Yohanes 20:17 - Perjanjian Baru Bahasa Melayu Maluku Utara

¹⁷ Yesus bilang pa Maria, “Jang pegang pa Kita, karna Kita bolong bale pa Kita pe Bapa. Tapi ngana pigi suda pa Kita pe sudara-sudara yang jaga iko pa Kita kong bilang pa dorang, Kita skarang mo nae pigi pa Kita pe Bapa deng ngoni pe Bapa lagi. Dia itu lagi Kita pe Tuhan Allah deng ngoni lagi pe Tuhan Allah.”

Yohanes 20:17 Referans Kwoze

Yohanes 16:28

Kita datang di dunia ini dari Kita pe Bapa. Tapi skarang, Kita mo kase tinggal dunia ini kong bale ulang pa Kita pe Bapa.”

1 Petrus 1:3

Puji suda pa Tuhan Allah, Dia itu torang pe Tuhan Yesus Kristus pe Bapa. Dia pe rasa kasiang pa torang basar skali, sampe Dia kase pa torang hidup yang baru waktu Dia so kase hidup ulang pa Yesus Kristus. Kong karna itu, torang bole baharap deng percaya sunggu-sunggu pa Dia.

Galatia 3:26

Jadi sudara-sudara, ngoni so jadi Tuhan Allah pe ana-ana karna ngoni so percaya pa Yesus Kristus.

Yohanes 17:11

Kita tara lama lagi di dunia ini karna Kita mo pigi pa Bapa, tapi dorang akan tetap ada di dunia ini. Ya Bapa yang kudus, tolong jaga pa dorang pake Bapa pe kuasa yang Bapa so kase pa Kita, supaya dorang bole jadi satu hati satu deng yang laeng, sama deng Kita deng Bapa lagi so satu.

1 Yohanes 3:2

Sudara-sudara yang kita sayang, skarang torang ini Tuhan Allah pe ana-ana. Jadi torang tau, nanti waktu Yesus Kristus, Raja yang Tuhan Allah pili itu so datang ulang, torang mo jadi sama deng Dia, barang torang mo lia pa Dia yang sebenarnya. Tapi tentang torang pe hidup nanti bagimana, Dia bolong kase tau samua pa torang.

Yohanes 14:6

Kong Yesus bilang pa dia, “Kita ini jalang yang mo pigi pa Tuhan Allah, deng Kita ini yang kase tau yang butul tentang Tuhan Allah, deng Kita lagi yang kase hidup deng Tuhan Allah slama-lamanya. Jadi, tara ada satu orang yang bole pigi pa Tuhan Allah kalu tara iko pa Kita.

Markus 16:19

Abis Tuhan Yesus bicara pa Dia pe murit-murit, Dia taangka ka sorga, kong dudu di tampa yang terhormat pa Tuhan Allah pe sabla kanan.

Wahyu 21:3

Kong kita dengar suara yang kuat skali dari sekitar Tuhan Allah pe kursi raja itu bilang bagini, “Perhatikan bae-bae! Tuhan Allah pe tampa tinggal so ada di tenga-tenga manusia, deng Dia akan tinggal sama-sama deng manusia. Dorang akan jadi Dia pe umat, deng Dia sandiri akan ada sama-sama deng dorang jadi dorang pe Tuhan Allah.

2 Korintus 6:18

Kita akan jadi ngoni pe Bapa, deng ngoni lagi mo jadi Kita pe ana-ana laki-laki deng Kita pe ana-ana parampuang.” Itu yang Tuhan Allah bilang di Kitab Suci. Dia itu yang Paling Berkuasa.

Roma 8:29

Karna dari dulu, Tuhan Allah so pili pa sapa saja yang Tuhan Allah tau dorang itu nanti mo percaya pa Dia. Tuhan Allah so pili pa dorang itu supaya dorang pe sifat bole sama deng Yesus Kristus, Tuhan Allah pe Anak. Jadi, dorang itu so sama deng Yesus Kristus pe sudara, kong Tuhan Allah biking Yesus Kristus jadi Anak yang tua dari samua sudara yang percaya.

Yohanes 17:25

Ya Bapa yang adil, orang-orang yang ada di dunia ini tara kanal pa Bapa, tapi Kita kanal pa Bapa. Deng Kita pe murit-murit tau, Bapa itu yang utus pa Kita.

Matius 28:7

Skarang, ngoni capat-capat bale suda, kong kase tau pa Dia pe murit-murit, bilang, ‘Yesus yang mati itu so hidup ulang. Kong Dia so kamuka di daera Galilea. Di sana ngoni akan lia pa Dia.’ Jadi inga e, samua yang kita bilang ini!”

Matius 12:50

Karna sapa saja yang biking Kita pe Bapa di Sorga pe mau, dia itu suda Kita pe sudara laki-laki, dia itu suda Kita pe sudara parampuang, deng dia itu suda Kita pe mama.”

Wahyu 21:7

Sapa yang menang dari pengaru jahat, dia mo dapa samua yang Kita bilang tadi. Deng Kita mo jadi dia pe Tuhan Allah, kong dia mo jadi Kita pe ana.

Ibrani 8:10

Jadi ini suda janji yang baru yang Kita akan biking deng orang-orang bangsa Israel nanti: Kita mo taru Kita pe aturan-aturan pa dorang pe pikiran, deng Kita mo tulis itu di dorang pe hati. Kita akan jadi dorang pe Tuhan Allah, deng dorang akan jadi Kita pe umat.

Yohanes 20:27

Kong Dia bilang pa Tomas, “Tomas, lia Kita pe tangan ini kong ngana cucu suda ngana pe jari pa Kita pe tangan. Ngana kase maso ngana pe tangan pa Kita pe lambung ini. Jadi jang bilang ngana tara percaya lagi Kita so hidup ulang, tapi percaya suda.”

Yohanes 17:5

Jadi skarang, Bapa, Kita minta Bapa biking Kita dapa lia luar biasa pa Bapa pe muka, sama deng dulu waktu Kita masi sama-sama deng Bapa waktu dunia ini bolong ada.”

Yohanes 14:28

Ngoni so dengar Kita ada bilang pa ngoni bagini: Kita mo pigi, tapi Kita mo datang ulang pa ngoni. Jadi kalu ngoni sayang pa Kita, pasti ngoni pe hati sanang skali, karna Kita pigi pa Kita pe Bapa. Barang, Kita pe Bapa itu lebe hebat dari Kita.

Yohanes 14:2

Pa Kita pe Bapa pe ruma ada banya tampa, kong Kita pigi ka sana untuk kase siap ngoni pe tampa itu. Kita kase tau itu pa ngoni, karna memang ngoni pe tampa itu ada di sana.

Yohanes 13:3

Yesus tau Dia pe Bapa so kase samua kuasa pa Dia. Dia me tau Dia itu datang dari Tuhan Allah, Dia pe Bapa, kong Dia lagi nanti mo bale ulang pa Tuhan Allah.

Yohanes 13:1

Tinggal satu hari lagi orang agama Yahudi pe hari raya Paska so mo mulai. Hari raya itu dorang inga waktu Tuhan Allah kase bebas pa dorang pe orang tua dulu-dulu yang dapa jaja dari bangsa Mesir. Kong Yesus tau, so tara lama lagi Dia mo kase tinggal dunia ini la mo pigi pa Dia pe Bapa di sorga. Dia sayang pa orang-orang di dunia yang so jadi Dia pe umat, kong skarang Dia mo kase tunju, Dia salalu sayang pa dorang sampe Dia pe ahir hidup.

Yohanes 7:33

Waktu itu, Yesus bilang pa orang banya itu, “Kita pe waktu sama-sama deng ngoni tinggal sadiki saja. Abis itu, Kita mo bale ulang pa Dia yang so utus pa Kita.

Lukas 10:4

Waktu ngoni pigi, jang bawa dompet, jang bawa tas atau jang bawa sandal. Jang bacarita banya deng orang di jalang, tapi bajalang turus.

Matius 25:40

Kong nanti Raja itu akan bilang pa dorang bagini, ‘Inga bae-bae yang Kita bilang pa ngoni ini, samua yang ngoni biking untuk tolong pa satu orang dari Kita pe sudara-sudara yang orang anggap tara penting, itu sama deng ngoni so biking untuk Kita.’

Ibrani 11:16

Tapi tampa tinggal yang dorang rindu itu, tampa tinggal yang lebe bagus. Tampa tinggal itu, sorga suda. Karna itu, Tuhan Allah tara malu waktu dorang bilang, Dia itu dorang pe Tuhan Allah, barang Dia so kase sadia kota itu untuk dorang tinggal.

Markus 12:26

Kong tentang orang mati yang hidup ulang, ngoni so baca carita yang nabi Musa tulis, to? Waktu dia ada di pinggir rumpu baduri yang manyala, Tuhan Allah bilang pa nabi Musa bagini, ‘Kita ini suda Tuhan Allah yang Abraham, Ishak deng Yakub semba.’