Yohanes 18:35 - Perjanjian Baru Bahasa Melayu Maluku Utara

³⁵ Gubernur Pilatus jawab pa Dia, “Ii! Bapa so tau kita bukang orang Yahudi, kong Bapa tanya itu? Bapa pe orang-orang satu bangsa sandiri deng imam-imam kapala yang bawa pa Bapa kamari. Jadi coba bilang suda, Bapa so biking sala apa?”

Yohanes 18:35 Referans Kwoze

Kisah Para Rasul 23:29

Tapi Mahkama Agama itu tara dapa bukti yang bilang Paulus itu ada sala, karna memang dia tara biking kajahatan. Orang-orang Yahudi tudu pa dia cuma karna dorang pe ajaran agama, kong tarada alasan yang biking dia pantas dapa hukum mati atau dapa hukuman penjara.

Kisah Para Rasul 21:38

Berarti ngana ini bukang orang Mesir itu yang bolong lama ini marontak pa pemerinta kong bawa lari ampa ribu orang yang tukang biking kaco pake senjata di padang gurun.”

Kisah Para Rasul 3:13

Ngoni tau, Tuhan Allah yang torang pe orang tua dulu-dulu Abraham, Ishak deng Yakub jaga semba, Dia so biking Yesus dapa puji deng hormat. Yesus itu yang jaga biking apa yang Tuhan Allah suru. Tempo hari ngoni tara tarima pa Yesus, kong ngoni serakan Dia pa gubernur Pilatus supaya Dia dapa hukum. Padahal, waktu itu gubernur mo kase bebas pa Dia.

Yohanes 19:11

Kong Yesus bilang pa dia, “Bapa memang ada kuasa pa Kita, tapi itu cuma Tuhan Allah yang kase kuasa itu pa bapa. Jadi, orang yang serakan Kita pa bapa, orang itu pe dosa lebe basar dari bapa pe dosa.”

Yohanes 19:6

Waktu agama Yahudi pe imam-imam kapala deng penjaga-penjaga Ruma Ibada Pusat lia pa Yesus, dorang bataria, “Salib suda pa Dia, salib suda pa Dia!” Pilatus bilang pa dorang, “Kalu memang ngoni mo kase salib pa Dia, ambe suda pa Dia kong ngoni sandiri yang kase salib suda. Barang, kita so priksa pa Dia, kong kita tara dapa Dia pe sala apa-apa.”

Yohanes 18:28

Waktu masi pagi-pagi skali, dorang bawa pa Yesus dari imam basar Kayafas pe kintal ruma antar di gubernur Roma pe istana. Tapi orang-orang agama Yahudi sandiri tara maso di situ karna gubernur itu bukang orang Yahudi. Barang, kalu iko agama Yahudi pe aturan, dorang mo jadi berdosa kalu ada sama-sama deng orang yang bukang agama Yahudi, kong orang agama Yahudi yang jadi najis itu sabantar so tara bole makang pa dong pe hari raya Paska.

Yohanes 18:34

Kong Yesus bilang, “Yang bapa tanya itu, bapa sandiri yang mau tau, atau ada orang laeng yang bilang pa bapa tentang Kita?”

Yohanes 18:36

Kong Yesus bilang pa dia, “Kita pe kerajaan bukang dari dunia ini. Barang, kalu Kita jadi Raja di dunia ini, pasti orang-orang yang jaga biking apa yang Kita suru so datang baku prang untuk bela pa Kita, supaya Kita tara dapa serakan pa pemimpin-pemimpin agama Yahudi. Tapi Kita pe kerajaan memang bukang di dunia ini.”