Jesoiya 44:15 - Pennsylvania Dutch Bible

¹⁵ No vatt's feiyah-hols fa da mann. Eah nemd samm fa sich voahm macha, un mitt anres macht en feiyah fa broht bakka. Avvah mitt demm macht eah aw en gott un bayt een oh, eah macht en abgott-gleichnis un gneet nunnah ditzu.

Jesoiya 44:15 Referans Kwoze

2. Chronik 25:14

Vo da Amazia zrikk kumma is funn di Edomiddah shlachta, hott eah di leit funn Seir iahra gettah mitt zrikk gebrocht. Eah hott si ufkokt fa sei aykni gettah sei, hott sich nunnah gebikt zu eena un hott opfahra gebrend zu eena.

Di Offenbarung 9:20

Di ivvahricha leit es nett doht gmacht voahra bei dee sacha, henn alsnoch nett rumm gedrayt un boos gedu fa di verka es si gedu henn mitt iahra hend. Si henn nett ufkeaht deivela, un abgettah funn gold, silvah, kubbah, shtay un hols ohbayda, selli sacha vo nett sayna, heahra adda lawfa kenna.

Jesoiya 45:20

Fasamlet eich zammah un kummet, kummet zammah diah es ivvahrich sind funn di heida. Selli es holsichi abgettah rumm drawwa vissa nix; si bayda zu en gott es nett helfa kann.

Jesoiya 44:10

Veah sinn dee es en gott macha, un en abgettah-gleichnis geesa es nix veaht is?

Richtah 2:19

Avvah vann da richtah moll kshtauva is, sinn di leit viddah zrikk gedrayt un henn sich shlimmah ohkshikt es iahra foah-feddah henn bei anri gettah nohch gay un si ohbayda un si deena. Si henn's nett gedu fa iahra evili un dikk-kebbichi vayya ufgevva.

Jesoiya 44:14

Eah hakt en cedar-bohm nunnah. Adda fleicht saynd eah en cypress adda en aycha-bohm, un lost een vaxa unnich di baym fumm bush. Fleicht blanst eah en pine-bohm, un da reyya macht een vaxa.

Jesoiya 44:16

Dihelft fumm hols brend eah im feiyah, un kocht sei ess-sach mitt, eah kocht sei flaysh un est sich satt. Eah veahmd sich un sawkt, “Yau, ich binn voahm; gukk moll's feiyah.”

Jesoiya 44:17

Mitt em ivvahricha hols macht eah en gott, en gleichnis, eah gneet nunnah un deend een. Eah bayt ditzu un sawkt, “Du bisht mei gott, mach mich frei.”

Jesoiya 46:6

Dayl leahra gold aus iahra sekk, un veeya silvah uf di vohk; no dinga si en gold-shmitt fa en gott raus macha, un gneeya sich nunnah un deena's.

Jesoiya 2:8

Iahra land is kfild mitt abgott-gleichnisa; si gneeya nunnah zu sach es iahra hend gmacht henn, sell es iahra fingah kshaft henn.