Yudas 1:4 - Perjanjian Baru Bahasa Melayu Maluku Utara

⁴ Barang, ada orang-orang yang bawa ajaran yang tara butul yang so maso pa ngoni pe jemaat, tapi ngoni tara sadar. Dorang itu tara iko Tuhan Allah pe mau. Dorang memang so tarima ajaran tentang torang pe Tuhan Allah pe bae, tapi dorang kase putar bale ajaran itu la orang bisa iko dorang pe napsu yang tara bae. Deng dorang me manyangkal, Yesus Kristus yang cuma satu itu saja torang pe Tuhan, yang berkuasa pa samua-samua. Orang-orang model bagini, dari dulu ada tatulis di Kitab Suci, dorang memang akan dapa hukuman.

Yudas 1:4 Referans Kwoze

Galatia 2:4

Memang ada babarapa orang laeng yang tantang supaya Titus dapa sunat. Dorang itu maso babadiam di jemaat, biking diri percaya pa Yesus Kristus sama deng torang, padahal dorang itu cuma mo cari tau pa torang. Dorang lia torang so bebas dari aturan-aturan di lima kitab Musa karna torang so percaya pa Kristus Yesus, kong dorang mo biking torang taika ulang deng aturan-aturan itu, sama deng orang karja yang taika pa dia pe tuang.

2 Petrus 2:10

Lebe-lebe lagi pa orang-orang yang cuma hidup iko dong pe napsu yang tara bae, deng yang pandang enteng Tuhan Allah pe kuasa yang luar biasa. Guru-guru palsu itu barani skali deng makang puji, sampe dorang tara tako-tako mo bahina pa samua yang berkuasa di sorga.

1 Yohanes 2:22

Sapa yang pangbafoya? Tantu orang yang bilang kata, Yesus Kristus itu bukang Raja yang Tuhan Allah pili untuk kase slamat pa manusia. Orang itu musu pa Yesus Kristus. Dia tara percaya pa Bapa torang pe Tuhan Allah deng pa Anak Allah.

1 Petrus 2:16

Ngoni ini Tuhan Allah so kase bebas pa ngoni dari kuasa dosa, tapi jang ngoni pake hak itu jadi alasan untuk biking barang yang jahat lagi. Tapi lebe bae ngoni hidup untuk biking apa yang Tuhan Allah suru.

1 Petrus 2:8

Kong ada lagi yang tatulis bagini, “Batu itu yang biking banya orang tagate, kong dorang cilaka.” Jadi bagini: orang-orang yang tara mau iko Tuhan Allah pe firman tentang Yesus, dorang itu sama deng orang-orang yang tagate di batu kong cilaka. Tuhan Allah so ator memang apa yang jadi itu pa dorang.

2 Timotius 3:6

Babarapa orang dari dorang bawa ajaran yang tara butul di orang-orang pe ruma, kong tipu pa parampuang-parampuang yang dong pe dosa banya skali deng gampang tagoda. Parampuang-parampuang itu gampang dapa tipu deng macam-macam keinginan yang kuasai pa dorang.

Galatia 5:13

Sudara-sudara, Tuhan Allah so pangge pa ngoni iko pa Dia, deng bagitu ngoni bisa bebas dari aturan-aturan di lima kitab Musa untuk dapa slamat. Cuma jang ngoni pikir ngoni so bebas, turus ngoni bole biking kalakuang yang tara bagus iko apa saja yang ngoni suka. Bukang bagitu. Tapi yang butul yang musti biking itu, ngoni musti baku-baku layani karna ngoni baku sayang.

2 Petrus 3:7

Kong cuma deng bicara lagi, Tuhan Allah jaga langit deng bumi skarang, sampe di waktu Dia mo hukum pa orang-orang yang tara iko Dia pe mau deng Dia mo biking dorang mati slama-lamanya. Di waktu itu, Dia mo bakar kase abis dunia deng langit ini.

Yudas 1:15

Dia datang untuk adili pa samua orang, deng Dia lagi mo hukum pa orang-orang yang tara semba pa Tuhan Allah karna samua dong pe kalakuang yang tara iko Tuhan Allah pe mau deng samua dong pe kata-kata kasar tentang Tuhan.”

1 Petrus 4:18

Di Kitab Suci ada tatulis bagini, “Kalu orang yang hidup butul pa Tuhan Allah pe muka saja amper-amper tara dapa slamat, bagimana lagi deng orang-orang yang tara iko pa Tuhan Allah deng orang-orang yang jaga biking dosa, pasti dong tara slamat, to?”

Efesus 4:14

Kalu torang pe percaya so kuat bagitu, torang so tara gampang dapa tipu sama deng ana kacil. Jadi kalu ada orang yang datang kase ajar ajaran macam-macam yang tara butul untuk pengaru pa torang, torang tara akan gampang taiko pa dorang. Torang tara akan sama deng omba yang kasana-kamari iko angin batiop.

Kisah Para Rasul 15:24

Torang tulis surat ini, barang torang dengar ada babarapa orang dari torang pe jemaat di Yerusalem yang so pigi pa ngoni. Kong dorang kase ajar pa ngoni deng dong pe ajaran sandiri yang biking bingung deng biking ngoni pe hati tara tenang. Padahal torang tara perna suru orang-orang itu pigi pa ngoni.

Kisah Para Rasul 11:23

Waktu Barnabas sampe di sana, dia lia memang Tuhan Allah so kase Dia pe bae sampe banya orang so jadi percaya pa Yesus. Pe lia itu, dia sanang skali. Turus, dia kase smangat pa dorang supaya dorang sunggu-sunggu tetap setia pa Tuhan Yesus.

Yohanes 17:3

Kong hidup deng Bapa slama-lamanya itu, pe maksut bagini: dorang so kanal Bapa itu Tuhan Allah yang butul, tara ada yang laeng, deng dorang so kanal Yesus Kristus itu yang Bapa utus untuk datang di dunia ini.

Matius 13:25

Waktu so malam kong samua orang so tasono, tuang kobong itu pe musu datang. Kong musu itu ambur bibit kusu-kusu di antara bibit gandum yang bagus. Abis itu musu itu pigi.

Wahyu 15:4

Samua orang pasti akan tako pa Tuhan, kong puji deng hormat Tuhan pe nama. Barang cuma Tuhan saja yang kudus. Samua suku mo datang kong berlutut untuk semba pa Tuhan. Karna samua orang so lia apa yang Tuhan biking itu butul.”

1 Timotius 5:8

Karna kalu ada orang yang tara mau urus orang-orang yang ada hubungan keluarga deng dia, apalagi dia pe keluarga yang satu ruma deng dia, itu sama saja dia so manyangkal pa Tuhan Yesus. Orang itu lebe soe dari orang yang tara percaya pa Tuhan.

2 Timotius 2:12

Kalu torang menderita kong tetap percaya pa Tuhan Yesus, nanti torang akan berkuasa sama-sama deng Dia. Kalu torang manyangkal pa Dia, Dia me akan manyangkal pa torang.

2 Petrus 2:7

Tapi Lot, Tuhan Allah kase slamat pa dia dari kota itu. Lot itu orang yang jaga biking apa yang butul pa Tuhan Allah pe muka. Dia turus-turus sedi skali karna orang-orang yang ada di sekitar dia pe cara hidup tara bae, karna dorang cuma iko dong pe napsu.

Yudas 1:18

Dorang bilang, nanti waktu so mo kiamat, akan datang orang-orang yang suka bahina torang pe percaya. Dorang itu akan hidup iko dong pe napsu yang baku lawan deng Tuhan Allah pe mau.