Yohanes 11:42 - Perjanjian Baru Bahasa Melayu Maluku Utara

⁴² Kita tau, Bapa salalu dengar pa Kita, tapi karna banya orang di sini, jadi Kita bilang deng suara kuat, supaya dorang percaya Bapa yang so utus pa Kita.”

Yohanes 11:42 Referans Kwoze

Yohanes 3:17

Barang, Tuhan Allah utus pa Dia pe Anak datang di dunia ini bukang untuk hukum pa orang karna dorang pe dosa, tapi supaya kase slamat pa orang-orang di dunia ini.

Yohanes 17:21

Bapa, Kita minta supaya dorang itu jadi satu hati satu deng yang laeng, sama deng Kita lagi jadi satu deng Bapa kong Bapa jadi satu deng Kita. Kita minta dorang jadi satu hati satu deng yang laeng supaya dorang lagi jadi satu deng Torang. Kita minta bagitu supaya kalu torang samua jadi satu, samua orang di dunia ini jadi percaya, Bapa yang utus pa Kita.

1 Yohanes 4:14

Torang ini so lia pa Anak Allah deng torang pe mata kapala sandiri kong so kase tau pa ngoni, butul Tuhan Allah torang pe Bapa so utus Dia pe Anak untuk kase slamat pa manusia yang ada di dunia ini.

Ibrani 7:25

Kong karna Dia Imam slama-lamanya, Dia ada kuasa kase slamat pa orang-orang yang mau datang pa Tuhan Allah, dari skarang sampe slama-lamanya. Dia kase slamat pa torang, barang Dia hidup slama-lamanya untuk kase berdoa pa torang pa Tuhan Allah.

Ibrani 5:7

Waktu Yesus Kristus hidup di dunia ini, Dia berdoa kong minta sunggu-sunggu sampe babataria deng mamanangis pa Tuhan Allah yang punya kuasa untuk kase lapas pa Dia dari kematian. Tuhan Allah dengar Dia pe doa itu, barang Dia butul-butul iko Tuhan Allah pe mau.

Roma 8:3

Kalu torang iko aturan-aturan di lima kitab Musa, tara mungkin torang dapa slamat, karna torang ini manusia yang tara mampo biking samua aturan itu. Tapi torang bole dapa slamat karna Tuhan Allah. Tuhan Allah kase slamat pa torang deng cara Dia utus Dia pe Anak sandiri datang di dunia ini. Dia pe Anak pe badan itu, sama deng torang manusia berdosa pe badan. Kong Dia pe Anak itu mati supaya hapus torang pe dosa. Deng Dia kase Dia pe Anak mati bagitu, itu pe arti, Dia pe Anak so kase kala dosa pe kuasa.

Yohanes 20:31

Tapi samua yang so tatulis di kitab ini, itu ada tulis supaya ngoni percaya Yesus itu Mesias, Raja yang Tuhan Allah janji mo kase slamat pa manusia, deng Dia itu Anak Allah. Kalu ngoni so percaya pa Dia, ngoni mo dapa hidup deng Dia slama-lamanya.

Yohanes 17:25

Ya Bapa yang adil, orang-orang yang ada di dunia ini tara kanal pa Bapa, tapi Kita kanal pa Bapa. Deng Kita pe murit-murit tau, Bapa itu yang utus pa Kita.

Yohanes 17:8

Barang, samua yang Bapa so bilang pa Kita, Kita so kase tau pa dorang, kong dorang percaya. Dorang butul-butul tau, Kita ini datang dari Bapa, kong dorang percaya, Bapa yang utus pa Kita.

Yohanes 11:22

Tapi skarang me kita tau, apa saja yang Tuhan minta pa Tuhan Allah, Dia pasti kase.”

Matius 26:53

Jang ngoni lupa, Kita bisa minta pa Kita pe Bapa, la Dia langsung kirim malaekat deng ribu untuk tolong pa Kita.

Galatia 4:4

Tapi, bagitu waktu yang Tuhan Allah tentukan so sampe, Tuhan Allah utus Dia pe Anak datang di dunia. Anak itu yang lahir dari parampuang satu, kong Anak itu, hidup iko agama Yahudi pe aturan-aturan yang ada di lima kitab Musa.

Yohanes 11:31

Kong di ruma itu, ada banya orang agama Yahudi yang so datang untuk hibur pa Maria. Waktu dorang lia Maria badiri kong pigi kaluar, dong iko pa dia, barang dong kira dia mo pigi di kubur la manangis di sana.

Yohanes 8:42

Yesus bilang pa dorang, “Kalu Tuhan Allah itu ngoni pe Bapa, ngoni akan sayang pa Kita, barang Kita ini datang dari Tuhan Allah kong skarang Kita ada di sini. Kita datang bukang karna Kita pe mau sandiri, tapi karna Dia suda yang utus pa Kita.

Yohanes 8:29

Kong Dia yang so utus pa Kita, ada sama-sama deng Kita. Dia tara perna kase biar Kita sandiri, karna Kita salalu biking Dia pe hati sanang.”

Yohanes 8:16

Tapi kalu Kita mo hukum orang, Kita hukum orang deng butul, karna Kita tara hukum sandiri, tapi Kita sama-sama deng Kita pe Bapa yang utus pa Kita.

Yohanes 11:43

Abis Yesus bilang bagitu, Dia pangge pa Lazarus kuat-kuat, “Lazarus, kaluar kamari!”

Yohanes 12:11

Barang, waktu Yesus so kase hidup ulang pa Lazarus, banya orang agama Yahudi so jadi percaya pa Yesus, kong so tara mau iko pa imam-imam kapala.

Yohanes 12:17

Orang banya yang ada waktu Yesus pangge pa Lazarus kaluar dari kubur la kase hidup ulang pa dia, dorang itu kase tau turus pa orang-orang.