Psalm 5:8 - Pennsylvania Dutch Bible

⁸ Fiah mich, oh Hah, in dei gerechtichkeit, veil ich feel feinda habb. Mach dei vayk grawt fannich miah.

Psalm 5:8 Referans Kwoze

Psalm 27:11

Veis miah dei vayk, oh Hah, fiah mich in en grawdi pawt, veil ich feel feinda habb.

Psalm 119:10

Ich such dich mitt mei gans hatz, loss mich nett vekk gay funn dei gebodda.

Psalm 86:11

Lann mich dei vayk, oh Hah, so es ich in dei voahheit lawfa kann. Mach mei hatz aynich, so es ich dei nohma firchta du.

Shpricha 4:25

Loss dei awwa grawt fanna naus gukka, hald oh grawt fannich dich vatsha.

Psalm 119:64

Di eaht is kfild mitt dei shtandhaftichi-leevi, oh Hah, lann mich dei gebodda.

Matthäus 3:3

Dess is da vann vo da brofayt Jesaia kshvetzt hott difunn vo eah ksawt hott, “Di shtimm funn en breddichah in di vildahnis sawkt, ‘Rishtet da vayk fa da Hah, machet sei pawt grawt.’”

Psalm 59:10

Mei Gott in sei grohsi leevi kumd zu miah, Gott lost mich mitt ivvah-hand uf mei feinda gukka.

Psalm 31:1

Oh Hah, in dich doon ich mei fadrauwa, loss mich nee nett in shohm gedu vadda; in dei gerechtichkeit mach mich frei.

Hebräer 12:13

Un machet grawdi pawda fa eiyah fees, so es di lohma nett vekk gedrayt vadda, avvah es si kayld vadda.

Psalm 54:5

Eah drayt's evila funn mei feinda zrikk uf si selvaht; un sei shtandhaftichkeit bringd si zu en end.

2. Samuel 12:14

Bei dess ding du hosht du di feinda fumm Hah glost leshtahra. Fasell zayld da boo shtauva es geboahra is zu diah.”

Psalm 138:2

Ich bikk mich nunnah geyyich dei heilichah tempel, un gebb dank zu dei nohma, fa dei shtandhaftichi-leevi un voahheit, fa du hosht dei nohma un dei vatt uf kohva ovvich alles shunsht.

Jona 2:5

'S vassah voah um mich rumm biss mei layva in di kfoah voah. 'S deef vassah hott mich zu gedekt. Veetz fumm say voah um mei kobb rumm gvikkeld.