* akïlö, “Tupchenichu! Möwiranïnye choghïn nyo gha ompö tawu Tororöt ompö nyete le asisete.”

TUMWÖY 24:4

Kïpoto chi nyo mötïngnye sïrïp akï kïltït mïkulöwunyi nyo melö soghöy körkeyïntin anta wolwolisyö ompö putintön.

1 YOANA 3:3

Akï chi anka tïkwïl nyo tïng kikönötononi ompö Kristo, kutïlilöy kegh le wölo tïlil nyinte.

EPRANIA 10:22

Akanya nyu kerika wölo mi Tororöt ompö mïkulögh nyo pö man nyo tïng kighanat nyo mötïngnye tomtomönöt. Kaketïlilwecha mïkulisköcho kïngetunö sïkunöt nyo gha akemwata porwöyicha pögh cho tïlilöch.

1 KORINTO 13:1

Kïrkegh angalanan ngala pich anta cho pö malayken amotïngetanye chomnyogh alatan pat kwïrkwïryon nyo chöghöy anta kadöngöt.

RUMI 14:15

Ato ililanyi tupchengu ompö omisyö nyo iyomenyi, kïmelö kerïpanyi ara chomnyogh. Ikïrö kegh omisyö nyo iyomöy tömegh chitö anka nyo kimegha Kristo kupot.

RUMI 9:1

Omwoghan man lö kyolinyan nko Kristo,* amomïranye put. Porwanïn tïkwïl lenyoni choghïntanyan ompö Mïkulögh nyo Tïlil.

IGHISYEWUT 24:16

Kïlenyona, omökan okil kegh kïnomnyö ompö ngölyontonï otöpö nko kinetat nyo tenate ompö tawu Tororöt nko nyo pö pich.

IGHISYEWUT 15:9

Akimatarechanye kesisituna nko chane. Kilöstoghchï chane ngokikwa ompöwölo kighan.

MATAYO 12:35

Ipuno chi nyo karam köromnyö ompö kaplawachtanyi nyo karam, kwipuno chi nyo gha tïkwïn cho ghach kaplawachtanyi nyo gha.

MATAYO 5:8

Soyönote pich cho tïlilöch mïkulöwekwa, ompöwölo sïwïyi chane Tororöt.

1 YOANA 3:23

Mwoghöy ompö kirurutkachi lö mïchinecha keghana Yeso Kristo Wero Tororöt, akechomnyö achane le wölo kimwowecha nyinte.

EPRANIA 13:18

Osoghwecha kïtïngetecha sïkunöt nyo karam ompö kïgh anka tïkwïl akepïrchinecha kegha nyo karam kïnomnyö.

EPRANIA 9:14

Wowitu nyu tya tïlilyö nyo kïsïkonecha kisön pö Kristo! Nyinte nyini kikonï kegh kïlïkwï amöros nyo lïpop ompö tawu Tororöt ompö ara Mïkulögh nyo Tïlil nyo pö kokay. Wunöy kisönkachi sïkunöteto mïkulisköcha kïngetunö ighisyewut cho puryö kinyiwut atökemuka kepöghisyechinö Tororöt nyo söpöy.

KALATIA 5:6

Ompöwölo ato kaketuyecha nko Kristo Yeso kïmelö kïgh ato kakïpa tum anta ewo. Kïgh pat nyo pïchigh kï kighanat nyo pöghisïyi ompö chomnyogh.

YEREMIA 4:14

Nyi we Yerusalem, wuntenö ngokï ompö mïkulöwungu, tenyorunö sörunöt. Töpïsot nko oyï kinonut cho ghach oringunyi nya?

KINONO KIRURUT 10:12

“Atere ye nyu pipö Israel kïgh nyo mökenokwa ECHOTYON Tororötïnkwa. Okonyïtö ECHOTYON arip ngalechi löwïr cho kimwa. Chama apöghisyechï ompö mïkuliskökwo kïmïkul nko ompö söponwekwo kïmïkul.

SEPANIA 3:7

Atolapay ononchan kegh lö, ‘Konyïtanïn ye nyu ana piköchan akïcham kirurötenyan, nonöy ana tïkwïn cho kyanetan chane.’ Wölo kipïrchï tya ighisyewut cho ghach.”

RUMI 12:9

Ochomnyö ompö chomnyogh nyo puryö lïs. Atagha kïgh anka tïkwïl nyo gha achama kegh kiyon karam.

1 TIMOTEO 1:18

Kokoninyi kiyomisötonï, werïnyu Timoteo, kïrïp kegh nko ngala werkoynön cho kikïmwa kutöngunyi. Pöghisyeghenö ngalechoni le kari lïk, atemuka poryenö poryot nyo karam.

1 YOANA 3:10

Anyï kïgh nyo poru sisïn ompö monïngo Tororöt nko cho pö Onyöt: chi anka tïkwïl nyo meghönye kïgh nyo pö man anta macham werïngwa, kïmelö mompö Tororöt nyinte.