Yudas 1:24 - Perjanjian Baru Bahasa Melayu Maluku Utara

²⁴ Tuhan Allah ada kuasa untuk jaga pa ngoni supaya ngoni tara taiko biking dosa. Dia me biking ngoni jadi orang yang tara sala apa-apa, kong bawa pa ngoni badiri deng hati yang paling sanang di Dia pe muka yang hebat itu.

Yudas 1:24 Referans Kwoze

2 Timotius 4:18

Tuhan Allah kase lapas pa kita dari samua orang pe rencana yang jahat, yang mo biking kita cilaka. Dia mo bawa pa kita di sorga, di situ Dia Berkuasa sebagai Raja. Dia itu suda yang torang puji deng hormat sampe slama-lamanya! Amin.

Efesus 3:20

Tuhan Allah pe kuasa yang bakarja pa torang pe hidup itu paling basar skali, kong deng Dia pe kuasa itu Dia bisa biking lebe dari apa yang torang minta, deng lebe dari apa yang torang pikir.

Kolose 1:22

Tapi skarang, Tuhan Allah biking supaya ngoni pe hubungan bole bae-bae ulang deng Dia, karna Yesus Kristus so mati di kayu salib. Dia mati itu, supaya di Dia pe muka, ngoni jadi orang yang bersi dari dosa, tara sala apa-apa, kong tarada orang yang bisa kase sala pa ngoni.

Efesus 5:27

Jadi, torang yang so jadi Dia pe jemaat bole jadi Tuhan pe umat yang bersi dari dosa, kong tarada orang yang mo kase sala pa torang. Torang tarada dosa apa-apa sampe waktu Tuhan Yesus datang ulang jemput pa torang, jadi torang bole badiri pa Dia pe muka.

2 Korintus 4:14

Barang, Tuhan Allah so kase hidup ulang pa Tuhan Yesus, jadi torang me tau, biar torang mati nanti, Dia mo kase hidup ulang pa torang. Dia mo kumpul pa torang deng ngoni sama-sama pa Dia pe muka.

Wahyu 14:5

Dorang itu tara perna bicara putar bale, deng tarada orang yang bisa kase sala pa dorang.

Roma 8:31

Kalu torang inga samua yang Tuhan Allah so biking untuk torang, torang musti yakin Tuhan Allah ada sama-sama deng torang. Jadi sapa yang mampo lawan pa torang? Tarada, to?

Matius 16:27

Barang, Anak Manusia yang dari sorga mo datang ulang di dunia ini, sama-sama deng Bapa pe malaekat-malaekat deng Dia pe kuasa yang luar biasa. Kong waktu itu, Anak Manusia mo balas pa tiap orang iko deng apa yang dorang so biking.

1 Petrus 4:13

Tapi lebe bae, ngoni sanang suda deng siksa yang ngoni dapa itu, karna itu berarti, ngoni so rasa sadiki siksa yang perna Yesus Kristus rasa. Deng bagitu, nanti waktu Dia datang ulang kong kase tunju Dia pe kuasa yang luar biasa, ngoni akan sanang deng basimore skali.

2 Korintus 11:2

Kita jaga bae-bae pa ngoni sama deng Tuhan Allah sandiri jaga pa ngoni, jang sampe ada yang ganggu ngoni pe percaya pa Yesus Kristus. Kita sama deng papa satu yang so janji mo kase kawing dia pe ana parampuang deng laki-laki satu, jadi papa itu jaga turus pa ana parampuang itu supaya dia tetap bersi sampe dia kawing deng dia pe calon kawing.

2 Korintus 4:17

Memang, sengsara yang tong dapa di dunia ini barát, tapi kalu tong pikir apa yang Tuhan Allah so sadia pa torang di sorga, sengsara itu bole torang bilang tara barát kong cuma sementara. Jadi kalu torang tetap batahang deng sengsara itu, torang so siap untuk tarima samua yang hebat itu di sorga.

Matius 5:12

Sanang deng basimore suda, karna Tuhan Allah so kase sadia ngoni pe upah basar di sorga. Barang, nabi-nabi yang dulu me so lebe kamuka dapa siksa sama deng yang ngoni dapa.”

Roma 14:4

Tuhan itu torang samua pe Tuang. Jadi torang tarada hak mo kase sala pa orang laeng pe orang karja. Cuma Tuhan saja yang ada hak untuk kase sala pa Dia pe orang karja. Deng Tuhan pasti mo tolong pa orang karja itu supaya bole hidup butul.

Yudas 1:21

Tuhan Allah sayang pa ngoni, jadi ngoni musti tetap yakin Dia pe sayang itu. Ngoni me musti tunggu-tunggu Yesus Kristus torang pe Tuhan datang ulang. Waktu Dia datang ulang, Dia mo kase tunju Dia pe rasa kasiang pa torang supaya torang bole hidup deng Tuhan Allah slama-lamanya.

Kolose 3:4

Yesus Kristus itu suda yang ruba ngoni pe hidup jadi baru. Jadi nanti waktu Dia datang ulang yang kedua kali, samua orang akan lia pa Dia deng lia pa ngoni lagi, kong ngoni dapa puji deng hormat sama-sama deng Dia.

Kolose 1:28

Jadi, kamana saja torang pigi, Yesus Kristus itu saja yang torang kase tau pa tiap-tiap orang. Torang jaga kase inga deng kase ajar pa dorang, pake hikmat yang Tuhan Allah kase pa torang, supaya pa Tuhan Allah pe muka, tiap-tiap orang itu butul-butul percaya pa Yesus Kristus.

Lukas 9:26

Karna sapa yang malu mangaku dia iko pa Kita deng iko Kita pe ajaran, nanti waktu Kita Anak Manusia datang ulang, Kita me akan malu mangaku dia iko pa Kita. Waktu itu Kita datang deng Kita pe kuasa yang luar biasa deng Kita pe Bapa pe kuasa yang luar biasa deng malaekat-malaekat yang kudus.

Matius 25:31

Yesus bilang lagi, “Anak Manusia yang dari sorga mo datang ulang deng Dia pe kuasa yang luar biasa deng samua malaekat sama-sama deng Dia, kong Dia mo dudu di kursi raja yang luar biasa.

Matius 19:28

Yesus bilang pa dorang, “Dengar bae-bae yang Kita bilang pa ngoni ini, nanti di waktu Tuhan Allah so biking dunia ini jadi baru ulang, Anak Manusia yang dari sorga mo dudu di atas kursi raja yang luar biasa. Waktu itu, ngoni samua yang iko pa Kita mo dudu lagi di dua blas kursi raja untuk adili pa dua blas suku bangsa Israel.

Yakobus 2:10

Karna sapa yang iko Tuhan Allah pe aturan-aturan, dia musti iko samua. Tapi kalu dia langgar Tuhan Allah pe aturan-aturan, biar cuma satu saja, itu sama deng dia so langgar aturan samua.

2 Petrus 1:10

Jadi sudara-sudara, karna Tuhan Allah so pili deng pangge pa ngoni jadi Dia pe umat, ngoni musti berusaha karas untuk iko pa Dia supaya ngoni tau deng yakin Dia so pili deng pangge pa ngoni. Karna kalu ngoni biking samua yang bae yang kita bilang itu, ngoni tara akan kase tinggal ngoni pe percaya pa Dia, itu sama deng ngoni ada bajalang turus-turus kong ngoni pe kaki tara tagate di batu sampe jatu.