Yohanes 14:17 - Perjanjian Baru Bahasa Melayu Maluku Utara

¹⁷ Penolong itu Tuhan Allah pe Roh, yang mo kase ajar pa ngoni apa yang butul tentang Tuhan Allah. Orang-orang yang tara percaya pa Tuhan Allah, tara bisa tarima Tuhan Allah pe Roh itu, barang dorang tara dapa lia pa Dia deng tara kanal pa Dia. Tapi ngoni ini kanal pa Dia karna Dia ada sama-sama deng ngoni kong akan jadi satu deng ngoni.

Yohanes 14:17 Referans Kwoze

Yohanes 16:13

Nanti kalu Roh Kudus yang mo tolong itu so datang, Dia mo kase ajar pa ngoni sampe ngoni bole mangarti samua yang butul. Barang, Roh Kudus itu tara bicara iko apa yang ada pa Dia pe pikiran sandiri, tapi Dia bicara iko apa yang Dia dengar dari Tuhan Allah. Kong Roh Kudus lagi yang mo kase tau pa ngoni apa yang mo jadi nanti.

1 Yohanes 2:27

Tapi untuk ngoni sandiri, Tuhan Allah so kase Roh Kudus untuk kuasai pa ngoni. Roh itu masi tetap ada pa ngoni, jadi ngoni so tara perlu lagi orang laeng ajar. Roh Kudus itu so ajar pa ngoni tentang samua hal. Apa yang Dia kase ajar itu butul deng tara foya. Kong karna ngoni so tarima ajaran itu dari Dia, ngoni musti tetap hidup satu hati deng Yesus Kristus.

Yohanes 15:26

Nanti Kita mo utus Roh Kudus untuk tolong pa ngoni, Roh Kudus itu dari Tuhan Allah. Roh Kudus itu yang mo kase tau yang butul tentang Tuhan Allah deng mo kase tau pa orang-orang tentang Kita.

1 Yohanes 4:6

Torang ini dari Tuhan Allah. Jadi orang yang kanal pa Tuhan Allah, dia dengar pa torang. Tapi orang yang tara kanal pa Tuhan Allah, dia tara dengar pa torang. Dari situ torang dapa tau, orang yang ada Tuhan Allah pe Roh, dia bawa ajaran yang butul, deng orang yang tarada Tuhan Allah pe Roh, dia bawa ajaran yang tara butul.

1 Korintus 3:16

Ngoni tau ka tarada, ngoni itu sama deng Tuhan Allah pe Ruma, kong Tuhan Allah pe Roh tinggal pa ngoni.

1 Korintus 2:14

Tapi orang-orang yang cuma iko manusia pe mau, dorang tara tarima ajaran dari Tuhan Allah pe Roh. Dorang anggap itu sama deng orang-orang bodo pe carita saja. Ajaran dari Roh Kudus itu dorang tara bisa mangarti, tapi ajaran itu orang bisa mangarti cuma kalu Roh Kudus yang bantu pa dorang untuk mangarti.

1 Korintus 6:19

Ngoni so tau to, Roh Kudus tinggal dalam ngoni pe diri, jadi ngoni sama deng so jadi Tuhan Allah pe Ruma yang Roh Kudus tinggal. Tuhan Allah yang kase Roh Kudus itu pa ngoni, kong ngoni pe diri itu bukang ngoni punya sandiri, tapi Tuhan Allah punya.

2 Timotius 1:14

Ngana pe tugas, kase tau Kabar Bae. Kabar Bae itu sama deng harta yang mahal. Jadi jaga ngana pe tugas itu bae-bae. Roh Kudus yang ada di torang pe hati, mo bantu pa torang jaga tugas itu, supaya tarada orang yang biking itu jadi ajaran sesat.

Yohanes 14:16

Kong Kita mo minta pa Kita pe Bapa, supaya Dia kase Penolong satu pa ngoni, yang mo ada turus sama-sama deng ngoni.

Yohanes 14:23

Yesus jawab pa dia, “Kalu orang sayang pa Kita, dia mo biking Kita pe ajaran, kong Kita pe Bapa akan sayang pa dia. Kong Kita deng Kita pe Bapa mo datang tinggal sama-sama deng dia.

1 Yohanes 3:24

Sapa yang iko Tuhan Allah pe parenta-parenta, dia so jadi satu hati deng Tuhan Allah, kong Tuhan Allah me jadi satu hati deng dia. Deng bagitu, torang bisa tau, Tuhan Allah satu hati deng torang, barang Tuhan Allah so kase Dia pe Roh pa torang.

1 Yohanes 4:4

Tapi, ngoni yang kita so sayang sama deng kita pe ana-ana, ngoni ini dari Tuhan Allah. Jadi ngoni so kase kala pa nabi-nabi palsu, karna Roh yang ada pa ngoni Dia pe kuasa lebe basar dari roh yang ada di dunia ini.

Efesus 3:17

supaya Yesus Kristus tetap tinggal di ngoni pe hati karna ngoni percaya pa Dia. Kita minta pa Tuhan Allah supaya ngoni pe sayang lebe tamba basar pa Tuhan Allah deng pa samua orang, itu sama deng pohong pe akar yang lebe tatanam kuat di tana.

Galatia 4:6

Kong karna torang so jadi Tuhan Allah pe ana-ana, Tuhan Allah so suru pa Dia pe Anak pe Roh tinggal di torang pe hati, kong Roh yang ada di torang pe hati itu bakarja deng biking torang bole pangge pa Tuhan Allah itu, “Papa e, ya Bapa!”

2 Korintus 13:5

Coba ngoni uji ngoni pe diri sandiri, ngoni butul-butul percaya ka tarada. Priksa ngoni pe hati, apa ngoni tau pasti, Kristus Yesus ada di ngoni pe hati? Kalu tarada, berarti ngoni tara tahang uji.

Kolose 1:27

Yang Tuhan Allah kase mangarti pa dorang itu, Dia pe rencana yang paling hebat deng luar biasa pa ngoni orang-orang bukang Yahudi. Dia pe rencana itu bagini: Yesus Kristus tinggal di ngoni pe hati, jadi ngoni bole baharap deng yakin, nanti ngoni me sama-sama deng Dia di Dia pe tampa yang luar biasa.

Efesus 2:22

Jadi skarang, karna torang so jadi satu hati deng Yesus Kristus, biar dari bangsa mana saja, Dia biking torang samua jadi satu, sama deng satu ruma, kong di situ tampa untuk Tuhan Allah pe Roh tinggal.

Matius 10:20

Barang, bukang ngoni sandiri pe kata-kata yang kaluar tapi ngoni pe Bapa pe Roh, Dia yang mo kase kata-kata itu pa ngoni.

Wahyu 2:17

Jadi dengar bae-bae apa yang Tuhan Allah pe Roh kase tau pa Dia pe jemaat-jemaat, bagini, ‘Sapa yang menang dari pengaru jahat, nanti Kita kase pa dia makanang dari sorga yang orang sebut manna yang tasambunyi. Nanti Kita mo kase lagi pa dia batu puti satu yang ada tatulis dia pe nama baru. Nama baru itu, cuma orang yang tarima batu itu saja yang tau, orang laeng tara tau.’ ”

1 Yohanes 5:7

Ada tiga bukti yang biking torang tau butul Yesus itu datang dari Tuhan Allah:

2 Korintus 6:16

Apa ada hubungan antara Tuhan Allah pe Ruma deng manusia pe tampa semba puji-puji? Tara ada hubungan! Torang orang-orang percaya, tong ini sama deng Tuhan Allah pe Ruma, karna Tuhan Allah yang hidup tinggal di torang pe hati. Itu sama deng Tuhan Allah janji dulu, kong skarang so jadi, “Kita mo tinggal sama-sama deng dorang, deng hidup deng dorang, kong Kita mo jadi dorang pe Tuhan Allah, deng dorang mo jadi Kita pe umat.”

1 Korintus 14:15

Jadi kalu bagitu, yang bae kita mo biking apa? Kita suka pake dua-dua. Kita mo berdoa dari kita pe roh pake bahasa roh, deng kita lagi mo berdoa pake kata-kata dari kita pe pikiran. Kita mo manyanyi puji pa Tuhan dari kita pe roh pake bahasa roh, deng kita lagi mo manyanyi puji pa Tuhan pake kata-kata dari kita pe pikiran.

Yohanes 6:40

Barang, ini yang Kita pe Bapa mau: Dia mau supaya tiap orang yang lia pa Dia pe Anak kong percaya pa Anak itu, dorang itu mo dapa hidup deng Tuhan Allah slama-lamanya, deng nanti di hari kiamat, Kita mo kase hidup ulang pa dorang.”