Yudas 1:20 - Perjanjian Baru Bahasa Melayu Maluku Utara

²⁰ Tapi ngoni sudara-sudara yang kita sayang, kase kuat ngoni pe hati supaya ngoni pe percaya pa Tuhan lebe tamba kuat, karna ajaran yang torang percaya itu butul-butul suci. Kong kase biar Roh Kudus yang pimpin pa ngoni waktu ngoni berdoa.

Yudas 1:20 Referans Kwoze

Efesus 6:18

Kong di sagala waktu, ngoni musti salalu berdoa deng minta pa Tuhan Allah, kase biar suda supaya Roh Kudus yang bantu waktu ngoni berdoa. Ngoni musti salalu siap berdoa deng jang berenti berdoa lagi untuk samua orang yang so jadi Tuhan Allah pe umat.

1 Korintus 14:15

Jadi kalu bagitu, yang bae kita mo biking apa? Kita suka pake dua-dua. Kita mo berdoa dari kita pe roh pake bahasa roh, deng kita lagi mo berdoa pake kata-kata dari kita pe pikiran. Kita mo manyanyi puji pa Tuhan dari kita pe roh pake bahasa roh, deng kita lagi mo manyanyi puji pa Tuhan pake kata-kata dari kita pe pikiran.

Kolose 2:7

Ngoni pe percaya pa Dia musti kuat, sama deng pohong pe akar yang tatanam kuat di tana. Deng ngoni pe hidup musti bagantong kuat pa Dia, sama deng ruma yang ada bangun di atas fandasi yang kuat. Kong ngoni pe percaya pa Dia me musti lebe tamba kuat, iko sama deng ajaran yang ngoni so tarima. Kong ngoni musti salalu bilang tarimakasi banya pa Tuhan Allah.

1 Tesalonika 5:11

Jadi, ngoni musti carita ulang ajaran ini pa ngoni pe tamang-tamang supaya baku kase hibur deng baku kase kuat orang pe hati, sama deng yang ngoni salalu biking sampe skarang ini.

1 Korintus 14:26

Jadi bagini sudara-sudara, kalu ngoni bakumpul sama-sama untuk baibada, lebe bae ngoni masing-masing ambe bagian: ada yang manyanyi puji pa Tuhan, ada yang mangajar, ada yang kase jelas apa yang Tuhan Allah so kase tunju pa dia, ada yang bicara pake bahasa roh, deng ada lagi yang kase mangarti bahasa roh itu untuk jemaat. Ngoni biking samua itu untuk kase kuat jemaat.

Roma 8:15

Torang tau, tong itu Tuhan Allah pe ana-ana, karna Tuhan Allah pe Roh yang Dia so kase pa torang itu, tara biking torang tako sama deng orang karja yang tako dia pe tuang. Tapi Tuhan Allah pe Roh itu so biking torang jadi Tuhan Allah pe ana-ana, sampe torang me bole pangge pa Dia itu, “Papa e, ya Bapa!”

Galatia 4:6

Kong karna torang so jadi Tuhan Allah pe ana-ana, Tuhan Allah so suru pa Dia pe Anak pe Roh tinggal di torang pe hati, kong Roh yang ada di torang pe hati itu bakarja deng biking torang bole pangge pa Tuhan Allah itu, “Papa e, ya Bapa!”

Efesus 4:29

Kalu ngoni bicara, jang ada kata-kata tara bae kaluar dari ngoni pe mulu. Lebe bae, yang musti ngoni pake waktu bicara itu, kata-kata yang bisa kase kuat orang laeng pe hati, deng kata-kata yang perlu dorang dengar untuk dong pe bae.

Kisah Para Rasul 9:31

Abis itu, jemaat-jemaat di daera Yudea, daera Galilea deng daera Samaria hidup baku bawa bae-bae. Dorang pe percaya jadi kuat, kong dorang hidup deng rasa hormat pa Tuhan Allah. Roh Kudus kase smangat pa dorang, kong dorang lebe tatamba banya.

Efesus 4:16

Kong Dia yang biking torang yang percaya jadi satu, sama deng torang ini satu badan: torang ini sama deng Dia pe kaki, tangan, deng samua-samua yang ada pa Dia pe badan. Dia pe kuasa ada pa torang samua, jadi kalu torang masing-masing biking tong pe tugas yang Dia so kase, kuasa itu biking torang lebe hari lebe tamba baku sayang deng lebe tamba baku kase kuat torang pe percaya.

Efesus 4:12

Yesus Kristus kase Dia pe kemampuan pa dorang itu, supaya dorang bole tolong pa orang-orang yang so jadi Tuhan Allah pe umat. Tuhan Allah pe umat itu sama deng Yesus Kristus pe badan. Kalu Tuhan Allah pe umat dapa tolong bagitu, Dia pe umat bole biking dorang pe tugas, deng dorang lagi bole baku kase kuat dong pe percaya,

Kisah Para Rasul 26:18

Ngana ka sana untuk buka dorang pe pikiran supaya dorang tara hidup lagi di galap tapi hidup di tarang, supaya dorang talapas dari Iblis, setang-setang pe raja pe kuasa, kong Tuhan Allah pe kuasa mo ada sama-sama deng dorang. Kong karna dorang so percaya pa Kita, dorang pe dosa-dosa mo dapa ampun deng dorang mo dapa samua yang Tuhan Allah janji mo kase pa orang-orang yang Dia so biking jadi Dia pe umat.’

1 Yohanes 5:4

Barang, tiap orang yang so jadi Tuhan Allah pe ana-ana mampo kase kala kuasa jahat di dunia ini. Kong torang bole kase kala kuasa yang jahat itu, karna torang pe percaya.

Yakobus 2:22

Abraham biking dua hal ini: dia percaya pa Tuhan Allah, deng dia lagi biking Tuhan Allah pe mau. Deng bagitu, Abraham pe percaya pa Tuhan Allah jadi sempurna.

Titus 1:1

Titus, salam dari kita Paulus. Kita ini jaga biking apa yang Tuhan Allah suru deng kita ini Yesus Kristus pe utusan yang orang sebut rasul. Kita jadi Dia pe rasul itu supaya kita kase tau Tuhan pe Kabar Bae pa orang-orang yang Dia so pili la dorang dapa slamat. Kita dapa tugas kase kuat dorang pe percaya deng kase tau pa dorang ajaran yang butul. Ajaran itu yang mo tolong pa dorang supaya dorang bisa hidup iko Tuhan Allah pe mau.

1 Korintus 10:23

Sudara-sudara, ada yang bilang bagini, “Torang bole biking apa saja yang torang mau.” Itu memang butul, tapi tara samua yang torang mo biking itu ada dia pe guna. Jadi biar lagi torang bole biking samua, tapi tara samua yang tong biking itu, biking torang pe percaya jadi lebe kuat.

Roma 15:2

Tapi masing-masing orang dari torang musti biking yang bae pa orang laeng yang percaya, supaya dorang pe percaya pa Tuhan lebe tamba kuat.

Kisah Para Rasul 15:9

Tuhan Allah me tara pili-pili antara torang deng dorang, jadi Dia biking bersi dorang pe hati, karna dorang so percaya pa Yesus.

2 Timotius 1:5

Kita inga deng yakin, ngana itu sunggu-sunggu percaya pa Tuhan Yesus, sama deng ngana pe nene Lois deng mama Eunike yang so percaya pa Yesus kamuka.

1 Timotius 1:4

Dorang me jang dengar carita dulu-dulu deng lagi carita tentang orang tua dulu-dulu pe asal usul yang tara abis-abis. Karna orang yang carita itu, dia pe ahir kabawa salalu baku mara. Apalagi itu tara bantu orang la percaya pa Tuhan Allah.

1 Korintus 1:8

Dia lagi akan kase kuat turus ngoni pe percaya sampe Dia datang ulang, supaya di waktu itu, Dia dapa ngoni tara sala apa-apa.

Wahyu 13:10

orang yang Tuhan Allah so tentukan untuk dapa tangka, dia pasti mo dapa tangka. Orang yang Tuhan Allah so tentukan untuk dapa bunu deng parang, dia pasti mo dapa bunu deng parang. Jadi yang penting di sini, orang-orang yang so jadi Tuhan Allah pe umat musti tetap percaya pa Tuhan deng batahang biar dapa siksa.

Yudas 1:3

Sudara-sudara yang kita sayang, sementara kita tulis surat pa ngoni tentang slamat yang torang so tarima, kita rasa ada yang musti kita tulis kamuka, supaya ngoni berusaha butul-butul untuk tetap batahang deng ngoni pe percaya. Kong ngoni pe percaya itu musti iko Tuhan Allah pe ajaran yang Dia so kase satu kali untuk slama-lamanya pa torang yang so jadi Dia pe umat.

2 Petrus 1:1

Sudara-sudara yang percaya, salam dari kita Simon Petrus. Kita ini orang yang jaga biking apa yang Yesus Kristus suru, deng kita ini me Dia pe utusan yang orang sebut rasul. Yesus Kristus itu Tuhan Allah, deng Dia me yang kase slamat pa torang dari dosa-dosa. Dia itu yang biking sampe ngoni percaya pa Dia sama deng torang yang so percaya pa Dia, karna Dia salalu biking barang yang butul.

Kisah Para Rasul 6:7

Mulai dari situ, Tuhan Allah pe firman lebe tamba tasiar, kong orang-orang di Yerusalem yang percaya pa Tuhan Yesus lebe tamba banya. Imam-imam Yahudi me banya yang jadi percaya pa Yesus.