Yakobus 4:12 - Perjanjian Baru Bahasa Melayu Maluku Utara

¹² Tuhan pe aturan itu Tuhan sandiri yang biking. Deng cuma Dia yang bole jadi hakim. Dia yang berkuasa kase slamat pa torang deng Dia me bole kase hukum pa torang tapisa deng Tuhan Allah slama-lamanya. Tapi ngoni ini sapa sampe mo tudu orang laeng sala? Jang ngoni bagitu.

Yakobus 4:12 Referans Kwoze

Roma 14:4

Tuhan itu torang samua pe Tuang. Jadi torang tarada hak mo kase sala pa orang laeng pe orang karja. Cuma Tuhan saja yang ada hak untuk kase sala pa Dia pe orang karja. Deng Tuhan pasti mo tolong pa orang karja itu supaya bole hidup butul.

Roma 2:1

Sudara-sudara, memang Tuhan Allah mo hukum pa samua orang yang jaga biking barang yang jahat macam tadi itu. Tapi ngoni me biking barang yang jahat itu, jadi ngoni tara ada alasan kase sala pa dorang. Karna kalu ngoni bilang dorang pantas Tuhan Allah hukum, itu sama saja deng ngoni so hukum ngoni pe diri sandiri.

Matius 10:28

Ngoni me jang tako pa manusia. Karna manusia cuma mampo bunu ngoni pe badan, tapi tarada kuasa untuk bunu ngoni pe jiwa. Tako saja pa Tuhan Allah yang ada kuasa untuk bunu ngoni pe badan kong hukum ngoni pe jiwa di neraka.

Yakobus 5:9

Sudara-sudara, jang ngoni mengelu deng baku tudu, supaya ngoni tara dapa hukum. Inga e, Tuhan so mo datang ulang. Dia sama deng hakim yang mo adili pa samua orang.

Ibrani 7:25

Kong karna Dia Imam slama-lamanya, Dia ada kuasa kase slamat pa orang-orang yang mau datang pa Tuhan Allah, dari skarang sampe slama-lamanya. Dia kase slamat pa torang, barang Dia hidup slama-lamanya untuk kase berdoa pa torang pa Tuhan Allah.

Roma 14:13

Nanti Tuhan Allah mo adili pa torang samua, jadi jang torang baku kase sala lagi. Tapi lebe bae torang ati-ati supaya jang torang biking barang yang biking sampe torang pe sudara jatu dalam dosa!

Roma 9:20

Tapi torang tara bole pikir bagitu. Torang ini sapa kong, sampe torang barani malawang pa Tuhan Allah? Torang ini cuma manusia yang Tuhan Allah cipta. Masa torang bilang bagini pa Dia, “Bikiapa kong Tuhan Allah cipta pa kita bagini?”

Lukas 12:5

Skarang, Kita mo kase tunju pa ngoni sapa yang musti ngoni tako. Ngoni musti tako cuma pa Tuhan Allah saja yang ada kuasa untuk bunu ngoni pe badan deng ada kuasa lagi untuk hukum ngoni di neraka. Jadi, Kita bilang pa ngoni, ngoni musti tako saja pa Dia!